1 Muuyuni waJehoiakim omukwaniilwa gwaBabilonia Nebukadnezzar okwa matukile Juda. Jehoiakim okwa thiminikwa, a igandje kelelo lye, ihe konima yoomvula ndatu okwa tsu ondumbo. 2 Omuwa okwa tumu omatanga ga homata gAababilonia, gAasiria, gAamoabi nogAayammoni, ga kondjithe Jehoiakim noga hanagule po Juda, ngaashi Omuwa e shi lombwelitha aamati ye aahunganeki kutya ote ke shi ninga. 3 Shika osha gwanithwa palombwelo lyOmuwa, opo a geele Aajuda e ya kandule ko koshipala she moluulunde auhe mboka omukwaniilwa Manasse a ningi, 4 ndele unene omolwokudhipaga aantu kaaye na ndjo. Omuwa ina vula nando okukuthila po Manasse molwaambika.
5 Ashihe shilwe shoka Jehoiakim a ningi, osha nyolelwa membo lyondjokonona yaakwaniilwa yaJuda. 6 Jehoiakim okwa si, nomwana Jehoiakin okwe mu landula uukwaniilwa.
7 Omukwaniilwa gwaEgipiti ina pita mo we moshilongo she, a ka hinge iita, oshoka omukwaniilwa gwaBabilonia okwa lala iikandjo mbyoka ya li yomukwaniilwa gwaEgipiti okuza komulonga Eufrat sigo okongamba yaEgipiti muumbangalantu.
Jehoiakin, omukwaniilwa gwaJuda
(2 Ondjal. 36:9-10)8 Jehoiakim okwa li e na omimvo omulongo nahetatu, sho a ningi omukwaniilwa gwaJuda nokwa lele muJerusalem oomwedhi ndatu. Yina oNehushta yaElnatan gwomuJerusalem. 9 Jehoiakin okwa landula oshinkoti shahe e ta yono kOmuwa.
10 Muuyuni we etangakwiita lyAababilonia mewiliko lyomalenga gomukwaniilwa Nebukadnezzar olye ya kuJerusalem e tali shi kondeke. 11 Pethimbo lyekondekela Nebukadnezzar okwe ya kuJerusalem. 12 Nena omukwaniilwa Jehoiakin pamwe nayina, oyanamati, omalenga ge naambala oyi igandja kAababilonia. Momumvo omutihetatu gwepangelo lyaNebukadnezzar okwa fala Jehoiakin onkwatwa 13 e ta fala omaliko agehe gotempeli nogombala kuBabilon. Pahapu yOmuwa Nebukadnezzar okwa tatula iikwaniipangitho ayihe yoshingoli mbyoka ya li ya hambulithilwa otempeli kuSalomo. 14 Nebukadnezzar okwa fala Aajerusalem muupika, aawagona ayehe naanamadhina ayehe, ayehe kumwe omayuvi omulongo. Okwa yi wo nomangomba agehe, mwa kwatelelwa aahambudhi. Aanima yowala okwe ya thigi po, ya kale muJuda.
15 Nebukadnezzar okwa fala Jehoiakin kuBabilon onkwatwa pamwe nayina, aakadhi, omalenga ge naawiliki yaJuda. 16 Nebukadnezzar okwa fala aanenentu ayehe kuBabilon, ayehe kumwe omayuvi gaheyali, omangomba eyuvi, mwa kwatelelwa aahambudhi, ayehe omapenda okuhinga iita.
17 Nebukadnezzar okwa kwaniileke hegona yaJehoiakin, edhina lye Mattania, a ninge omukwaniilwa gwaJuda e ta lundulula edhina lye li ninge Sedekia.
Sedekia, omukwaniilwa gwaJuda
(2 Ondjal. 36:11-12Jer. 52:1-3a)18 Sedekia okwa li e na omimvo omilongo mbali nagumwe, sho a ningi omukwaniilwa gwaJuda nokwa lele muJerusalem omimvo omulongo nagumwe. Yina oHamutal, omuna gwaJeremia gwokuLibna. 19 Omukwaniilwa Sedekia okwa yono kOmuwa, naanaa ngaashi omukwaniilwa Jehoiakim a ningile. 20 Shika osha geyitha Omuwa noonkondo, sigo a kandula ko Aajerusalem nAajuda koshipala she.
© Oshindonga Bible © Bible Society of Namibia, 2008.
