ǃKhūb ge Antioxuba ra ǁkhara
(1 Makabergu 6:1-72 Makabergu 1:11-17)1 ǁNā ǁaeb ǃnâb ge Antioxuba Persiaba xu ge ǁnā-oa 2 tsî Persepolis ǃnâ sī ǂgâ tsî Tempela ǁkhâuǁnâs tsî ǃāsa ǁîb ǀgaib ǃnaka ūsa ge dītsâ. Khoen ge ǁâtanin âna ū tsî Antioxuba ge ǁnāǂam tsî ǁîb di toroǂnubisa taotaosasib ǃnâs nî ǁnā-oa ǃkhaisa ge ǁgari. 3 Ekbatanas ǃnâb ge sī, ob ge taren ge Nikanori tsî Timoteub hâkha di toroǃkhamaogu ǀkha ī ǃkhaisa ge mîbahe. 4 ǁÎb ge ǁaixa tsî Jodeǁîn ge ǁîb ǃoagu hō dansab nî ǀkhao ǃkhaisa ge mîǁgui. ǁNā-amagab ge ǁîb di hākuniǃnari-aoba Jerusalems tawa kha sī tama hîab mâ tide ǃkhaisa ge mîmā. Kai ǀgapiǂâixasib ǀkhab ge “Tita ge Jerusalemsa, Jodeǁîn di ǁkhōǃkhaib ǃnâ nî dabaǃkhuni” ti ge mî.
Xaweb ge Elob di ǁkharab ǃoab ra ǀgū ǃkhaisa ge ǀū i. 5 Nē mîdeb ra mî ǃkhais ǃaromab ge hoana a mû ǁkhā ǃKhūb, Israelǁaes di Eloba ǂuruǂuruhe ǁoa tsî ǀūhe ǀaeba ge mā bi. ǃHoaǀûb ra hîab ge ǂuruǂuruhe ǁoase ǃnāb ǃnâ ge tsû. 6 Nē ǁkharab ge ǁnāti ī khoeb, hîa ge nauna ǂgui ǀgaugu ai tsûtsûb ǃaroma a ǂhanu. 7 Xaweb ge ǁîba ǁîb di ǁēsiba ge ǀû tama hâ i. ǁÎb ge ǃaruǀîǀgui ge ǀgapiǂâixa tsî Jodeǁîna gere ǁēba tsî ǃhaesen nî ǁgariǂuihe ǃkhaisa ge mîmā. Xawe ǃgariseb hākunis âb ǀkha ǃnarigaru hîa torokunisa xu ǁnā tsî uniǁaedi ǃnâ ge tsû. 8 ǁÎb ge ǁîb di ǀgapiǂâixasib ǀkha ǁîb di ǀgaisakhoesi ǀgaib ǀkhab nî hurib di ǃgabiga ǁîba ǁnâuǀnam kai tsî ǀgapi ǃhomga ǀnō-ūdas ai ǀnō ti ge ǂâi hâ i. Xaweb ge ǀāses timîsi ǃhūb ai ǁnā tsî tani-ūxūb ǀkha ge tanibēhe. Nēs ge Elob di ǁkhāsib di ǃgāsa ǁgauǁgausa. 9 Nē eloxoresa khoeb di sorosa xun ge ǂunina gere ǂoaxa tsîb ge kai tsûb tsî tsâb ǃnâ ge ûi hâ i. Nē hammi ge kaise ge ǁgaora i tsî gu ge hoaraga toroǃkhamaoga ge ǀaesen 10 tsî i ge ǀgui-i tsîna ǁîba nî ūkhâise ge ǀgū ǁoa i. ǂKhari ǁaero-e nēn hoan aiǃâb ge ǀgamirodeb nî ǃkhō ti ge ǂâi hâ i.
