1 Hoaǀgaixa ǃKhū, sida aboxagu Elotse,
Abrahammi, Isaki tsî Jakob tsîgu Elotse,
ǁîn ǂhanu-ai ôananôagub Elotse,
2 sats ge hoa xūn
tsî sa ǂkhaisib ǁîna ge ǀoaǀoab tsîna ge kuru.
3 Hurib ge sa mîmāsa ra ǁnâuǀnam
tsî tātsē ǁîb ǀgorade dâuǂam tama hâ.
ǀGaib sa buruxa tsî ǂkhaisa ǀons dib
ge hurib ǃgamsiba ǁîb ǃkhaib ai ra ūhâ.
4 Sa ǀgaibats ga ǁgau,
os ge hoaraga kurusa ra ǀkhū.
5 Sa ǂkhaisib ge ra ǃnāǂam
tsî sa ǁaib ge ǁore-aon nî mâǃkharus xa a ǃnāsa.
6 Xawe sats ra mîmâi ǀkhommi ge
sida ra ǂâi tsî ǀnōs xa a kai.
7 Sats ge Hoan xa a ǀGapi ǃKhū;
xui-aots ge ǃnūǃnâxa tsî ǀkhommi tsî tsâbaǁhaoxasib tsîna ra ǁgau.
Sats ge sida ǁkharaba tani ǁkhā da nîse ge supusupu
sida ǁoren ǃaroma da ra tsâ xui-ao.
ǃKhūtse, sa kai ǃgâisib tsî ǀkhommi ǃnâts
ge ǀûbas tsî ǃgâiǃōsib tsîna
ǁnān, ǁoren âna xu sa ǃoa ǃhobasenna ge mîmâiba.
8 Sats ǃKhūts ge ǂhanu-ai khoen di Elo.
ǃHobasens ge Abrahammi, Isaki tsî Jakob tsîgu ǃaroma,
ǁîgu ge sa ǃoagu ǁore tama hâ i xui-ao
ge ǂhâbasa tama hâ i.
Xawe tita khami ǁore-aon ǃaromats
ge ǃhobasensa ge īǁkhā kai.
9 Tita ge ǃnāsa ǁorena
hurib ǀnomammi di ǀgopab xa ge dī.
ǁÎn ge kaise a ǂgui, ǃKhūtse, ǁîn ge kaise a ǂgui.
Tita ge kaise ǂgui tsū xūna ge dī
tsî ta ge ǁnās ǀkha anu tama ǀhommi ǃoa kōǃapasa.
10 Tita ge ti ǁoreb di ǃgommi ǃnaka ǂkhūǂkhūhe hâ.
Tita ge ǁîb ǃgom ǀuri khedegu xa ǃhonhe hâ.
ǀOmǂnûisoa-i tsîna ta ge satsa
ta ge ǁaiǁai xui-ao hō tama hâ.
Tita ge ǁgôa-elona mâ ǃkhai-i hoa-i ai ge mâi.
Sats ǃhuisanna ta ge ge dī.
11 Xawe ta ge nēsi ǃgamǃgamsens ǀkha sa aiǃâ ra ǃgamǃgâ,
tsî sa ǀkhommi ǃaroma ra ǀgore.
12 Tita ge ge ǁore, ǃKhūtse, tita ge ge ǁore;
tsî ta ge ǂkhaba xūn hîa ta ge dīna ra ǁguiǁnâ.
13 ǀKhoma tsi ta ra, ǃKhūtse, ǀgaisase ta ra ǀgore;
ǀûba te re, ǀûba te re.
Tā ti ǁoren ǃaroma hîkākā te;
tā ti ǀkha ǀamose ǁaixa
tamas ka io ǁkharaba ti ǃaroma sâu.
Tā ǁōb ǃoa ǀgoraǃgâ te,
îts ǃKhūtse, ǁnān hîa ǃhobasen hânna ǀûba.
14 Sa hoaraga ǀkhommi tsî ǃgâisib tsîna ǁgau te, î sâu te re,
anu tama ta ga i xawe.
15 Tsî ta ge satsa koas ǀkha ûi ta hâs kōse nî aiǃgû.
Hoa ǀhomsi ǀgaigu ge satsa koatsana-e ra ǁnaeba
tsîb ge sa ǂkhaisiba ǀamose ra hâhâ. Amen.
