Jesus oye omuwa gwEsabati
(Mrk. 2:23-28Luk. 6:1-5)1 Inapu pita ethimbo ele, Jesus okwa pitile pokati komapya mesiku lyEsabati. Aalongwa ye oya li ya sa ondjala noya tameke okupolola omaha e taa li. 2 Aafarisayi sho ye shi mono, oya ti kuJesus: “Tala, aalongwa yoye otaa ningi shono shi indikwa mesiku lyEsabati.”
3 Jesus okwa ti kuyo: “Inamu lesha nani, shoka David e shi ningi, sho a li a sa ondjala, oye mwene naantu ye? 4 Oye okwa yi mongulu yaKalunga nokwa li iikwiila mbyoka ya yambelwa Kalunga, ya li inaayi pitikwa okuliwa kuye mwene nokaantu ye, ndele, okaayambi ayeke. 5 Nenge inamu lesha mompango, aayambi sho haa yono Esabati motempeli yo kaaye na oondjo? 6 Ngame otandi mu lombwele: Nguka e li mpaka, oku vule otempeli. 7 Ando mwa tseya shika shoka tashi ti: ‘Okusila ohenda oku vulile ndje okugandja omayambo,’ ando itamu pangula mbaka inaaya yona sha. 8 Oshoka Omuna gwOmuntu oye Omuwa gwEsabati.”
Omulumentu e na oshikaha sha lemana
(Mrk. 3:1-6Luk. 6:6-11)9 Jesus okwa zi po mpoka e ta yi mosinagoga yawo. 10 Omo omwa li mu na omulumentu e na oshikaha sha lemana. Mboka ya li ya hala okutamaneka Jesus, oye mu pula ya ti: “Osha pitikwa tuu okwaaludha mEsabati?”
11 Oye okwa ti kuyo: “Olye andola gwomune e na onzi yimwe ayike e tayi gwile moshilambo mEsabati, ite yi kwata, e yi hile mo? 12 Ano omuntu oku vule onzi kokulekule. Onkee ano osho opala okulonga uuwanawa mesiku lyEsabati.” 13 Oye nokwa ti komulumentu: “Utha oshikaha shoye!” Oye nokwe shi utha, nosha aluka sha ningi sha fa oshikwawo.
14 Aafarisayi oya zi mo noya kundathana, ya dhipage Jesus.
Omuntu gwOmuwa
15 Jesus sho e shi dhimbulula, okwa zi nkoka, naantu oyendji oye mu landula. Oye okwe ya aludha ayehe 16 nokwe ya indike noonkondo, kaaye mu holole. 17 Osho oohapu ndhoka dha popiwa komuhunganeki Jesaja odha gwanithwa, sho ta ti:
18 “Nguka oye omuntu gwandje nde mu hogolola.
Oye ngoka ndi mu hole nonde mu hokwa.
Ngame otandi mu tula Ombepo yandje,
oye notu uvithile aantu ayehe epangulo.
19 Oye iha tamanana, ye iha igidha,
newi lye itali uvika momapandaanda.
20 Oshihenguti sha tanduka ite shi nyanyagula.
Onyeka tayi tsina ite yi dhimi po,
sigo uuyuuki te u thikitha mesindano.
21 Naantu ayehe otaye ki inekela edhina lye.”
Jesus naBelsebul
(Mrk. 3:20-30Luk. 11:4-23)22 Oyo ye eta kuJesus omulumentu omunampwidhuli, ngoka a li omuposi, ye ihaa popi. Jesus okwe mu aludha, oye nokwa popi e ta mono ko. 23 Aantu ayehe oya kumwa ya ti: “Nguka ke shi nani omuna gwaDavid?”
24 Ihe aafarisayi sho ye shi uvu, oya ti: “Hakusha shilwe ta tidha mo oompwidhuli ihe okoonkondo dhaBelsebul, omukuluntu gwoompwidhuli.”
25 Jesus sho a dhimbulula omadhiladhilo gawo, okwa ti kuyo: “Okehe tuu oshilongo tashi itsile ondumbo, otashi yonuka po. Nakehe oshilando nenge egumbo tali itsile ondumbo, itali kala po. 26 Ano Satana ngele ta tidha mo Satana omukwawo, ini itsila tuu ondumbo muye mwene, noshilongo she otashi vulu tuu okukala po? 27 Ngele ngame otandi tidha mo oompwidhuli koonkondo dhaBelsebul, aana yeni otaye dhi tidha mo noonkondo dhalye? Onkee ano oyo taa ningi aapanguli yeni. 28 Ihe ngele ngame otandi tidha mo oompwidhuli koonkondo dhOmbepo yaKalunga, nena Oshilongo shaKalunga oshi li pune.