Antioxub ge Eloba ra mîmâiba
(1 Makabergu 6:8-17)11 Antioxub ge Elob di ǁkharab ge ǁîb ai hā xui-ao ǃgamse ge ǃoa hâ i tsî kai tsûba gere tsâ. Egab ge ǂâiǃgâ tsî ǁîb di ǀgapiǂâixasiba ge ǀû. 12 ǁÎb di ǀō hammab ge aitsama ǁkhā ǁoa, ob ge ge mî: “ǃGâi i ge a hoa khoen di ôan nî Elob ǃnaka mâisen ǃkhaisa tsîn ǁîb ǀkhan nî ǀguitikō ti ǂâi tidesa.” 13 Elob di ǀkhommi ge Antioxub ǃaroma ge ǀam, xaweb ge nē ama tama khoeba Eloba ge mîmâiba: 14 “Tita ge Jerusalemsa ǃhūb kōse khôaǂkhū tsî nē ǃanu ǃāsa Jodeǁîn di ǁkhōǃkhaise nî dī ti ge ǂâi hâ i, xawe ta ge nēsi ǃnorasa ǃās ase ra ǂgaiǂui si. 15 Tita ge ǁō hâ sorodi Jodeǁîn tsî ǁîn ôan dide ta ǁîde ta nî ǁkhōs ǃās ǃnâ ǀgurun tsî xamarin tsî ǀhomanin tsîn xa nî ǂûhese nî aoǂui ti ge ǂâi. Xawe ta ge nēsi ǁîna Atenes di ǁanǂgāsaben ǀkha ǁkhā aiǂhanuga ra mā ǂgao. 16 Tita ge Tempela ǁkhâuǁnâ tsî ǁîb di ǃanu xapana ge ū, xawe ta ge ǁîba ǃgomǀgausa ǀkhaexūn tsî aiǃâkamn xa ǃnāsase ǃgâi xapan ǀkha nî ǀoaǀoa, tsî ǁguibade ti ǂhunuma hōǂgāde xu nî matare. 17 Nēn hoan xōǀkhā ta ge tita tsîna nî Jodeǁî kai tsî khoen ǁan hâ ǃkhain hoan ai ǃgûma tsî Elob di ǁkhāsib xa ǁîna nî ǃhoaba.”
Antioxub di sîǂkhanis Jodeǁîn ǃoa
18 Antioxub ge Elob ge ǁîba anu hâ khami ǁkhara tsî gu tsûga toa tama ǃkhais xa ǃan tsî sao ra sîǂkhanisa Jodeǁîn ǃoa ge xoa:
19 “Ti ama-ai Jodeǁîna ta ge tita ǁîn di gao-ao tsî ǂgaeǂgui-aota, Antioxuta kai tawedesa mā tsî ǂurusib tsî ǃgâiǃgâb ǀguiba ǁîna ra ǁkhoreba.
20 “Tita ra ǃâubasens ge sadu tsî sadu omaridi ǃgâi ǂurusib ǃnâ hâ tsîn hoa xūna ǃgâise ra ǃgû ǃkhaisa. Ti ǃâubasens ge Elob ǃnâ hâ, 21 tsî ta ge sadu xa ta ge ǁgauhe ǃgôasib tsî khoexaǃnâsib tsîna ǃgâiaǂgaob ǀkha ra ǂâihō.
“Persiaba xu ta ge ǁaru-oa, o ta ge kaise ge ǀaesen tsî ta ge hoaǃnā-aixa mâsib ti khoen dib ǃoa ta nî kōtsoatsoa ǃkhaisa ge ǀape. 22 Ti ǂurusib xa ta îganǀgē tama hâ tsî ta ge ǀoasase ta nî ǂuru ǃkhaisa ra ǂgomǃgâ. 23 Xawe ta ge ti îb ge ǀapas ǀkharigu ǃnâ, ǃgûb gere ǃkhai-i hoa-i ai saoǃgon-ao-e ǁgaumâi ǃkhaisa ra ǂâihō. 24 ǁÎb ge xū-i ga ǀūǂamse ī tamas ka io ǁgai ǂhôa-i ga hā, on khoena ǃao tide tsî tari-i ǂgaeǂguis ǃnakan hâ ǃkhaisa nî ǂanga ge dī. 25 ǁKhāti ta ge ti gaosib di ǃhūǀgoradi tawa hâ ǂgaeǂgui-aogu ge īǁkhāsiba ǃâu hâ i xui-ao Antioxuba gao-aose ge ǁgaumâi. ǁÎba ta ge ǀnai ǀapas ǀkharigu ǃnâ ta gere ǃgûma, o ǃnāsan sadu din ai ge ǂgomǃgâ. ǁÎb ge xoaǁnâb nē sîǂkhanis diba nî ǃkhōǃoa. 26 Tita ge hōhōǃnâ tsî ra ǀkhoma du, î du tita ge ǀgui khoe-i kas, ǁaes kas hoasa dība ǃgâi xūna ǂâis ǃnâ ūhâ tsî tita tsî ti ôab hâkhom ǃoagu ǃgâiǂâixa. 27 Tita ge ǁîb nî ǂhanu-aisib tsî khoexaǃnâsib ǀkha, tita gere sado ǂgaeǂguis ǁkhās khami ǂgaeǂgui du ǃkhaisa ra ǂgomǃgâ.”
28 ǁNātib ge nē ǃgamaob, hîa gere Eloba ǃkhāǃkhāba, ǁkhā tsûb nau khoen aib ge hā-ūba ge tsâ tsî ǀkhomǀkhomsase ǃhao ǃhūb di ǃhomgu ǃnâ ǃoaxa ǁōba ge ǁō. 29 ǁÎb di ǀgūǀhōsagu di ǀguib, Filipub ge ǁîb sorosa oms ǁga ge ū, xaweb ge Antioxub ôabab gere ǃao xui-ao, Egipteb gao-aob Ptolemib Filometori ǃoa ge ǃgû.
