Eidhiliko lyashili
1 Igidha mokule, ino mwena! Yelutha ewi lyoye lya fa lyenkuma. Hololela Israel oondjo dhe, naana yaJakob omayono gawo. 2 Oshoka esiku nesiku oyo taa kongo ndje; oya fa ye na uulaadhi okutseya oondjila dhandje, oya fa oshigwana hashi longo uuyuuki noinashi etha iipango yaKalunga kasho. Otaa pula ndje omautho gu uka ya fa ye na uulaadhi waKalunga e ye popepi nayo.
3 Otaa pula taa ti: “Omolwashike tatu idhilike iikulya, ngele Omuwa ine shi ndhindhilika? Omolwashike tatu kala twaa na iikulya, ngele ye ke na ko nasha?”
Omuwa ote ya lombwele ta ti: “Oshili oyo ndjika kutya pethimbo tamu idhilike iikulya, otamu ipyakidhile niinima yeni yene notamu hepeke aalongeli yeni. 4 Mokwiidhilika kweni iikulya otamu tamanana, tamu lokosha notamu kondjithathana. Otamu dhiladhila kutya ogwo omukalo gweidhiliko ngoka tagu pulakenitha ndje omagalikano geni? 5 Uuna tamu idhilike iikulya, otamu ihepeke tamu nyongameke omitse dheni pevi mwa fa omafo gomanenge notamu yala omahahi nokugunda omutoko, mu lale po. Olyo tamu ti eidhiliko ndyono? Otamu dhiladhila kutya otandi li hokwa?
6 “Eidhiliko lyiikulya ndyoka nde li hokwa, olyo ndi: Dhitululeni oongodhi dhuugoyoki, kutululeni oositolopa dhoondjoko ne mu mangulule aahepekwa. Teyeni po oondjoko adhihe. 7 Topoleleni aasindjala iikulya, edhilileni oondjendi oohepele momagumbo geni nokuzaleka aanankayi. Inamu tinda okukwatha aakweni.
8 “Nena uuyelele woye otau tende wa fa eluwa, niilalo yoye otayi ka aluka mbala. Omuhupithi gwoye ote ku kwatele komeho, neadhimo lyOmuwa otali ku gamene konima. 9 Nge to galikana, otandi ku zimine. Ngele to ithana ndje, otandi ku yamukula.
“Ngele to hulitha po omathiminiko, ondhino nomutyanayi kehe; 10 ngele to palutha aasindjala noto ningi nawa mboka ye li muuyina, nena uuyelele otau ku tendele nomilema dhe ku kunduka, otadhi ka shituka oshanga shomutenya. 11 Otandi ke ku wilika aluhe noku ku kutitha nuuwanawa. Otandi ke ku ninga ondjolowele wa kola nawa. Oto ka fa eyana lya kumwa nawa omeya, wa fa oluthithiya lwomeya ihaalu pwine. 12 Aatekulu yoye otaa ka tungulula omakulukuma gonale, otaa ka gongolola omatungo pomahala gago omakulu. Oto ka ithanwa omugongololi gwomakulukuma nomutungululi gwoondjila nomagumbo.”
Ondjambi yokudhiginina Esabati
13 Omuwa ota ti: “Ngele otamu dhiginine Esabati noitamu li yono nokwiipyakidhila niinima yeni yene mesiku lyandje eyapuki, ngele otamu simaneke Esabati olyo esiku lyenyanyu, esiku lya yapulilwa Omuwa, noitamu yi kolweendo nenge tamu longo sha nenge tamu popi oohapu dhiipolopolo, 14 Otamu ka mona enyanyu ndyoka tali zi mokulongela ndje. Otandi ke mu simanekitha muuyuni auhe, notamu ka nyanyukilwa oshilongo shoka nda pele hokulu Jakob. Ongame Omuwa, ongame tuu nda popi.”
© Oshindonga Bible © Bible Society of Namibia, 2008.
