Holoferneb ge Juditsa ra ǁkhoreǁhare
1 Ob ge Holoferneba Judits ǃoa ge mî: “Tā ǂâiǂhansen re, ǃaos nî ǃkhais ge ǂhâbasa tama hâ. Tita ge Nebukadnesari, hoaraga ǃhūbaib di gao-aoba ra ǃoaba khoe-e tātsē ge tsûtsû tama hâ i. 2 Sa khoen, ǁnā ǃhomgu ǃnâ hân ga ǃgôasiba ǁgau te hâ, os tsîna ta ge tātsē ti ǁhâigôaba ǁîn ǃoagu ga ūkhâi tama hâ. ǁÎn ge ǁî-aitsama nēn hoana ge ǃaroma. 3 Xawe tare-i ǃaromas go ǁîna xu ǃgû tsî sida ǃoa hā ǃkhaisa mîba te re? Nēpas ge a ǃnorasa tsî i ge ǃaos nî xū-e a ǀkhai. Sige ge sa ûiba nēǃoe go sâu tsîs ge ǀguis khami ī ǃao-i ǃnâs tsîna ǃgoaxaǁaeb ǃnâ hâ tide. 4 Nēpa hân di ǀgui-i tsîn ge ǂkhôa si tide. Hoan ge ti ǀhonkhoeb, gao-aob Nebukadnesari di ǃgān ra ǃkhōǂhomihe khami ǃgâise nî ǃkhōǂhomi si.”
5 Os ge Juditsa, Holoferneb ǃoa ge mî: “Ti ǀhonkhoetse, mā-am te re, î ta sats ǀkha ǃhoa, î toxopa tare-e ta ra mîsa ǃgâ te re, amaba ta ra mîba tsi ǂgao xuige. 6 Ti ǀapemāsats ga ūǃoa, ob ge Eloba, kai xūnats nî sīǃnâse satsa nî sîsenū, tsîts ge sa ǀapes ǃnâ nî ǃgâiǃgâ. 7 Nebukadnesari ûi hâ ǃkhais ao ta ge ra mîba tsi. ǁÎb ge hoaraga ǃhūbaiba ra ǂgaeǂgui tsîts ge hoaraga ûitsama xūna ǁîb ǂgaeǂguis ǃnaka ge mâi. Sats ge khoen ǀguin ǁîba nî sîsenbas ose, xawe ǁkhātin hoaraga ǀgurun tsî xamarin, ǂgārisa xūn tsî ǀhommi anin tsîna ǁîba nî ǁnâuǀnam ǃkhaisa ge ǃaroma. Satsa xun ge Nebukadnesari tsî ǁîb di gaosib hoaragaba nî ǃgâiǃgâ. 8 Sida, Israelǁîda ge ge ǁnâu, mâtikōsets satsa gā-aisib tsî ǂans tsîna ūhâ ǃkhaisa. Hoaraga ǃhūbaib ge ǁkhoaǂgaoxa ǃkhōdana-aots a tsîts ǃnāsa ǂans tsî ǁkhāsib tsîna nē hoaraga Asiriagaosib ǃnâ ūhâ ǃkhaisa a ǂan.
9 “Axiori ge Betulias khoegu xa ge huiǂuihe tsîb ge tarenab ge toroǀapemāǃnans ǃnâ mî ǃkhaisa sida ge mîba. 10 ǃGôahesatse, tā toxopa supuse Axiori ge mîba tsi xūna ū, î ǁîna ǁkhōǁkhōsase ūǃoa, aman a xuige. Sida ǁaes ga ǁîn Elob ǃoagu ǁore tama io, os ge ǁkharahe tamas ka io gôaba ǁîn ǃoagu ūkhâihe ǁoa.
