ǁGûgu di ǃgôasib ǃoa hâ ǁnaetsanas
1 ǁNā-amaga a da nēsi eloǃaoǃgâxa khoega koa,
sada aboxagu, ǀnai ge ûi hâ iga.
2 ǁAeb di tsoatsoasa xu gu ge ǀnai ǁkhara aoga ge hâ i,
ǃKhūb di ǂkhaisib ǂûb ge ǁîgu ǃnâ mûhesa iga.
3 ǁNāpa gu ge ǀnîgu, gao-ao ge īga ge hâ i,
tsî ǀnîgu ge ǁîgu di ǁkhoaǂgaoxasib ǃaroma ge ǂansa i.
ǀNîgu ge ge gā-ai ǀapemā-ao i,
tsî gu ge ǀnîga gere kēbo.
4 ǀNîgu ge ǁîgu di khoen di ǁnaetiga ǃgâise ge ǂan i,
ǁîgu ge ǁîna ǃgâi ǀapemādi ǀkha mâxōǀkhā,
tsî ǁîna gā-ai mîdi ǀkha gere ǁkhāǁkhā.
5 ǀNîgu ge ge ǀgaipetsana xoa-ao i;
tsî ǀnîgu ge gere ǀkhō.
6 ǀNîgu ge ǃkhū tsî ǁkhāsiba ūhâ
tsî ǂkhîb ǃnâ ǁîgu omdi ǃnâ ge ǁan hâ i.
7 Nē khoegu hoagu ge ǃgôasiba ûiǁaeb ǃnâ gere māhe;
ǁîgu ge ǁîgu di tsēdi di kai khoe ge iga.
8 ǀNîgu ge ǂanǂansasiba ge ǃgoro,
tsîn ge khoena nētsēs kōse ǁîga ra koa.
9 ǀNîgu ge khoen xa ǂâihes tsîna hîhe tama hâ,
tātsē gu ge ûi tama hâ i xū-i khami;
ǁîgu ge ǁō tsî ge ǀuruhe,
ǁîgu tsî ǁîgu ôan tsîna ǁîgu khaoǃgâ.
10 Xawe nēb ge ǂgaekhâib, ǃKhūb ǃoagu ge ǂgomǂgomsa i khoegu,
ǁîgu di ǂhanu-ai sîsengu tātsē ǀuruhe tamagu diba.
11 ǁÎgu ge ǁîgu di ǂanǂansasiba ǁîgu di ôananôagub ǁga ge māǃkharu;
tsî ǁnās ge ǃkhū hâ ǀumisa.
12 ǁÎgu di ôananôagub ge hoaǁae ǃgaeǀhaosa ǃKhūb ǀkha ge ūhâ i;
tsîn ge ǁnāsa ǂgomǂgomsase, ǁîn aboxagu di ǃgôasib ǃoa nî dī.
13 ǁÎgu ge ôan, ǁnurisan tsî ǁnurisan ôan tsîna ǀamose nî ūhâ;
xū-i xare-i ge tātsē ǁîgu di ǂanǂansasiba hîkākā tide.
14 ǁÎgu di sorodi ge ǂkhîb ǃnâ sâ hâ;
tsîn ge khoena ǀamose ǁîga ǃgôasiba nî mā.
15 Nau ǁaedi ge ǁîgu di gā-aisib xa nî ǃhoa;
tsî ǃKhūb di khoen ge ǁîga nî koa.
Henoxi
16 Henoxi ge ǃgoaxa surib di khoena ǁoreba xu ǃhobasens di aiǁgause ge iba i. ǃKhūb ge kaise Henoxi ǀkha ge ǂkhî i tsî ǁîba ǀhommi ǃoa ge ūǃapa.
Noaxi
17 Noaxi ge ǀoasase Eloba ge ǁnâuǀnam hâ i. ǁÎba xub ge khoesiba ǃKhūb ge ǁaixa tsî kai ǁgamma ǃhūbaiba nî hîkākāse sî, xawe khoesiba ǃhūbaib ai ge aiǃgû. 18 ǃKhūb ge ǁkhawab ûiba tātsē ǁgammi ǀkha hîkākā tide ǃkhaisa ge mîmâi.
Abrahammi
19 Abrahammi ge ǂgui ǃhaodi di aboxa ge iba; ǀgui khoe-i tsîn ge ǁîb khami ge ǂanǂansa tama hâ i. 20 ǁÎb ge ǂhanub Hoan xa ǀGapib diba ǃkhōǀgaipe tsî ǃgaeǀhaos, ǁîb di soros ai ge saohe hâ isa ǁîb ǀkha ge dī. ǃÂitsâheb ge ob ge ǂgomǂgomsase ge hōhe. 21 ǁNātib ge ǃKhūba, Abrahamma ǁîb di ôananôagub nî ǃhūbaib di khoen hoana ǀkhaeb ase ība; ǁîn di ǃgôab ǃhūbaib di tsarab khami nî ǃgôaheǁoasa; tsîn ǃnāsa ǃgôasiba ǃhūbaib ai hâ khoen hoan ǃgâ-ai nî ǃkhōǃoa tsîb nî ǃKhūba ǁîn di ǃhūba huriba xu hurib kōse tsî Eufratǃāba xu ǃhūbaib di ǀkhâuǀams kōse nî khoraǂui, ti ge nūba.
Isaki tsî Jakob tsîkha
22-23 ǃKhūb ge ǃgaeǀhaosa Isaki tsî ǁnās khaoǃgâ ǁkhawa Jakob ǀkha, Abrahammi di ôananôagub nî ǀkhaeb ase hoa khoena ība ǃkhaisa ra ǁguiǃgâse ge ǀasaǀasa. ǃKhūb ge Jakobab nî ǀkhae ǃkhaisa ge ǁapoǁapo; ǁîb ge ǁîb di ǂhunuma nî ǃhūba ge mā bi, disiǀgamǀa ǃâdi ǃnâ ǀgoraǂgāsaba, ǀgui ǃâsa mâ ǃhaos hoas ǃaroma.
