Gā-aisib ge Israelǁaesa ǃgaroǃhūb ǃnâ-ū ge ǂgaeǂgui
1 Gā-aisib ge ǃanu kēbo-aob ǃnâ-ū ǃgâiǃgâba Israelǁaesa ge hā-ūba. 2 ǁÎn ge ǃgaroǃhū-i khoe-i xare-i ge ǁanǃnâ tama hâ i-i ǃnâ-u doe tsî khoe-i ge tātsēs tsîna ǂai-e dā tama hâ i ǃkhaidi ǃnâ tentomde ge ǂnaumâi hâ i. 3 ǁÎn ge khākhoen âna mâǃoa tsî ge dan. 4 Sa khoen ge ǁgân geo satsa ǃoa ge ǂgai ǃKhūtse, tsîts ge ǁîna ǃgareǀuiba xu ge ǁgam-e ge dâuǂoaxa kaiba. 5 Tsūǀkhāgu Egipteǁîn ge ǁkhara-ūhe gu ge sa khoena ǃgomsib ǃnân ge hâ i, o ge sâu.
Egipteǁîn di ǁkharab
6-8 Sa khākhoen ge sa khoen di ôaron nî ǃgamhe ǃkhaisa ge mîmā. Sats ge hoaǁae ra dâu ǃāb, ǁîn gere ǁgam-e hōxūba ǀaob ǀkha ge ǀuriǀuri.
Sats ge sa khoena ǃgaroǃhūb ǃnâ, mâtits ge ǁîn khākhoena ǁkhara ǃkhaisats ǁîna nî ǁgause ge ǁgâ kai. Xawe ǃâubasen tama hâ, hîa ǁîna kai ǁgam-e ge mā. 9 ǀKhomma nî ǁgausets ge ǁîna ge ǃâitsâ, xawen ge ǁnāpa xu mâtin ge eloxoresana, ǁînats ge ǁaib ǃnâ ǁkhara, o gere tsâ ǀgauba ge ǁkhāǁkhāsen. 10 Sats ge sa khoena, ǁgûb ra ǀgôan âba ǃâitsâ khami ǁînats nî ǃkhâikhomse ge ǃâitsâ. Xawets ge ǁîn di khākhoena ǁkhō gao-ao-i khami ge ǀgoraǃgâ. 11 ǁÎn ge sa khoen ǀgūsen ga hâs, ǃnūsen ga hâs hoasa hoatsama gere tsâ. 12 ǁÎn di tsûaǂgaob ge ge ǀgamǃnâgu i tsîn ge ī ge xūn ǁgan gere kō-oa, o gere ǃgae. 13 Eloxoresa khoen ge taren ge ǁîn ǀkha ī ǃkhaisan ga ǂâihō, o gere ǃgae. ǁÎn ge ǁkharab hîan ge ǃkhōǃoab ǀguiba ge ǂâihō tama hâ i, xawe ǂhanu-ain ge ǁnāpaxu ǃgâiǃgâ ǃkhaisan ge ǁnâu, ob ge ǁîn di tsûaǂgaoba kaise ge kai i. ǁÎn ge Elob ge nēn hoana dī ǃkhaisa ge mûǂan. 14 Egipteǁîn ge ǁnā khoeb, gaxu ǁae-i ǃkharu hâse ge ǀgôarob ase aoxūhe hâ ib ǀkha ge ǁaeǁaesen ǂgao tama hâ i, xawe xūn gere ǃgâise ǃgû ǀgaub xan ge ǀunis ai ǁîb xa gere burugâ. ǂHanu-ain ge tātsē ǁîn ge ǁgâ khami ǁgâ tama hâ.
15 ǁÎn di ǂkhabusa tsî gâre ǂâidi xa ǂgaeǂhapuhe tsî ǀgaioǃnâ ûitsama xūn, ǀaon tsî ǁau xoxon tsîna gere ǀgoreǀî. ǁNā ǃkhais ǃaromats ge ǁîna kaiǀoadisin nē ûitsama xūn din ǀkha ge ǁkhara 16 tsî ǁoreb di ǁkharab ǁoreb ǂûb ǀkha a ǀguitikō ǃkhaisa ge ǁkhāǁkhā. 17 ǃKhūtse, sa ǀgaib ǀkhats ge ǀkhai ge i xū-e xu ǃhūbaiba ge kuru. Tsî ǁkhā ǀgaib ǀkhats ge ǁîna ǀoadisidi ǃnâ hâ bergu tamas ka io ǁaixa xamgu ǀkha ga ǁkhara hâ. 18 Sats ge ǀasa tsî ǃaoǃaosa ǀgurun, ǀaeǁhabuba ǀomǂui tamas ka io ǃgoro tsî ǃâudi khami ī ǀanna sîǂui tamas ka io ǃaorosa naniga mûde xu ra ǂnoaǂuina ge kuru ǁkhā i. 19 Sats ge nēti ī ǀgurun, khoenan ǁnāǂam tsî nî ǃgamsa ǂhâbasa taman, xawe ǁîna kōs ǀguis ǀkha ǁōb kōse ǃaoǃao ǁkhāna ge kuru ǁkhā i, 20 xawes ge ǁnāsa ge ǂhâbasa tama hâ i. Sats ge ǁîna sa ǀgoraǃgâs ǀkha ǃgôaǃgon, tamas ka io sats ra ǀomǂui ǂoab ǀkha ge hîkākā ǁkhā i. Xawets ge satsa ǁnā xūnats nî ǀnō, ǃgôa tsî ǃgomsiba ǀnō ǃkhaisa ge ǁhûi.
Elob ge Egipteǁîna ra ǀkhomxa
21 ǂGaots ra ǁae-i hoa-i aits ge sa kai ǀgaiba ǁîna ǁgau ǁkhā tsî i ge khoe-i xare-e ǁîba mâǃoa ǁoa. 22 Hoaraga ǃhūbaib ge sa mûǁae ǂkhari tsararo-i, ǀnō-ūdas tsîna gōn kai tama i tsî ǀaub hîa ra ǁgoaga ǃhūb ai ǁnāb khami ǀgui ī. 23 Sats ge mâ xū-i hoa-ets a dī ǁkhā kō ǀgaibats ūhâ, xawe hoana ra ǀkhomxa. Sats ge sida ǁorena kō-īǀkhā tsî ǃhobasens ǁaeba ra mā da. 24 Sats ge hâ a xūn hoana a ǀnam tsîts ge kuruts ge xūn hoana ǃharaxū tama hâ. ǁÎnats ga ǀnam tama hâ, ots ge ǂguro ǃharib ai ǁîna ga kuru tama hâ. 25 Mâti i kha xū-e nî hâhâ, sats ga hâ-i nî ǃkhaisa ǂhâba tama io? Mâti i nî hâhâ, sats ga ǁî-e ǂnubi tama io? 26 ǃKhūtse, sats ge hoan nî hâ ǃkhaisa ge mā-am, ǁîn a sa tsîts mâ ûitsama xū-i hoa-e a ǀnam xui-ao.