29 “Kaku na ngoka ta vulu okugwayela megumbo lyomunankondo, e mu yuge eliko lye okuninga ta manga tango omunankondo ngoka, opo ihe ta yugu egumbo lye.
30 “Kehe ngoka kee li kombinga yandje, oye okwa tsa ondumbo nangame. Naangoka itaa gongele pamwe nangame, oye ota halakanitha po.
31 “Onkee ano tandi mu lombwele: Ondjo kehe nesheko kehe aantu otaye li dhiminwa po, ihe esheko lyokusheka Ombepo Ondjapuki itali dhimwa po. 32 Ngele ku na ngoka ta popi ohapu a tsa ondumbo nOmuna gwOmuntu, oye te yi dhiminwa po. Ihe ngoka ta popi ohapu a tsa ondumbo nOmbepo Ondjapuki, oye ita dhiminwa po nomuuyuni mbuka nomumbwiyaka tau ya.”
Omuti niiyimati yagwo
(Luk. 6:43-45)33 “Ningeni omuti omwaanawa niiyimati yagwo iiwanawa, nenge ningeni omuti omwiinayi niiyimati yagwo iiwinayi. Oshoka omuti ohagu dhimbululwa kiiyimati yagwo. 34 Oluvalo lwomayoka ne, otamu wapa ngiini okupopya uuwanawa, one sho mu li po aawinayi? Oshoka shoka shu udhilila momutima, osho shoka okana take shi popi. 35 Omuntu omwaanawa ota holola mompungulo ye ombwanawa uuwanawa, nomuntu omwiinayi ota holola mompungulo ye ombwinayi uuwinayi.
36 “Ngame otandi mu lombwele: Okehe tuu ohapu yowala aantu taye yi tumbula, otaye ke yi pulwa mesiku lyepangulo. 37 Oshoka okoohapu dhoye ongoye to uthwa waa na oondjo, nokoohapu dhoye ongoye to pewa uusama.”
Oshikumithalonga shaJona
(Mrk. 8:11-12Luk. 11:29-32)38 Nena yamwe yomaalongimpango noyomaafarisayi oya pula Jesus ya ti: “Muhongi, otwa hala, u tu talithe oshikumithalonga.”
39 Oye a yamukula a ti: “Aantu yopethimbo ndika aawinayi naahondeli, omwa hala oshikumithalonga, ihe itamu pewa oshikumithalonga shilwe, aawe, osho tuu shoka shomuhunganeki Jona. 40 Oshoka ngaashi Jona a li mela lyondjambameya omasiku gatatu, osho tuu nOmuna gwOmuntu ota ka kala meni lyevi omasiku gatatu. 41 Aaninive otaa ka holoka mesiku lyepangulo pamwe nane notaye ke mu pa uusama, oshoka oyo yi itedhululithwa keuvitho lyaJona; ihe nguka e li mpaka oku vule Jona. 42 Omukwaniilwa omukiintu gwokuumbugantu ota ka holoka mesiku lyepangulo pamwe nane note ke mu pa uusama, oshoka oye okwa zile koha yuuyuni, a pulakene oondunge dhaSalomo; ihe nguka e li mpaka oku vule Salomo.”
Okugaluka kwombepo ya nyata
(Luk. 11:24-26)43 “Ombepo ya nyata ngele tayi zi momuntu, otayi endagula nomitunda dhaa na omeya, tayi kongo evululuko, yo itayi li mono. 44 Otayi ti: ‘Otandi shuna megumbo lyandje moka nda zile.’ Ngele ya galuka, otayi li adha li li owala, lya kombwa nolyo opalekwa. 45 Nena otayi yi notayi etelele oombepo oonkwawo heyali dhi yi vule muuwinayi. Odho tadhi ya notadhi kala moka. Nena okukala kwahugunina kwomuntu ngoka otaku ningi okwiinayi ku vule kwopetameko. Ano aantu mbaka aawinayi osho taa ka ningilwa.”
Aakwawo yaJesus yashili
(Mrk. 3:31-35Luk. 8:19-21)46 Ano manga Jesus a li ta lombwele aantu, yina naamwayina aalumentu oya thikama pondje, taye mu kongo, ya hala ya popye naye. 47 Nena gumwe gwomaantu mboka okwa ti kuye: “Tala, nyoko naamwanyoko oya thikama pondje, taye ku kongo, ya hala ya popye nangoye.”
48 Jesus okwe mu yamukula a ti: “Meme naamwameme oolye?” 49 Opo okwa ganeke oshikaha she kaalongwa ye e ta ti: “Tala, meme naamwameme oyo mbaka! 50 Oshoka kehe tuu ngoka ta gwanitha ehalo lyaTate yomegulu, oye omumwameme omulumentu nomumwameme omukiintu nameme.”
© Oshindonga Bible © Bible Society of Namibia, 2008.
