Joas, omukwaniilwa gwaJuda
(2 Ondjal. 24:1-16)1 Momumvo omutiheyali gwepangelo lyomukwaniilwa gwaIsrael Jehu, Joas okwa ningi omukwaniilwa gwaJuda e ta lele muJerusalem omimvo omilongo ne. Yina oZibia gwokoshilando Beersheba. 2 Mokukalamwenyo kwe Joas okwa longo shoka sho opalela Omuwa, oshoka omuyambi Jehoiada okwe mu pukulula. 3 Nando ongeyi, omahala giinonoma yuupagani oga li inaaga yonwa po, noshigwana osha tsikile okuyambela ko oontselelandjambo niitsininondjambo.
4 Joas okwa hiya aayambi nokwe ya lombwele, ya taambe iimaliwa ayihe mbyoka ya gandjwa molwoondjambo motempeli, iimaliwa ayihe mbyoka omuntu e na okufuta molwe mwene nenge molwaantu yalwe niimaliwa mbyoka ya gandjwa omagano. 5 Omuyambi kehe oku na okudhiginina iimaliwa e yi etelwa kaayakulwa ye, niimaliwa mbyoka oyi na okulongithwa meopaleko lyotempeli, mpoka tali pumbiwa.
6 Ihe pomumvo omutimilongombali nomutitatu gwepangelo lyaJoas aayambi inaa ninga omaopaleko gotempeli. 7 Okwi ithana Jehoiada naayambi yalwe e te ya pula ta ti: “Omolwashike ano inaamu opaleka otempeli? Okuza nena itamu kala we niimaliwa mbyoka tamu taamba; omu na oku yi gandja, opo omaopaleko ga ningwe.” 8 Aayambi oya zimine shika, yaa taambe we iimaliwa koshigwana noyaa opaleke omaopaleko motempeli.
9 Nena Jehoiada okwa kutha oshiketha e te shi tsu ombululu e te shi tula peyambelo, kombinga yokolulyo. Aayambi mboka ya tonatele posheelo, oya tula mo iimaliwa ayihe mbyoka ya yambwa kumboka ye ya kelongelokalunga. 10 Iimaliwa shampa ya ningi oyindji moshiketha, amushanga guuwa nomuyambimukuluntu oye ya e taye yi yalula. 11 Konima yokuyalula oye yi gandja kaatonateli yiilonga yeopaleko lyotempeli, opo ya fute ihe aanashihongelo, aatungi, 12 aahongi yomamanya naasaahi yago yo ya lande wo iipilangi nomamanya ngoka taga longithwa meopaleko lyotempeli, noompumbwe adhihe dhilwe. 13 Ihe iimaliwa mbika inayi longithwa nando mokufuta ehambulo lyiitenga yoshisiliveli, iiyaha, oombenda nenge iikwatitho yoolamba, nenge iilongitho yilwe iikwawo yoshisiliveli nenge yoshingoli. 14 Ayihe oya li ya longithwa mokufuta aaniilonga nokulanda iitungitha meopaleko lyotempeli. 15 Aalumentu mboka ya li taa tonatele iilonga, oya li aainekelwalela yo inaa pulwa nando, nkene ya longitha iimaliwa mbyoka. 16 Iimaliwa ya gandjelwa oondjondjambo nomayonondjambo inayi taambelwa moshiketha, oshoka oyaayambi.
17 Pomasiku ngeyaka omukwaniilwa gwaSiria Hasael okwa matukile oshilando Gat e te shi sindi; nena okwa tokola, a matukile Jerusalem. 18 Omukwaniilwa gwaJuda Joas okwa kutha omayambo agehe ngoka aatetekeli ye Jehosafat, Joram naAhasia ya li ye ga yapulila Omuwa. Okwe ga gwedha komayambo ge mwene niingoli ayihe ya li ya pungulwa motempeli nomuuwa e ta tumine omukwaniilwa Hasael omagano, nguka nokwa kutha po omatanga ge puJerusalem.
19 Ashihe shilwe shoka omukwaniilwa Joas a ningi, osha nyolelwa membo lyondjokonona yaakwaniilwa yaJuda.
20-21 Omalenga gaJoas oge mu uvanene monanguwi, ge mu dhipage. Gaali gomugo, Josakar yaShimeat naJehosabad yaShomer, oge mu dhipagele megumbo lyokuSilla, kuuzilo waJerusalem pondjila ndjoka yu uka kuSilla. Joas okwa fumvikwa moombila dhaakwaniilwa moshilando shaDavid, nomwana Amazia okwe mu landula muukwaniilwa.
© Oshindonga Bible © Bible Society of Namibia, 2008.