11 “Xawe sats ge ǀguis khami ī ǂoaǃnâ-e hōǃâ tsî ǁkhāti sa ǂâisa sīǃnâsa tôasi tide. Israelǁîn ga ǁore tsî ǁîn di Eloba ǁaiǁai, on ge nî ǁō. 12 ǁÎn ge ǀoro ǂûn tsî ǁgam-i tsîn ǀguina ūhâ tsî sao rasen ge ǂgarin hâ xūnan nî ǂû ǃkhaisa ge mîǁgui; ǁnā ǃâdi Elob ǂhanub ra ǁîden nî ǂû ǃkhaisa ǂkhādi tsîna. 13 ǁÎn ge ge mîǁgui, ǂguro ǃgaosa xu ǂnûiǂuihe hâ ǃhoron xa ǂû, tsîn disiǁîǃâs ǂauxûib tsî oli-i dis hîa ǃanu tsî pristergu, Eloba Jerusalems ǃnâ ra ǃoabagu ǃaroma sâuhe hân xa nî āsa. Nau ǃâb sida dib ge nē ǃanu ǂûna tsâǀkhās xawesa a ǂkhāsa, 14 xawe Jerusalems khoen ge ǀnai nē ǂhanuba a khôa, xui-aon ge sida ǃās khoena sîsabena, ǁîn tsîn ǁnāti dī ǁkhā ǃkhais di mā-amsan nî hōga, Jerusalems ǃnâ ǂnôa ǀApemāǃnans ǃoa ge sî. 15 Nē sîsabeb ra ǂhôas ǀkha oahā tsēs ǁkhās ain ge Betulias khoena nē ǂûna nî ǂûtsoatsoa tsîb ge Eloba ǁîna sa ǃomǁae nî māǁnâ, îts ǁîna hîkākā. 16 Nē xūna ta ge ǁnâu, o ta ge ti ǃhaosa xu ge ǃkhoeni. Elob ge tita sats ǀkha ta hoaraga ǃhūbaiba nî burugâ kai xū-e nî dīse ge sî. 17 ǃGôahesatse, tita ge eloǃaoǃgâxa tarekhoeta. Tita ge ǀhommi di Eloba tsēb tsî tsuxuba ra ǀgoreǀî. Tita ge nēpa sa ǀkha nî hâ tsî ta ge Elob ǃoa nî ǀgorese mâ tsuxub hoaba ǃgoaǃnāb ǃoa nî ǁgôa. ǁÎb ge Betulias khoen ga ǁore, o nî mîba te. 18 Tsî ǂanǂui ta kao, o ta ge oahā tsî nî mîba tsi tsîts ge hoaraga toroǂnubis ǀkha a ǃgûǂoa ǁkhā. Israelǁîn ge satsa ǃkhamǃoasa ǁkhāba tide. 19 Tsî ta ge Judeab ǃnâ-u Jerusalems tawa da nî sīs kōse nî ǂgaeǂgui tsi, ǁnāpa ta ge ǃās di ǁaegub ǃnâ gao-aose nî mâi tsi. Sats ge Jerusalems khoena ǃûi-ao-e ūhâ tama gūn khami nî ǀgaruǀgaru. Elob ge nē xūna tita ge ǂhaiǂhaiba tsî satsa ta nî mîba ga go sî te.”
20 Holoferneb tsî hoaraga ǃgān ge Judits ge mîn ǀkha ge ǂkhîǂâixa i tsî ǁîs di gā-aisib xa gere buru. 21 O gu ge ǁîǃnābe “ǁÎs ge ǃhūbaib ǃnâ tarekhoedi hoadi xa gā-ai tsî îsa tarekhoesa” ti gere mîǀîgu.
22 Ob ge Holoferneba ǁîs ǃoa ge mî: “ǃGâi i ge a Elob ge sasa nēǀî a sî tsîs go dansa hā-ūba da ǃkhaisa, î da ǁnān Nebukadnesara ge ǃkhāǃkhāna hîkākā.” 23 Îsas ǀguisas ge hî tama, xawes ge gā-aises tsîna khoen ǀkha ra ǃhoa. Tsî mîmâis go khamis ga dī, ob ge sa Eloba nî ti Elo. Sas ge gao-aob Nebukadnesari gao-ommi ǃnâ nî ǁan tsî hoaraga ǃhūbaib ǃnâ nî ǂansa.
