Judits ge ǁîs ǀapede ra sîsenǂui
1 Judits ge Israelǁîn Elob ǃoas ge ǀgoretoao, 2 khâi, khobos âsa ǂgai tsî oms âs ǃnâ Sabbattsēdi tsî kaitsēdi tsîn ais gere dīs ǁkhās ase sī ge ǂgâ. 3 ǁÎs ge ǃoab saran tsî ǃoatarasaran hîas ge ana hâ ina ǁhû, ǁāsen tsî ǃgomǀgausa ǃgâihamxūn ǀkha ge soposen. ǀÛgu âsa ǀkhabuǃnâ, ǃkhai-e ǀgapa tsî îsa saran, ǁîs aob Manaseb ge ganupe ûitsama i, os gere anana ge ǂgaeǂgā. 4 ǁÎs ge ǀkhapura ǂgaeǂgā tsî ǃgoroǃkhuidi, ǃganudi, ǀkhunuǂnûidadi, ǂgaeradi tsî hoaraga anu-anusenxūna ge ǂnûi. ǁNātikōses ge ge anu-anusen, ǁîsa ra mû khoeb hoab di ǂâisas nî ǂgaese. 5 ǁÎs ge khobosa ǃgapas di ǂauxûi-i, xapab di oli-i, ǁnaruhe hâ ǃhoro-i, ǂnâǂnâsa ǀnoman, ǂgui peren, Jodeǁîn ǂhanuba ǃoa amhe hân tsîna ge mā. ǁNās khaoǃgâs ge hoaraga xapana ǃgami tsî khobosa tanis nîga ge mā. 6 ǁNās khaoǃgâ ra ge Betulias ǂgâdaodi ǃoa ǃgû tsî ǁnāpa Usiab tsî ǃās di kaikha Kabrib tsî Karmib hâkha tsîgu ǀkha ge ǀhao. 7 Khoegu ge Judits ǀkhara sarana ana tsî îsase ǃgâihamxūn ǀkha ais âsa boro hâ ǃkhaisa gu ge mû, o ǁîs di îsasib xa burugâ tsî ǁîs ǃoa ge mî: 8 “Ab Elob, sada aboxagu diba ǀkhae si tsî sa ǀapesa ǃgâiǃgâ kai, în Israelǁîna ǂnīsa ǁkhā tsî hoa ǃkhaidi ai hâ khoena Jerusalemsa ǃgôasiba mā.”
Os ge Juditsa aibe ǀgore 9 tsî ǁnās khaoǃgâ ge mî: “Khoega mîmā, î gu daode ǁkhowa-amba te. Tita ge sada go ǃhoaǁare hâ ina ta nî dīse ra ǃgû.” O gu ge ǁîga ǂkham khoega ge mîmā, î gu ǁîsa daode ǁkhowa-amba 10 tsî ra ge Judits tsî khobos âs tsîra ǃāsa xu ge ǂoa. Khoegu ge ǁîsa ǃhomga xu ǁgôa tsîs ǃgoaǃnāgu ǃnâ nî sī tsî gu nî ǃaruǀî mû si ǁoas kōse gere kō.
11 ǃGoaǃnāgu ǃnâ ra garu hîa ra ge Asiriaǁî toroǃkhamaogu, ǁnā ǀkhariba gere ǃûigu ǀkha ge ǀhao. 12 ǁÎgu ge Juditsa ǃkhōsis ǃnâ ū tsî “Mâ ǃhaos dis a? Mâpa xus ra hā tsî mâǀîs garu?” ti ge dîǃnâ.
Os ge “Tita ge a Hebreǁî, xawe ta ge Israelǁîna xu go ǃkhoeni, Elob nî sado ǁîna hîkākāsa mā-am xui-ao. 13 Tita ge Holoferneb, sago toroǂnubis di ǃkhōdana-aoba ǀhao-ū tsî ta ǁîba ǂhâǂhâsa ǂanǂansa nî māse garu. Tsî ta ge ǁîba ǂhanu daob hîab sîsenū tsî ǀgui ǂoaǃnâ-i tsîn ose hoaraga ǀkhariba gaoǂam ǁkhāba ra ǁgau ǂgao” ti ge ǃeream. 14 Kaises ge îsa i xui-ao gu ge nē khoega ǁîsa ge kōmâ. ǁÎgu ge ǁîs ǂhôasa ǃgâ tsî ge mî: 15 “Sas ge nēpas go ǃnoesase sige toroǂnubis ǃkhōdana-aob ǃoa ǀkhīo, sa ûiba go sâu. ǃHaese ǁîb di tentoms ǃoa ǃgû. ǀNîgu sige digu ge sasa ǁnāǀî ǁnū tsî ǁîba nî sī mâi-aiǃâ. 16 ǁÎb ǀkhas ga ǀhao, os ǁîba nî ǃao ǃkhais ge ǂhâbasa tama hâ; siges go mîban ǁkhāna ǁîba mîba, ob ge ǃgâise nî sîsenū si.” 17 ǁÎgu ge ǁîga xu ǀguikaidisi toroǃkhamaoga, Judits tsî ǁîs di khobos hâra gu Holoferneb di tentoms ǃoa nî ǃgû-ūse ge ǁhûi.
18 ǁNāpab ge kai ǁkhôasasiba Asiriaǁî toroǃkhamaogu di hâǃkhaib ǃnâ ge hâ i, Judits hās di ǂhôas tentomsa xu tentoms ǁga ra khoraǂuisen khami. Holoferneb tentoms aiǃâs mâi-aiǃâhesa ǃâumâ hîa gu ge ǂgui Asiriaǁî toroǃkhamaoga hā tsî ǁîsa ge mâǂnami. 19 ǁÎgu ge kaise ǁîs di îsasib xa burugâ tsî tarebe khoeǃnôan a Israelǁîna ǃkhaisa gere buru. “Tari-e nē ǁaes, nēti ī îsa khoede ūhâsa a ǃharaxū ǁkhā?” ti gu ge ǁîǃnābe gere dîgu. “Age hoaraga aorekhoega ǃgam, ǁnā tamas ka io, on ge nē Jodeǁîna ǁnā ǁkhāsib ǃnâ hâ tsî nî ǂnauǂuiǂaiǃnâ ge ǁkhā.”
20 On ge Holoferneb di ǃûi-aogu tsî ǁîb ǂhunuma ǃgān tsîna ǂoaxa tsî ǁîsa ǁîb tentoms ǃnâ ge ǂgâ-ū. 21 Holoferneb ge ǀûitsin di ǀûis, ǂhoaǀapa tsî ǃhuni ǁapan ǀkha ǂgapuhe tsî emeraldǀuin tsî ǀnî ǃgomǀgausa ǀuin ǀkha ge anihe hâ is ǀkha ǃgū-aisa kharob âb ai ge sâǁgoe hâ i. 22 Khoegu xab ge Judits go hā ǃkhaisa mîbahe, ob ge tentoms di ǃaugab ǁga ge ǂoaxa. ǀHaiǀuri ǃamǀaedi ge ǁîb aiǃâ ge gere tanihe. 23 Judits ge Holoferneb tsî ǁîb di khobona ǃgûǃoa, on ge hoatsama ǁîs îsasib xa ge burugâ. ǁÎs ge ǃhūb kōse Holoferneb aiǃâ ge ǃgamǃgâ, xawen ge ǁîb khobona ǁîsa ge huikhâi.
