Eyamukulo lyOmuwa kuHabakuk
1 Otandi londo koshungo, ndi tegelele shoka Omuwa ta lombwele ndje nonkene ta yamukula omanyenyeto gandje.
2 Omuwa okwa yamukula ndje a ti: “Nyola nawa miipelende yeloya uundanda wa tonata emoniko ndyoka tandi ku hololele, opo li vule okuleshwa nuupu. 3 Li nyola, oshoka ethimbo lyokutsakanithwa kwemoniko inali thikana manga. Ihe ethimbo otali ya mbala, naashoka tandi shi ku ulukile, otashi ka tsakanithwa. Ngele sha fa tashi dhikala, shi tegelela ashike; otashi ka ningwa. 4 Elaka olyo ndika: ‘Aalunde itaa ka kala ko we, ihe aayuuki otaa ka kala ko, oshoka oyi inekela Kalunga.’ ”
Okugeela uukolokoshi
5 Uuyamba owo efundjaleko. Aanalwiho oyo aainenepeki yaa na evululuko, oya fa eso lyo lyene, ihaa ngungumana. Onkee taa sindi iigwana momusholondondo. 6 Aasindwa otaa ka nyenkela aasindi yawo noku ya hololela, nkene ye ya dhina. Otaa ka tya: “Omwa kutha shoka shaa shi sheni, ihe omwa geelwa. Sigo uunake tamu likola, sho tamu futitha aanangunga yeni kekuni?”
7 Ihe manga inoo shi tseya, ngoye ngoka ho sindi yalwe, oto ka kala moongunga noto ka thiminikwa okufuta ontanitho. Aatondi otaa ke ya notaye ke ku tilitha. Otaa ke ku yuga! 8 Owa yugu aantu yomiigwana oyindji, ihe nena mboka ya hupu ko, otaye ku yugu molwomadhipago ngoka wa ningile nomolwekuni lyoye lyokuthiminika iigwana yomuuyuni niilando yawo.
9 Yaye ngoka ta kongele egumbo lye omaliko ga yugwa nota kambadhala oku li kaleka kokule noshiponga nomupya! 10 Ihe edhiladhilo lyoye olye etele egumbo lyoye ohoni; mokuyonagula po iigwana owi iyetele owala eyonuko. 11 Nokuli oondhopi dhomekuma otadhi ku tamaneke, nomiti dhomoombuli tadhi ku kugile onkugo.
12 Yayee ngoka ta thikameke po oshilando nuukolokoshi note shi tungu nedhipago! 13 Iigwana mbyoka wa sindi, oyi ivulitha miilonga yosima, naashihe shoka ya tungu, otashi ka pya po. Omuwa Omunankondoawike okwe shi longo. 14 Ihe evi otali ku udha okutseya esimano lyOmuwa, ngaashi omafuta gu udha omeya.
15 Yayee ngoka ta nwetha omushiinda she oshitenga shongeyo ye e te mu shundula nota tameke okutantagala a fa onkolwi! 16 Shika otashi ku etele ohoni peha lyesimano. Nangoye wo oto ka nwa e to tantagala. Omuwa ote ku nwetha oshitenga shondjahi, nesimano lyoye otali ka shituka ohoni. 17 Owa keke po omakuti gaLibanon; ngashingeyi ngoye oto ka yonagulwa po. Owa dhipaga iinamwenyo yamo; nena iinamwenyo otayi ke ku halutha. Shika otashi ka ningwa omolwomadhipago ngoka wa ningi, sho wa kondjitha iigwana yomuuyuni niilando yayo.
18 Otashi kwatha shike okusimaneka oshimenka? Osho oshilonga shiikaha yomuntu, noitashi ku lombwele nando osha, iifundja yowala. Kashi na shoka tashi ningile omuumbi gwasho, opo e shi inekele. Osho oshinima shoka itaashi vulu nando okupopya! 19 Yayee ngoka ta lombwele oshiti: “Penduka!” nenge emanya: “Thikama!” Oshikalunga otashi vulu oku ku hololela sha? Otashi vulu okukolongwa noshisiliveli noshingoli, ihe kashi na mwenyo.
20 Omuwa oku li motempeli ye ondjapuki; ayeheyehe kombanda yevi naa tye thilu koshipala she.
© Oshindonga Bible © Bible Society of Namibia, 2008.
