Egaluko lyomukulukadhi gwokuShunem
1 Elisa okwa lombwele omukulukadhi gwokuShunem, ngoka a li e na omwanamati a yumudhwa, kutya na tembukile negumbo lye shaa mpoka taa vulu okuhupila, oshoka Omuwa ota tumine oshilongo ondjala yekomba, ndjoka tayi ka kala omimvo heyali. 2 Omukulukadhi okwa landula omayele gaElisa e ta yi negumbo lye, ya ka kale muFilistia omimvo heyali.
3 Pehulilo lyomumvo omutiheyali okwa galukile kuIsrael e ta yi komukwaniilwa neindilo, a galulilwe egumbo lye nepya lye. 4 Okwa adha omukwaniilwa taa kundathana naGehasi, omupiya gwaElisa. Omukwaniilwa okwa li a hala okutseya iinyengandunge yaElisa. 5 Gehasi manga ta hokololele omukwaniilwa, nkene Elisa a yumudha omusi, omukulukadhi okwe ya pomukwaniilwa. Gehasi okwa ti komukwaniilwa: “Nkeyama, nekulu oye nguka nomwanamati oye nguka ngoka a yumudhwa kuElisa.” 6 Mokuyamukula omapulo gomukwaniilwa omukulukadhi okwa koleke ehokololo lyaGehasi, nonkee omukwaniilwa i ithana elenga lye limwe e te li lombwele, li mu pe iinima ye ayihe mwa kwatelelwa ondjundo yiikwakuliwa ayihe ya menene mepya lye momimvo ndhoka heyali, sho a li a tembuka moshilongo.
Elisa nomukwaniilwa gwaSiria Benhadad
7 Elisa okwa yi kuDamaskus pethimbo ndyoka omukwaniilwa gwaSiria Benhadad a li ta alukwa. Omukwaniilwa sho a lombwelwa kutya oku na Elisa, 8 okwa ti kelenga lye Hasael: “Faalela omuhunganeki omagano, ngoye u mu lombwele, a pule Omuwa kutya ote kala po ngiini? Otandi ka aluka tu?” 9 Hasael okwa kutile oongamelo omilongo ne omaliko guuyamba waDamaskus e ta yi kuElisa. Hasael sho e mu tsakaneke, okwa ti: “Omuntu gwoye Benhadad okwa tumu ndje, ndi ku pule kutya ota ka aluka tu kuuvu we”.
10 Elisa okwa yamukula a ti: “Omuwa okwa hololele ndje kutya ota si, ihe inda kuye, u mu lombwele kutya ota aluka.” 11 Nena Elisa okwe mu tongolola nomeho guutile, sigo Hasael ta ngwangwana. Ohaluka Elisa okwa tameke okulila omahodhi omapyu. 12 Hasael okwa pula a ti: “Tatekulu, omolwashike to lili?”
Elisa okwa yamukula a ti: “Omolwashoka te tseya iihuna mbyoka to ka ningila Aaisraeli. Omapopilongulu gawo oto ke ga fika po, to dhipaga aagundjuka yawo yo opala negongamwele, aanona yawo oto ke ya nyanyagula po ya se, aakulukadhi yawo aasimba oto ke ya vutula.”
13 Hasael okwa pula a ti: “Otandi vulu ngiini okulonga iilonga yi thike mpono? Kandi na mwago!”
Elisa okwa yamukula ta ti: “Omuwa okwa hololele ndje kutya oto ka ninga omukwaniilwa gwaSiria.”
14 Hasael okwa yi a shuna kuBenhadad, ngoka e mu pula ta ti: “Elisa okwa ti ngiini?”
Hasael okwa yamukula a ti: “Okwa lombwele ndje ta ti, oto aluka.” 15 Ihe esiku lyanofu Hasael okwa kutha ekumbyatha e te li yaya momeya e te li siikile omukwaniilwa komayulu. Osho ngaaka omukwaniilwa a si, naHasael okwa ningi omukwaniilwa gwaSiria.
Joram, omukwaniilwa gwaJuda
(2 Ondjal. 21:1-20)16 Momumvo omutitano gwelelo lyaJoram yaAhab, omukwaniilwa gwaIsrael, Joram yaJehosafat okwa ningi omukwaniilwa gwaJuda 17 e na omimvo omilongo ndatu nambali e ta lele muJerusalem omimvo hetatu. 18 Omunyekadhi gwe okwa li omuna gwaAhab, nokwa landula omapola omawinayi gaakwaniilwa yaIsrael, ngaashi ezimo lyaAhab lya ningile. Okwa yono kOmuwa, 19 ihe Omuwa ka li a hala okuyona po Juda, oshoka okwa li u uvanekele omuntu gwe David kutya oluvalo lwe otalu ka pangela aluhe.
20 Pethimbo lyepangelo lyaJoram Edom okwa tsile Juda ondumbo nokwi ikwaniileke uukwaniilwa we mwene. 21 Onkee Joram a piti mo a yi nomatembakwiita ge agehe kuZair, nkoka omatanga gAaedom ge ya kondeke. Mokati kuusiku oye nomalenga gomatembakwiita ge oye shi pondola okugwaya mo e taa piti mo, naakwiita ye oyi ihana e taa yi komagumbo gawo. 22 Edom okwa li a manguluka mepangelo lyaJuda. Methimbo tuu ndyoka, noshilando Libna osha tsu wo ondumbo.
23 Ashihe shilwe shoka Joram a ningi, osha nyolwa membo lyondjokonona yaakwaniilwa yaJuda. 24 Joram okwa si nokwa fumvikwa mombila yaakwaniilwa moshilando shaDavid, nomwana Ahasia okwe mu landula muukwaniilwa.
Ahasja, omukwaniilwa gwaJuda
(2 Ondjal. 22:1-6)25 Momumvo omutimulongo nambali gwepangelo lyaJoram yaAhab, omukwaniilwa gwaIsrael, Ahasia yaJoram okwa ningi omukwaniilwa gwaJuda 26 mepipi lyomimvo omilongo mbali nambali, nokwa lele omumvo gumwe muJerusalem. Yina oAtalia omuna gwomukwaniilwa Ahab, nomutekulu gwomukwaniilwa gwaIsrael Omri. 27 Ahasia, ngoka a li omutekulu gwomukwaniilwa Ahab, okwa yono kOmuwa a fa naanaa ezimo lyaAhab.
28 Omukwaniilwa Ahasia okwa hangana nomukwaniilwa gwaIsrael Joram, opo ya hingile omukwaniilwa gwaSiria iita. Aakwiita oya pwakele muRamot shaGilead, naJoram okwe ehamekwa molugodhi. 29 Okwa galukile koshilando Jesreel, a ka pangwe iishaho ye, naAhasia okwa yi ko, e ke mu talele po.
© Oshindonga Bible © Bible Society of Namibia, 2008.
