Nebukadnesari tsî Arfaksad hâkha ǁaegu hâ torob
1 Gao-aob Nebukadnesari ǁîb danaǃās, Ninevesa xu Asiriaǁîna gere ǂgaeǂgui ǁaeb ǃnâb ge gao-aob Arfaksada ǁîb danaǃās Ekbatanasa xu Medeǁîna gere ǂgaeǂgui. 2 Gao-aob Arfaksadi ge Ekbatanas ǂnamipe ǃnonadisi meterga ǀgapi tsî ǀgamdisiǀgamǀa meterga ǁau ǂnubiǂgoaba, ǁhāǂuisa ǀuidi ǀkha ge ǂnubi. Mâ ǀuis hoas ge ǀguikaidisiǃnonadisi sentimeterga ǁau tsî ǀgamkaidisiǃnanidisi sentimeterga ge gaxu i. 3 Mâ ǂgâdaos hoas tawab ge ǂgō-ommi, hakadisihakaǀa meterga ǀgapiba, ǀgamdisiǃnaniǀa meterga ǁau ǃgaoǃgaob ai ge om. 4 Mâ ǂgâdaos hoas ge ǃnonadisi meterga ǀgapi tsî disiǁkhaisaǀa meterga ge ǂhaba i, ǁîb di hoaraga toroǂnubis tsî ǀnūtoroǃkhamaogu tsîgu saogu hâse ǃkharuǃnâ ǁkhāse.
5 Disiǀgamǀaǁî kurib, ǁîb ǂgaeǂguis dib ǃnâb ge gao-aob Nebukadnesara, gao-aob Arfaksadi ǃoagub, hara ǂgāb Rages ǃauga ǁgoeb ai nî torodīse ge ǂoa. 6 ǂGui ǁaedi ge ǁîdi toroǂnubide gao-aob Nebukadnesaran Arfaksadi ǃoagu torob ǃnâ nî huise ge sî, hoa khoen ǃhomgu ǃnâ ge ǁan hâ in, Tigris tsî Eufratǃākha tsî Hidaspes xōǀkhā ge ǁan hâ in tsî ǁkhāti ǁnān hîa gao-aob Arioxi, Elims dib xa ge ǂgaeǂguihe hâ i ǂgāgu ǃnâ ge ǁan hâ in tsîna. Nē toroǃkhamaogu hoagu ge Nebukadnesari tsî ǁîb di Xaldeaǁîtoroǂnubis ǀkha ge ǃgû.
7 Ob ge gao-aob Nebukadnesari, Asiriaǁîn di gao-aoba, Persiaǁîn tsî Asiriab huriǂoasǀkhāb di khoen hîa Silisiab, Damaskus, Libanonni tsî Antilebanonni ǀkharigu ǃnâ ǁan hân tsî ǁnān huri-ammi ai hân 8 tsî Karmelǃhommi, Gileadǀkharib, Galileab ǀapasǀkhāb tsî Jesreelǃgoaǃnāb ǃnâ hân tsîna ge haisiba. 9-10 Nē haisis ge ǁkhāti Samariab tsî ǂnamipe ǁgoe ǃādi khoen ǃoa, ǁnān hîa ǀapas ǀkharib Jordanǃāb, Jerusalems, Betanis, Selous, Kades tsî Gosenǀkharib ǃnūsib kōse ge ǂoa. Nē haisi-ams ge ǁkhāti Egipteǁîn ǃādi Tapanhes, Rameses, Tanis, Memfis tsî Nylǃāba xu Etiopiab ǃhūǀgoras kōse ge sī. 11 Xawen ge hoaraga khoena Asiriaǁîn di gao-aob Nebukadnesari di ǂgansa ūǃoa tama ge i tsî torob ǃnâ ǁhaosa ge ǂkhā. ǁÎn ge toroba dans ǃē-eb ūhâ tama ti ǂâi tsî ǁîb di sîsabega taotaosase tsî ǀkhaiǃomse ge sî-oa.
12 Nē ǃkhais ge gao-aob Nebukadnesara kaise ge ǁaixa kai tsîb ge ǁîb gaosib ǃaromab Silisiab, Damaskus, Siriab, Moab, Judab tsî Egipteb ǃnâ hâ khoen hoana ǀkhao tsî nî ǃgam ǃkhaisa ge nū. Mediteraneahuriba xu Persiahurib kōse hân hoana ǃkhōǂgā hâse. 13 Disihûǀaǁî kurib ǁîb ǂgaeǂguis dib ǃnâb ge gao-aob Nebukadnesara ǁîb toroǂnubisa Arfaksadi ǃoagu nî torodīse ge ǂgaeǂgui. ǁÎb ge Arfaksadi ǀgaib, ǁîb di hātoroǃkhamaogu tsî hākuniǃnari-aogu hoaga ǃkhōǂgā hâb hoaragaba ge hîkākā. 14 ǁNās khaoǃgâb ge Nebukadnesara Mediaǃhūb ǃnâ hâ ǃādi hoade ge ǁkhâuǁnâbasen. Tsîb ge aiǃgû tsî Ekbatanas ǂgō-omga ū, ǁamaǂharuguǃkhaiga hîkākā tsî nē ǃās di îxasiba taosib ǃnâ ge mâi. 15 ǁÎb ge gao-aob Arfaksada Rages ǂnamipe ǁgoe ǃhomgu ǃnâ ǃkhō tsî ge ǃgam. Arfaksadi ǁōb khaoǃgâb 16 ge Nebukadnesari tsî ǁîb hoaraga toroǂnubis tsîna torob ǃnâb ge ǁkhâuǁnâ xūn hoan ǀkha Nineves ǁga ge oa. ǁNāpa gu ge sâsase hâ tsî haka ǁkhâgu ǁaeba ge ǁâudī.
