Eimbilo lyaMoses
1 Moses nAaisraeli oyi imbile Omuwa eimbilo ndika tali ti:
“Otandi imbile Omuwa, oshoka okwa mono esindano enene;
uukambe naakayili yawo okwe ya undulile mefuta.
2 Omuwa oye oonkondo dhandje neimbilo lyandje;
oye tuu a hupitha ndje.
Oye Kalunga kandje, notandi mu tanga,
Kalunga katate, notandi mu imbile molwuunene we.
3 Omuwa oye ofule;
edhina lye Omuwa.
4 Aakwiita yAayegipiti nomatembakwiita gawo okwe ga umbile mefuta;
omalenga gawo ga simana okwe ga dhogele mEfuta etiligane.
5 Uulefuta we ya siikile;
oya ka ningina mo sigo okondaandelo ngomamanya.
6 Olulyo lwoye, Omuwa, olwa simana noonkondo;
olwa tetagula aatondi iintimbu.
7 Mesimano lyoye enene owa dhenge aatondi yoye;
ondjahi yoye ya hwama oye ya lungunitha ya fa iiyagaya.
8 Owa fudhile efuta, omeya noga thikama;
oga thikama ga fa omakuma;
ondaandelo yefuta oye ya pontundulu.
9 Omutondi okwa ti:
‘Etha utale ndi ya landule notandi ya kwata po;
otii ka hakana uuyamba,
ndi kuthe shoka nda hala;
otandi pweya mo egongamwele lyandje,
e te kutha po ayihe yawo.’
10 Omuwa, owa fudha lumwe aluke,
nAayegipiti ya kulukile mo;
oya ningine mo ya fa ooshumbu momeya omatilithi.
11 Omuwa, olye ngo e ku fa mokati kookalunga?
Olye e ku fa meadhimo nomuuyapuki?
Olye ta vulu okulonga iinyengandunge niilongankondo e ku fa?
12 Owa ganeke okwooko kwoye kwokokulyo,
evi nolya nina po aatondi yetu.
13 Owa dhiginine euvaneko lyoye,
owa wilike oshigwana shoka we shi mangulula;
koonkondo dhoye owe shi wilike,
u shi fale kevi eyapuki.
14 Iigwana oye shi uvu, oyo notayi kakama;
Aafilisti oya kwatwa kehaluko.
15 Aawiliki Aaedom oya tila;
aalumentu aanankondo yokuMoab otaa kakama;
Aakaanana oya kanitha omukumo gwawo.
16 Ehaluko netilo lye ya lambele.
Omuwa, oya tala oonkondo dhoye
noya pugalala ya kumwa ko,
osigo aantu yoye ya piti taa katuka —
aantu tuu mboka wa mangulula muupika.
17 Owe ya eta mo e to ya tsike kondundu yoye,
ehala ndyoka ngoye, Omuwa, we li ihogololele, li ninge onganda yoye,
otempeli ndjoka ngoye mwene we yi tungu.
18 Ongoye, Omuwa, to kala omukwaniilwa aluhe sigo aluhe.”
Eimbilo lyaMiriam
19 Aaisraeli oye ende mefuta puukukutu. Ihe omatembakwiita gAayegipiti nuukambe wawo naahingi sho ya yi mefuta, Omuwa okwe ya siikile nomeya gefuta.
20 Omuhunganeki omukiintu Miriam, omumwayina gwaAaron, okwa kutha okantunda ke, naakulukadhi ayehe oye mu landula taa hiki uuntunda yo taa tembula. 21 Miriam okwe ya yamukula ti imbi ta ti:
“Imbileni Omuwa,
oshoka okwa mono esindano enene;
uukambe naakayili yawo okwe undulile mefuta.”
Omeya omalulu
22 Moses okwa kutha po Aaisraeli pEfuta etiligane e te ya fala mombuga Shur. Oye ende omasiku gatatu mombuga, ihe inayi itsa nando omeya. 23 Nena oye ya kehala hali ithanwa Mara, ihe omeya gamo omalulu inaa vula nando oku ga nwa. Omolwashoka ehala lya lukwa Mara. 24 Aantu oya ngungutulile Moses noya pula ya ti: “Otatu ka nwa shike?” 25 Moses okwa galikana Omuwa a pwila po, Omuwa nokwe mu ulukile oshiti shoka e shi umbile momeya, nomeya oga ningi omatoye, taga nuwa.
Pehala mpoka Omuwa okwe ya pe iipango, ye yi dhiginine nokwe ya makele. 26 Okwa ti: “Ngele otamu vulika kungame shili mokugwanitha shoka tandi shi tala shu uka e tamu dhiginine iipango yandje, nena itandi mu geele ndi mu undulile nando olimwe lyomomahepeko ngoka nde ga undulile Aayegipiti. Ongame Omuwa, ngoka te mu aludha.”
27 Esiku lyanofu oye ya kuElim, nkoka kwa li oothithiya omulongo nambali nomilunga omilongo heyali. Oyo noya yungu ontanda yawo pomeya.
© Oshindonga Bible © Bible Society of Namibia, 2008.
