1 Jehosafat okwa si nokwa fumvikwa moombila dhaakwaniilwa moshilando shaDavid, nomwana Joram okwa ningi omukwaniilwa peha lye.
Joram, omukwaniilwa gwaJuda
(2 Aak. 8:17-24)2 Joram yaJehosafat okwa li e na aamwayinamati yahamano: Azaria, Jehiel, Sakaria, Azaria, Mikael naShefatia. 3 He okwe ya pe iingoli oyindji niisiliveli nomagano galwe ge na ondilo nokwa langeke kehe gumwe, a pangele oshilandohote shimwe shomuJuda. Joram sho a li osheeli, Jehosafat okwe mu ningi omulanduli gwe muukwaniilwa. 4 Joram sho a ningi omunankondo moshilongo, okwa dhipagitha aamwayina ayehe nomalenga gamwe Omaisraeli.
5 Joram okwa ningi omukwaniilwa mepipi lyomimvo omilongo ndatu nambali, nokwa lele muJerusalem omimvo hetatu. 6 Okwa landula uuwinayi woshinkoti shaAhab naakwaniilwa yalwe yaIsrael, oshoka okwa hokana omuna gwaAhab. Okwa yono kOmuwa, 7 ihe Omuwa ka li a hala okuyona po ezimo lyaDavid, oshoka okwa hangana naDavid e te mu uvanekele kutya oluvalo lwe otalu ka lela aluhe.
8 Muuyuni waJoram, Edom okwa tsu ondumbo naJuda e ta manguluka. 9 Joram nomalenga ge oya piti mo ye na omatembakwiita e taa homona Edom. Etangakwiita lyaEdom olye ya kondeke, ihe uusiku oye shi tompola, sho ya gwaya mo e taa yi ontuku. 10 Okuza mpoka Edom okwa manguluka ko kuJuda. Pethimbo tuu ndyoka, oshilando Libna osha tsu ondumbo, molwashoka Joram okwe etha Omuwa, Kalunga koohekulu. 11 Okwa tungu nokuli omahala giinonoma yuupagani miikulundundu yaJuda e ta yonitha Aajuda nAajerusalem kOmuwa.
12 Omuhunganeki Elia okwa tumine Joram ontumwafo tayi ti: “Omuwa, Kalunga kahokulu David, okwe ku pangula, oshoka ino landula oshinkoti shaho, omukwaniilwa Jehosafat nenge shanyokokulu, omukwaniilwa Asa. 13 Peha lyasho owa landula onshingo yaakwaniilwa yaIsrael e to hongolola Aajuda nAajerusalem okwiiteka Kalunga, ngaashi naanaa Ahab naalanduli ye ya ningi. Owa dhipaga po nokuli aamwanyoko, mboka ya li aawanawa ye ku vule. 14 Molwoshinima shika, Omuwa ota ka geela shili oshigwana shoye, aamwoye naakiintu yoye e ta halakanitha po omaliko goye. 15 Ngoye mwene oto ka ala uuvu womandjandja taga tuta iilalo, nomeni lyomimvo mbali uuvu otau ka pititha mo omandjandja goye.”
16 Puushiinda wAasudani mboka ya adhika ya tula komunkulofuta opwa li Aafilisti nAayarabi yamwe. Omuwa okwe ya tsu omaminimini, ya ka hingile Joram iita. 17 Oya matukile Juda e taa yugu uuwa womukwaniilwa e taa kwata po aakiintu yomukwaniilwa noyana, kakele kaAhasia, onkelo ye.
18 Konima yaambika, Omuwa oku umbu omukwaniilwa uuvu womandjandja. 19 Pethimbo lyomimvo mbali uuvu mbuka owa koko, sigo pehulilo omukwaniilwa a si kuuwehame uunene. Aathigona ye inaye mu simaneka nande, ya teme omulilo gwoosa, ngaashi ya ningile oohekulu.
20 Joram okwa ningi omukwaniilwa mepipi lyomimvo omilongo ndatu nambali, nokwa lele muJerusalem omimvo hetatu. Kapwa li ngoka a yemata, sho a si. Oye mu fumvike moshilando shaDavid, ihe hamoombila dhaakwaniilwa.
© Oshindonga Bible © Bible Society of Namibia, 2008.
