Oniab ôab, Simonni
1 ǀGapipristeri Simonni, Oniab ôab ge pristergu hoagu ǃgâ-ai ge kai i tsî hoa khoen xa ge ǃgôahe hâ i. ǁÎb ge Tempela ǃnaba tsî ǂnubiǂgoagu âba ge ǀgaiǀgai. 2 ǁÎb ge ǃgaoǃgaob ǀgapi ǂnubiǂgoagu dib tsî ǁîgu tawa ge ǀarohe ǂnubiǂgoagu diba ge ǁgui. 3 Simonni ge ǀgapiprister i ǁaeb ǃnâ gu ge Tempeli ǃnâ mâ brons ǁgamxapab kōse kai tsausa ge khao. 4 ǁÎb ge mâtib nî ǁîb di khoena khākhoen ǃoagu ǁkhauba ǃkhaisa ǀape tsî Jerusalems di ǂnubiǂgoaga ge ǀgaiǀgai, în khākhoen ga ǃāsa ǁnāǂamo, ǁîb khoena sâusase hâ.
5 Mâtikōseb ge Hoan xa ǃAnu ǃKhaiba xub ge ǂoaxao, ǂkhaisa i! 6 ǁÎba mûs ge ǃgāsa ǀgamiros ǃâudi ǁaegu ra ǃnâs khami, ǀoasa ǁkhâb khami, 7 sores hîa ra Hoan xa ǀGapib di ǂamai ǃnâs, ǀapiǃhanab ǃâudi ǃnâ ra ǂkhaib, 8 rosǃkhādi, ǁhaoǁaeb ǃnâ, leliǃkhādi ǃāb amǃgâ mâdi, Libanonni sederhaidi, ǁkhûnaǁaeb ǃnâ, 9 ǂhubihe hâ ǃgâihamxūn, ǂnauǂuisa ǃhuniǀurib ǀkha kuruhe tsî ǃgomǀgausa ǀuin ǀkha anihe hâ xapas, 10 ǃgâise ǂûtani hâ ǀkherahais, ǃâudi ais ra tsâǀkhā kōse ǀgapi sipreshais khami ī.
11 Simonni ge ǁîb îsa anaǂamsaraba ǂgaeǂgā tsîb ga ǂoaǂamsase anasen hâse ǃanu altars ǃoa ǃgû, o Tempeli di omǂnamiba ǂkhaisase ra mûsen kai. 12 Altars tawab mâ hîa gu ge nau pristerga ǁguibadi ǃâna, ǂhubib nîga mā bi tsî gu ge ǁîb ǃgâsaga ǁîba ǂgapusa ǃkhādi khami mâǂnami, ob ge Libanonni di ǂkham sederhais, palmhaidi xa mâǂnamihe hâs khami ge ī i. 13 ǁNāgu ge Aronni ôananôagub di pristergu, ǁîgu îsa sarana ana tsî ǃKhūb nî ǁguibahe ǁguibade ǃomǁae ūhâse, hoaraga Israelǁîn di ǀhûhâsib aiǃâ mâga. 14 ǃOabas ǀkhab ge altars ai toa tsî ǁguibasa Hoan xa ǀGapib, Hoaǀgaixab ǃaroma ǂhomi, 15 ob ge xapasa ū tsî ǃgâise ra ham ǂauxûi-e, Hoan xa ǀGapib, Kurus di Gao-aob ǃaroma, ǁguibas ase altars ǂai-am ge ǂnâǂui. 16 ǁNās khaoǃgâ gu ge Aronni pristerga ǃau tsî ǁîgu xâiǁnâdi hîa ǂnauǃgâiǃgâihe hâ ǀhaiǀurib ǀkha kuruhe hâde ge ǃnâi. ǁÎgu ge kai ǀōba Hoan xa ǀGapib nî ǁnâuga gere dī. 17 On ge hoa khoena ǃnoeǃnoesen tsî ǁîn di ǃKhūb, Hoaǀgaixab, Hoan xa ǀGapiban nî ǀgoreǀîga ǃhūb kōse ge ǃgamǃgâ. 18 ǁNae-aogu ge ǁkhoaxa tsî ǀoasa ǁnaeǀgaub ǃnâ ge koaǁnaeba bi. 19 Khoen ge ǀû tamase ǁîn ǀkhomxaǃnâ ǃKhūb, Hoan xa ǀGapib ǃoa ǀgoreǀîǃoabas nî toas kōse gere ǀgore. 20 Ob ge Simonna altarsa xu ǁgôaxa, ǃomkha hoaraga Israelǁîn ǂama ǀhōǂui tsî ǃaoǃgâxase ǃKhūb di ǀkhaeba ge gowaǂui. 21 Tsîn ge Hoan xa ǀGapib di ǀkhaeba nî ǃkhōǃoase, ǀgamǁî ǃnāsa ǀgoreǀîrase ge ǃgamǃgâ.
ǀKhaeb
22 A da nēsi Elob, hoa xūn Kuru-aob, hoa ǃkhain ai ge buruxa dīna dība koa. ǁÎb ge ǃnae da ge ǁaeba xu ǃgôasiba mā tsî ge ǀkhomxa da. 23 Ab ǃgâiaǂgaob tsî ǀamo ǂkhîba Israelǁaes ǃnâ māda. 24 Ab sida ǃaruǀî ǀgui ǀkhomxa tsî ǂhâsib ǁaeb ǃnâ huiǂuida.
ǃNona ǃhuisahe ǃhaodi
25 ǀGam ǃhaora ge hâ, tita xa ǃhuisahe ra tsî ǃnonaǁîs ge ǃhao-i tis tsîna ǂgaihe ǁoa. 26 ǁNān ge Edomǁîn, Filisteǁîn tsî gâre Samariaǁîn tsîna.
Siraxi ôab Jesub di gā-aisib
27 Tita Jesuta, Sirax Eleasari ôata, Jerusalems dita ge ti gā-aisib hoaba, nē ǂkhanisa xoas ǃnâ ge sîsenū, ǁgauǃnâs tsî ǂans tsîna ta ǀnî khoena nî māse. 28 Ab Eloba ǁnān, nē ǁkhāǁkhādi ai ǂâisa ra ǂnûina ǀkhae. Nēna ǂgomǂgomsase ra sao-i hoa-i ge nî gā-ai. 29 Nēna ra dī-i hoa-i ge ǃKhūb di ǃnâb ǃnâ i ra ǃgû xui-ao, hoa xūn ǃaroma nî ǀgaisa.
