1 ǃKhūb ge sa ǁorena ǂōrisase ra kōǀî tsî khoe-ets ga ǀkhao, ob ge ǁîba nî ǁkhara tsi. 2 Sats ǃoagu ra tsūdīna ǀûba tsîts ga ǀgore, ob ge ǃKhūba sa ǁorena nî ǀûba tsi. 3 Xawe khoe-i ǀkha ǁaixa hâsets ga hâ, o tā ǃKhūb xats nî ǀûbahe ǃkhaisa ǃâubasen. 4 Sats ge aitsama a ǁore-ao tsîts ga ǀnî khoe-e ǀûba ǂgao tama i, ots ge ǀguis khami ī ǂhanu-i, sa ǁorenats ǀûbahes ǃaromats ǃKhūb ǃoa nî ǀgore ǃkhais di-i tsîna ūhâ tama hâ. 5 Khoes ǀguisats ge i. Sa ǁaixasiba xuts ga ǀgoraǂgao tama io, o i ge sa ǁorenats nî ǀûbahe ǃkhais di ǃâubasen-i xare-e a ǀkhai. 6 Nēs xa ǂâi! ǀGuitsēts ge nî ǁō tsîs ge sa sorosa nî hîkākāhe. ǁNā-amaga khoen ǀkha ǁaixaǀû, î ǃKhūb di mîmāde ǁnâuǀnam. 7 Hoan xa ǀGapib ge sats ǀkhab ge ǃgaeǀhaosa dī, o mā tsi mîmādi xa ǂâihō. Nau khoen di dīsādi ǂamats nî ǁaixas ǃās ǃnâ ǁîna ǀuru.
ǂNoagudi
8 Sa ǁaiba xuts ga ǁkhaesen, ots ge ǂnoagude tsoatsoa tide tamas ka io ǃnāsase ǁore tide. 9 Sats ǃaroma ǁoreb ase ī ǃkhais ge khoeǀhōgun nî ǃhuigutsoatsoa ǃkhaisa ǃaromasa. 10 ǃNāsa ǁnui-i ge ǀaesa ǃnāsase ra ǂhubi kai. ǃNāsa ǃnâudanaxasib ge ǃnāsa ǀgaisa ǂnoaguba ra hā-ū. ǃNāsasets ga ǃkhū tamas ka iots ga ǀgaisa, ots ge ǃnāǂamsase khoen ǃoagu ǁaixa ǁkhā. 11 ǃNapetamase ra khâi ǂnoagu-i ge ǃhaese ra ǂhubi ǀae-i khami ī. Nē ǃkhais ge ǀaoǂnâxūs kōse a sī ǁkhā. 12 Nani-i aits ga ǃnâi, o i ge ra ǁhabutsoatsoa, xawe ǁî-i aits ga ǂara, o-i ge ra ǀari. ǁÎ ǀgamn hoan ge sa amsa xu ra ǂoaxa.
ǀHoeb, ǂhumib tsî ǂkhaba mîn
13 ǀHoe-aon tsî ǂhumi-aon tsîn ge ǀâxarehesa anu hâ, ǁîn aib ai go hâbasen i khoenan ra hîkākā xui-ao. 14 Khoen di ǂhumigu ge nau khoen di ûiga ge hîkākā tsî ǁîna ǁîn di ǃnaeǃhūba xu ge ǁgariǂui. ǁNāti ī ǂhâbasa tama ǂgobesendi ge ǀgaisa ǃādi tsî ǃgôaǃgôasa khoen di omde ge hîkākā. 15 Nē mîǁgaiǁgai-aon ge aogu nî ǂgomǂgomsa tarade xu ǀgora tsî di sîsenbadi ge hâ i xūn hoana nî ǂoaǃnâ ǃkhaisa ge ǃaroma. 16 Gagasi sâbats ga ǂhâba, o tā ǂhumina ǃgâ. 17 ǃNabab ge ǃhonaga ra ǃaroma, xawe ǂūǁoa nams ge ǂkhōga khôa ǁkhā. 18 ǂGui khoen ge ǂkhaba nammi xa ǃaromahe hâse ge ǁō, hoaǀkhāǀāgôab xa ǃaromahe hâse ge ǁōn xa. 19 ǃKhūb ga ǂūǁoa ǃhoab di sîsenǂuiga xu sâu tsi, ots ge ǀkhaehe hâ. ǁNāti ī ǃhoab ge ǃgomma ǁgui-ai tsi tsî ǃgûsa ǃgomǃgomba tsi ǁkhā. 20 Nēs ge ǀuri jokhoesa sa ǃaos ai ǃnaohes tsî ǃgorodi ai khedeb ǀkha ǃgaeǀhaohes khami ī. 21 Mîǁgaiǁgaidi ge tsâba ra ǃaroma, ǁōb ge ǁnās ǃgâ-ai ūǃoahesa.
22 Mîǁgaiǁgaidi ge ǀaeǁhabugu khami ī, xawe gu ge ǃKhūba ra ǃaoǃgâ khoena a dan ǁoa. 23 Xawe ǁnān ǃKhūba ra ǁnāxūn ge nē ǂkhaba mîdi di ǀgaib ǃnâ nî ǁnā. ǀGui ǃnāsas ga nē ǂhumib di ǀaesa ǁîn ǁaegu khauhe, os ge ǀarihe ǁoa. Nē ǂkhaba mîdi ge xamgu tsî ǀgarugu hîa xamari-e ǃau tsî ra ǀkhauǃāgu khami ī.
24 Sats ge sa ūhâxūna omǂnamib ǀkha ra ǁkhaeba tsî sa ǀhaiǀurib tsî ǃhuniǀurib tsîna ra ǃnâu-am. 25 ǁNā-amaga tare-ets ra mî ǃkhaisa ǂanbasen. Mâ mîs hoasa ǀnō, î sa ams ǃaroma ǃnau-amsa ǂhomisase ūhâ. 26 ǀNîsi i ge khoe-e sa mîdi ǀkhats nî dīsā ǃkhaisa ǃâu hâ, tsîts ga ǂanbasen tama i, ots ge tsū xū-e mî tsî nî tao.
