Iita yokukondjitha Aayamaleki
1 Samuel okwa ti kuSaul: “Ngame onda tumwa kOmuwa, ndi ku gwayeke omukwaniilwa gwaantu ye Aaisraeli. Ngashingeyi pulakena shoka Omuwa Omunankondoawike ta ti. 2 Ota ka geela Aayamaleki, molwashoka oohekulu oya kondjitha Aaisraeli, sho ya li taa zi kuEgipiti. 3 Inda, u ka matukile Aayamaleki, u hanagule po thilu ashihe ye shi na. Ino hupitha nando osha; dhipaga aalumentu, aakiintu, aanona nuuhanona; oongombe, oonzi, oongamelo nuusino.”
4 Saul okwa hiya omatanga ge, ga gongale e te ga konakona puTelem: okwa li aakwiita 200 000 ya za muIsrael na 10 000 ya za muJuda. 5 Nena okwa yi naantu ye koshilando shAayamaleki noya langele momulonga gwa pwina. 6 Saul okwa londodha Aakeni a ti: “Zii mo, mu thige po Aayamaleki, opo ndaaye mu dhipage pamwe nayo, oshoka oohokulu oya li ya ningi nawa Aaisraeli, sho ya zi kuEgipiti.”
7 Saul okwa dhenge Aayamaleki ta kondjo ondjila ayihe okuza kuHavila sigo okuShur, kuuzilo waEgipiti. 8 Okwa kwata Agag, omukwaniilwa gwAayamaleki, e na omwenyo, nokwa dhipaga aantu ayehe. 9 Ihe Saul naantu ye oya hupitha Agag noinaa dhipaga oonzi oombwanawa, oongombe dho ondoka, uutana wo opala nuunzona nenge shaa shoka shi na ondilo; oya hanagula po ayihe mbyoka yaa na shilonga noyaa na mwago.
Saul ta kuthwa uukwaniilwa
10 Omuwa okwa ti kuSamuel: 11 “Onde ehama komwenyo, sho nda ningi Saul omukwaniilwa; okwa pilamene ndje noinaa vulika kiipango yandje.” Samuel okwa li a geya nokwa galikana Omuwa uusiku auhe. 12 Ongula sho kwa shi, okwa meneka, a ka konge Saul. Oku uvu kutya Saul okwa yi koshilando Karmel, nkoka i itungile ondhimbulutho, nokwa yi ihe kuGilgal. 13 Samuel okwa yi kuSaul. Saul okwe mu kundu ta ti: “Omuwa ne ku yambeke. Onda vulika kelombwelo lyOmuwa.”
14 Samuel okwa pula a ti: “Ongiini ano, ondu uvite oongombe tadhi komo noonzi tadhi lili?”
15 Saul okwa yamukula a ti: “Aantu yandje oye dhi yugu Aayamaleki. Oya hupitha oonzi oombwanawa noongombe dho ondoka dhokuyambela Omuwa Kalunga koye omayambo, ihe ayihe yilwe otwe yi yono po thilu.”
16 Samuel okwa ti: “Mwena thilu, ndi ku lombwele shoka Omuwa a lombwele ndje uusiku wonena.”
Saul okwa ti: “Lombwela ndje.”
17 Samuel okwa ti: “Nando ngoye oho idhini, ongoye omuwiliki gwomazimo gaIsrael. Omuwa okwe ku gwayeke omukwaniilwa gwaIsrael 18 nokwe ku tumu nelombwelo lyokuhanagula po Aayamaleki mboka aakolokoshi. Okwe ku lombwele, u kondje, sigo we ya dhipaga ayehe. 19 Omolwashike inoo vulika kuye? Oshike wu uluma okuyuga iihakanwa nowa ningi shoka inaashi opalela Omuwa?”
20 Saul okwa yamukula: “Ihe onda vulika kOmuwa. Onda yi, ngaashi a lombwele ndje, onde eta omukwaniilwa Agag nonda dhipaga Aayamaleki ayehe. 21 Ihe aantu yandje inaa dhipaga oonzi noongombe oombwanawa ndhoka ye dhi kwata, ihe oye dhi etelele nkuka kuGilgal, ye dhi yambele Omuwa Kalunga koye omayambo.”
22 Samuel okwa ti: “Omuwa okwa hokwa shike: evuliko nenge omayambo noontselelandjambo? Okuvulika kuye okuwanawa ku vule oondjambo dhoonzi dho opala. 23 Okwaavulika kOmuwa oku thike pamwe nuumpulile, nuutangalali owo ondjo yi shi kuyelekwa nokulongela iimenka. Molwashoka owe ekelehi elombwelo lyOmuwa, naye wo e ku ekelehi waa kale we omukwaniilwa.”
24 Saul okwa yamukula: “Eeno, onda yono. Onda li nda tila aantu yandje nonda ningi shoka ya li ya hala. 25 Ihe ngashingeyi otandi ku indile: dhimina ndje po ondjo yandje e to zimine ndje, tu ye pamwe kuGilgal, ndi ka simaneke Omuwa.”
26 Samuel okwa yamukula: “Itandi shuna nando nangoye. Ngoye owe ekelehi elombwelo lyOmuwa, naye wo e ku ekelehi, waa kale we omukwaniilwa gwaIsrael.”
27 Nena Samuel okwa punguluka, a thige po Saul, ihe Saul okwe mu kwata kelwaakani, olyo nolya tuuka. 28 Samuel okwa ti kuye: “Nena tuu ndjika Omuwa okwe ku kutha uukwaniilwa waIsrael nokwe u pe ngoka u ku vule. 29 Kalunga omupangelinkondo gwaIsrael iha fundju nenge a lundulule omadhiladhilo ge. Ke shi omuntu — iha lundulula nando omadhiladhilo ge.”
30 Saul okwa yamukula a ti: “Onda yono. Ihe simaneka ndje montaneho yaawiliki yaantu yandje nAaisraeli ayehe. Zimina ndje, tu ye pamwe, opo ndi ka simaneke Omuwa Kalunga koye.” 31 Onkee Samuel okwa yi pamwe naye kuGilgal, Saul nokwa simaneke Omuwa.
32 Samuel okwa popi a ti: “Etelii ndje omukwaniilwa Agag.” Agag okwe ya kuye ta kakama kuumbanda ti idhiladhilile ta ti: “Akwetu, okusa oshinima oshitilithi ngiinyee!” 33 Samuel okwa ti: “Ngaashi egongamwele lyoye lya kutha aakulukadhi oyendji oluvalo, osho nena nanyoko na kanithe oluvalo.” Nokwa tetagula Agag iintimbu koshipala sheyambelo muGilgal.
34 Nena Samuel okwa yi kuRama, nomukwaniilwa Saul okwa yi kaandjawo kuGibea. 35 Okuza mpoka Samuel ina mona we Saul, sigo okeso lye, nokwe mu ehamenwa unene. Omuwa okwa li u uvite nayi, sho a ningi Saul omukwaniilwa gwaIsrael.
© Oshindonga Bible © Bible Society of Namibia, 2008.
