ǀGôana ǃgâiǀgaub ǃnâ kaikais
1 ǁGûb hîa ǁîb ôaba ǀnammi ge ôasaba, ǁîb aib nî ega ǂnīsa ga ǃnuriǃnade nî ǂnau. 2 Sa ôab ǀkhats ga ǁkhō, ob ge satsa kai huise nî iba tsîts ge ǁîb xa ǂants a khoen ǁaegu nî ǂamaǃhoa. 3 Sa ôab ǀkhats ga ǁkhō tsî mâtib nî tanisen ǃkhaisa ǁkhāǁkhā bi, ots ge ǃgâina ǁîba xu nî ǃkhōǃoa. ǁÎb xats ge ǂants a i hoa-i ai ǂama ǁkhā tsî sa khākhoena surixa kai ǁkhā. 4-5 ǁGûb ga ǁō xaweb ge amab ǃnâ ôasab ǁîb khami īb ǃnâ ûi hâ. ǁNāti ī ǁgûb ûi hâs kōseb ge ǁîb ôab ǁga ǃgâiaǂgaob ǀkha a kō ǁkhā. ǁŌb ka, xawes tsînab ge ǁîb ôab xa ǃhausen tide. 6 ǁÎb ge ǁîb ôab nî khākhoen âba ǁkhara tsî ǁîb di horesan ǁîna anu hâ ǃgâisib ǀkha nî sîsenūhe ǃkhais di ǂgomǃgâs ǀkha ra ǁō.
7 Mâ ǁgû-i hîa ôasa-e ga ǁgui hâse kaikai-i ge ǁnā ǀgôa-e ǀhapina nî ǃgae-aiba. ǁÎ-i ǂgaob ge mâ i ga ǀgôa-i ǃauba ǁnâu ǃnās hoasa nî ǃgubuǀû. 8 ǁNā-amagats ge sa ôaba nî ǁgauǃnâ, îb tā ǃkhausase kaikhâi tsî tā ǃkhausa hā-i khami tsūdīsa. 9 Sa ôabats ga tsaurase kaikai, ots ge ǁîb ra dī xūn xa nî ǃhuri. ǁÎb ǀkhats ga ǀhuru, ob ge tsûaǂgaob ǀguiba nî mā tsi. 10 Tā nēsi ǁîb ǀkha âi, ots ge ega ǁîb ǃaroma ǃoa tide tsî hâhâ ra ǂâiǂhansens tsî ǃhausens ǃnâ hâ tide. 11 Tā ǂkhammi a hîa ǃnorasasiba mā bi, î tsū xū-eb ga dī, o tā kō-īǀkhā. 12 ǀGôab a hîa ǂnau bi, îb satsa ǃgôasiba mā. ǁNāsats ga dī tama i, ob ge ǃnâudanaxa tsî nî ǁnâuǀnamoǃnâ tsî tsûaǂgaob ǀguiba nî ǃaromaba tsi. 13 ǁNā-amaga sa ôaba ǁgauǃnâ, î dīb nî sîsen-e mā tamas ka i, ob ge satsa taosib ase nî ība.
ǂUrusib tsî ǃgâiaǂgaob
14 ǀGâsa tsî xawe ǂuru tsî ǀgaisas ge ǃkhū tsî ǀaegusas ǃgâ-ai a ǃgâi. 15 ǂUrusib tsî ǀgaisa soros tsîra ge ǃhuniǀurib tsî ǀamo ǃkhūsib ǃgâ-ai a ǃgâi. 16 ǀGuis khami ī ǃkhūsi-i tsîn ge ǂurusib soros dib ǀkha ǀgopeǀnōhe ǁoa tsî i ge ǀguis khami ī ǃgâiaǂgao-i tsîna, dâxa ǂgaob ǃgâ-ai kai tama hâ. 17 ǁŌb ge ǃaorosa ûib ǃgâ-ai ǃgâi tsî ǀamo sâba, ǂuruhe ǁoa ǀaeb ǃgâ-ai. 18 Kaisets ga ǀaesen, o i ge ǃgâi ǂû-i tsîna xū-e ǃgâiba tama hâ tsî ǀhoba-i ai mâihes ǁkhās khami i. 19 ǁÎ-i ge ǁgôa-elo-i ra ǁguibahe ǂû-i khami a harebeoǃnâ, ǁî-i ge ǂû ǁoa, ǃkhapa ǁoa ti ī. ǁNāti ī ge ǃKhūb xa ra tsâ kaihe khoe-i ǀkha ī. 20 ǁÎb ge ǁîb ǂû-e kō tsî ra ǀhâimâinǀom, dabihe hâ khoeb hîa ǂkham khoesa ǁnammâi hâb ǁkhāb khami.
ǃGâiaǂgaob tsî tsûaǂgaob
21 Tā ǂanepega tsûaǂgao kaisen tamas ka io ǂkhîoǃnâ kai tsi nî xū-e ôabasen. 22 Dâxasib tsî ǃgâiaǂgaob ge ǂomxasets nî ûiga nî hui tsi tsî ûiba nî anu kai. 23 Dâ tsî ǃgâiaǂgao, î tā hoaǁae ǂâiǂhansen. ǂÂiǂhansens ge khoe-i xare-e ǃgâidī tama hâ tsî ǂgui khoena ge hîkākā. 24 Surixasib tsî ǁaib tsîkha ge sa ûiba nî ǃnubuǃnubu. ǂÂiǂhansens ge ǁaeb aiǃâ ra kaira kai tsi. 25 ǃGâiaǂgaoxa khoe-i, ǃgâi tanisensa ūhâ i ge ǃgâi turaba ūhâ tsî ǁî-i di ǂû-e turaxase ra ǂû.
