Koasa anu hâ khoen
1 ǃNona xūn kaise ra ǃgâiaǂgao kai ten ge hâ, xūn hîa ǃKhūb tsî khoen tsîn hoana îsabana.
ǃGâsagu hîa ǀguiǂâixagu,
ǁanǁare-aon hîa khoexagun
tsî ǃgame hâ khoera hîa ǃgâise ǀguipa hâra tsîna.
2 ǃNona khoeǃnôan, ǁîn di ûiǀgaub xa ta ǃgâibahe tama xui-ao ta ǃhuisan ge hâ:
ǀGâsa khoen hîa ǀgapiǂâixan,
ǃkhū hâ khoen hîa ǂhumixan
tsî gâ kaira khoen hîa ra ǃgamekhôan tsîna.
3 Gā-aisibats ǂkhamsis âts ǃnâ ǀhaoǀhao tama nî is kao, mâtits kairats ka, o nî hō bi? 4 ǂHanu ǀgoraǃgâs, ǃgâi ǀapemās tsî ǀhai ǀûn tsîn ge îsase ra ǃgûǁare. 5 Mâtikōseb gā-aisiba kairasib ǃnâ a îsa tsî ra ǁnâuǃāb tsî ǀapemās tsîra a ǃgôaǃgôasa. 6 ǃGâi hōǃâs kaira khoen dis ge krons ase ī tsî ǁnāti ī khoen ge ǃKhūban ǃaoǃgâsiba ūba hâ, ti a koasen ǁkhā.
7 Khoese ǂâidi ǀkha ta ge ti ǂgaoba ge ǂkhîǂkhî tsî disiǁî-e ta ge ti nammi ǀkha nî mî:
ǁÎ-i ôan ǂama ǂnīsa khoe-i,
ǁî-i di khākhoen di ǁnāsa nî mûǃnâse, gaxuse ra ûi khoe-i tsîna.
8 ǀKhaehesa aob hîa gā-ai tarasa ūhâb,
ǃgame hâ khoera hîa ra ǁnâuǃā gura,
ǂkhaba mî-e ǃhoa tama khoe-i,
ǁîb xa ǃnaka hâ khoe-e nî sîsenbase i tama khoeb,
9 ǀkhaehesa khoe-i hîa ama ǀhōsa-e ūhâ-i,
khoe-i hîa khoen xa turaxase ra ǃgâhe-i,
10 tsî ama gā-aisiba ūhâ-i ge a kai,
xawe khoe-i hîa ǃKhūba ra ǃaoǃgâ-i ge hoan xa a kai.
11 ǁNāti i khoe-i ge hoana ra īǂam, ǃKhūba ǃaoǃgâs ge xūn hoan ǃgâ-ai a kai amaga.
Taradi
13 Tsû-i xare-i ge ǂgaob di tsûb khami ǁkhōǁkhōsa tama hâ. Tsî ǂkhabasi-i xare-i ge taras di ǂkhabasib khami ī tama hâ. 14 Tsâ-i xare-i ge ǁkhan tsi hâ khoe-i xa tsâ kaihes ǃgâ-ai tsū tama hâ. ǀKhao-i xare-i ge khākhoe-i xa ǀkhaohes ǃgâ-ai tsū tama hâ. 15 ǃGā-i xare-i ge ǀaob di ǃgāb ǃgâ-ai ǁōǁōsa tama hâ tsî ǁai-i xare-i ge tarekhoes di ǁaib ǃgâ-ai ǁōǁōsa tama hâ.
16 Tsū taras ǀkha ta nî ǁkhā oms ǃnâ hâs xa ta ge xammi tamas ka io kaiǀaob ǀkha ǁkhā oms ǃnâ nî hâ. 17 Taras di ǁgaiǂūsib ge ais âsa ra ǀkhara kai, ǁaixa bēr-i khamis nî ais âsa mûsens kōse. 18 ǁÎs aob ge ǃgû tsî ǁanǁare-aon ǀkha ra ǂû tsî ǁnāpa ǁîb di ǀhâimâinǀomsa a ǁkhae-oa ǁoa.
19 Taras xa ra ǃaromahe ǃgomsigu ǀkhats ga ǀgopeǀnō, on ge nau ǃgomsin hoana ǂkharise ra mûsen. As ǁnāti ī tarasa, ǁore-aon di ǁkharab ǁkhāba tsâ.
20 ǃNōsa aob hîa ǃhoaxa taras ǀkha hâb ge kaira aob ǀgopab ai ra ǂoab ǁkhāb khami ī.
21 Tā khoes di îsasib xa ǃkhō kaisen, î tā khoesa ǃkhūs hâ ǃkhais ǃaroma ǂhâba. 22 Aob ga taras âb xa ǃkhūsib âs ǀkha ǂkhâǃnâhe, os ge ǁîsa ǁaixa tsî ǀgapiǀgapisenxa tsî aob âsa ra taotao. 23 ǁGai tara-i ge ǁîs aoba ǃgâiaǂgaoba hā-ūba tama hâ; ǁnās ǃās ǃnâs ge ǁîba ra tsûaǂgao kai tsî ra ǃoaǃoa; ǁîs ge ǂgaob âba ra khôa kai. 24 Taradi ge sage, aoge hoage ǁore kai ǁkhā tsî ǁkhāti ǃoega ǁō kai ge ǁkhā. 25 Tāb ge aoba tsū tarasa, ǁgam-e ǁgamxapa-e xu ǂnâǂoasab mā-am tamas ǁkhās khami, ǂgaos ra xū-i hoa-e mîsa nî mā-am. 26 ǁÎs ga ǁnâuǀnam tsi ǂgao tama io, as sa ûiba xu ǂoa.
