David ta gwayekelwa uukwaniilwa
1 Omuwa okwa ti kuSamuel: “Sigo uunake to kala we ehamenwa Saul? Onde mu ekelehi, kaa kale we omukwaniilwa gwaIsrael. Ihe ngashingeyi kutha omagadhi gooholivi, u ye kuBetlehem komulementu edhina lye Isai, oshoka onda hogolola gumwe gwomoyana, a ninge omukwaniilwa.”
2 Samuel okwa pula a ti: “Otandi shi ende ngiini? Saul nge te shi uvu, ota ka dhipaga ndje.”
Omuwa okwa yamukula: “Faalela okatana e to ti kutya oto ka yambela Omuwa ondjambo nkoka. 3 Hiya Isai koshituthi shontselelandjambo notandi ke ku lombwela shoka u na okuninga. Oto ka gwayeka omulumentu ngoka tandi ku lombwele, a ninge omukwaniilwa.”
4 Samuel okwa ningi, ngaashi Omuwa e mu lombwele. Sho a yi kuBetlehem, aawiliki oye ya, ye mu tsakaneke taa kakama taa pula taa ti: “Ombili tuu, tatekulu?”
5 Okwa yamukula a ti: “Ombili. Onde ya okuyambela Omuwa ontselelandjambo. Ilongekidheni, tu yeni pamwe.” Okwa lombwele wo Isai noyana, yi ilongekidhile okuya kontselelandjambo.
6 Sho ya thiki, Samuel okwa mono Eliab lyaIsai nokwa dhiladhila: “Omulumentu nguka a thikama mpaka koshipala shOmuwa, oshili oye a hogololwa kOmuwa.” 7 Ihe Omuwa okwa ti kuye: “Ino tala koshuuluko she, sho e na omuthika omule nondjelo ombwanawa. Onde mu tinda, oshoka ite pangula, ngaashi omuntu ta pangula. Omuntu oha tala kombanda, ihe ngame ondi wete momutima.”
8 Nena Isai okwi ithana omwana Abinadab nokwe mu eta kuSamuel. Ihe Samuel okwa ti: “Aawe, Omuwa naye wo ine mu hogolola.” 9 Isai okwe eta Shamma. Samuel okwa ti: “Aawe, haye Omuwa e mu hogolola.” 10 Osho ngeyi Isai okwe eta oyanamati yaheyali kuSamuel. Ihe Samuel okwa ti kuye: “Aawe, Omuwa ina hogolola nando ogumwe gwomuyo.” 11 Nena okwa pula Isai a ti: “Aamwoye oyo ayeke mbano?”
Isai okwa yamukula: “Oku na onkelo, ihe oku li kuusita woonzi.”
Samuel okwa ti: “Mu lombwela, e ye huka. Itatu ka yamba ontselelandjambo, manga inee ya.” 12 Onkee Isai okwa tumu, e ki ithanwe. Ye okwa li omumati a ndjanga e na ondjelo ombwanawa nomeho taga konita. Omuwa okwa ti kuSamuel: “Oye nguka, mu gwayeka.” 13 Samuel okwa kutha omagadhi gooholivi e ta gwayeke David montaneho yaamwayina. Mbalambala Ombepo yOmuwa oye ya muDavid noya kala muye okuza esiku ndyoka. Nena Samuel okwa shuna kuRama.
David muuwa waSaul
14 Ombepo yOmuwa oya thigi po Saul, nombepo ombwinayi ya tumwa kOmuwa, oye mu hepeke. 15 Aapiya ye oye mu lombwele: “Otwa tseya kutya ombepo ombwinayi ya tumwa kuKalunga, otayi ku hepeke. 16 Onkee tu lombwela, tatekulu, notatu ke ku kongela omuntu ngoka e shi kuhika okaharpa. Nena uuna ombepo ombwinayi tayi ya mungoye, omuntu ngoka ota hiki okaharpa ke, nangoye to pepelelwa.”
17 Saul okwe ya lombwele a ti: “Kongelii ndje omuntu ngoka e shi kuhika nawa, mu mu ete kungame.”
18 Gumwe gwomaamati ye okwa ti: “Isai gwomoshilando Betlehem oku na omwanamati, ngoka onkulungu mokuhika okaharpa. Ye ependa wo nomulumentu gwondjelo, omukwiita ofule noku shi kupopya nawa. Omuwa oku li pamwe naye.”
19 Saul okwa tumu aatumwa kuIsai ta ti: “Tumina ndje omumwoye David, ngoka omusita gwoonzi.” 20 Isai okwa tumu David kuSaul e na okakombo nokasino ka humbata iikwiila nombago yu udha omaviinu. 21 David okwe ya kuSaul nokwa ningi omuyakuli gwe. Saul okwa li e mu hole unene nokwe mu hogolola omuhumbati gwomatati ge. 22 Nena Saul okwa tumu elaka kuIsai tali ti: “Onda hokwa David. Mu pitika, a yakule ndje.” 23 Okuza mpoka shampa ombepo ombwinayi ya tumwa kuKalunga, ye ya muSaul, nena David okwa kutha okaharpa ke nokwe ka hiki. Ombepo ombwinayi oya thigi po Saul, nokwa pepelelwa e ta ngungumana.
© Oshindonga Bible © Bible Society of Namibia, 2008.
