2 AAKWANIILWA 25 - Oshindonga Bible (ONDB)

Okutekapo kwaJerusalem

1 Sedekia okwa tsu ondumbo nomukwaniilwa gwaBabilonia Nebukadnezzar, nomolwashoka Nebukadnezzar okwe ya nomatangakwiita ge agehe e ta ponokele Jerusalem mesiku etimulongo lyomwedhi omutimulongo gwomumvo omutimugoyi gwepangelo lyaSedekia. Oya yungu ontanda pondje yoshilando e taa tungu omituni dhekondekela 2 e taye shi kondeke sigo omumvo omutimulongo nogwotango gwepangelo lyaSedekia. 3 Mesiku etimugoyi lyomwedhi omutine gwomumvo tuu ngoka ondjala yekomba sho ya li ya geya, aantu sho ya li yaa na sho taya li, 4 omakuma goshilando oga kumunwa po. Aababilonia nando oya li ya kondeka oshilando, aakwiita ayehe oyi iyaka mo uusiku. Oya pitile momukala gwosheelo pokati komadhingililokuma gaali kombinga yeyana lyuuwa e taa fadhuka po yu uka kolusilu lwaJordan. 5 Ihe aakwiita Aababilonia oya landula omukwaniilwa Sedekia e taye mu kwatele molushandja popepi naJeriko, naakwiita ye ayehe oye mu halakana. 6 Sedekia okwa falwa a yi komukwaniilwa Nebukadnezzar, ngoka a li muRibla, naankoka Nebukadnezzar okwe mu pangula. 7 Oya dhipaga aana yaSedekia montaneho ye; opo ihe Nebukadnezzar okwa tsipulitha mo omeho gaSedekia e te mu tula momalyenge nokwe mu fala kuBabilon.

Ehanagulopo lyotempeli

(Jer. 52:12-33)

8 Mesiku etiheyali lyomwedhi omutitano gwomumvo omutimulongo nomutimugoyi gwepangelo lyaNebukadnezzar, omukwaniilwa gwaBabilon, Nebusaradan, omugandjindunge gwomukwaniilwa nondjayi yiita ye, okwe ya muJerusalem. 9 Okwa fike po otempeli, ombala nomagumbo gaanamadhina agehe muJerusalem, 10 naakwiita ye oya kumuna po omadhingililokuma goshilando. 11 Nena Nebusaradan okwa fala kuBabilonia aantu mboka ya thigalele moshilando, oshihupe shomangomba naamboka yi igandjele kAababilon. 12 MuJuda okwa thigile mo oohepele, mboka yaa na sho taa likola, e te ya tula miilonga yiitsambe yomiviinu nomomapya.

13 Aababilonia oya tatula po oongundhi dhiikushu nuutemba mboka wa li motempeli, osho wo ondama yoshikushu, e taa fala iikushu ayihe kuBabilon. 14 Oya fala ko wo iihupulo, iikangwa yokuyuka omutoko gwokoshiyambelo, iikonde yokutetitha uulapi woolamba, iiyaha yokukutha ombinzi moontselelandjambo, iitsininitho niikwaniipangitho yiikushu ayihe yilwe ya li hayi longithwa motempeli melongelokalunga. 15 Oya fala shaa shoka sha ningwa moshingoli nenge moshisiliveli, iiyaha iishona niikangwa yomakala ga hanya. 16 Iinima yoshikushu mbyoka Salomo a li e yi hambulithila otempeli — oongundhi mbali, uutemba nondama — oya li iidhigu okuvihwa. 17 Oongundhi mbali odha li dha faathana: shaa ndjoka oya li yi na uule woondya omulongo nahetatu, yi na oshipaka shoshikushu kombando, oondya ndatu momuthika. Oshipaka kehe osha kundukwa kuulenga wa tatwa nomwa longelwa iiyimati yoshikushu yomugranati.

Aajuda taa falwa kuBabilonia

(Jer. 52:24-27)

18 Nebusaradan, ondjayi yiita, okwa kwata omuyambimukuluntu Seraia, omuyambi omutiyali Sefania naayambi aalangeli yatatu yoposheelo shotempeli. 19 Moshilando okwa kutha mo omumbala ngoka a li omutaleli gwetangakwiita, aagandjimayele yatano yomukwaniilwa mboka ya kalele natango moshilando, amushanga gwondjayi yiita, ngoka a li ha kutu aakwiita, naanamadhina yalwe omilongo hamano. 20 Nebusaradan okwe ya fala komukwaniilwa gwaBabilonia moshilando Ribla, 21 moshikandjo Hamat. Oko nkoka omukwaniilwa e ya dhengitha e te ya dhipagitha.

Osho ngaaka Aajuda ya falwa muupika kokule nevi lyawo.

Gedalia, omupangeli gwaJuda

(Jer. 40:7-9Jer. 41:1-3)

22 Omukwaniilwa gwaBabilonia Nebukadnezzar okwa langeke Gedalia yaAhikam, omutekulu gwaShafan, a ninge omupangeli gwaJuda, e te mu tula po, a tonatele ayehe mboka inaa falwa kuBabilon. 23 Omalenga Omajuda naakwiita mboka inaa igandja sho ya kundana shika, oya yi kuGedalia kuMispa. Mbaka oyo Ismael yaNetania, Johanan yaKarea, Seraia yaTanhumet gwokuNetofa naJaazania gwokuMaaka. 24 Gedalia okwa ti kuyo: “Otandi mu lombwele kutya inamu tila mu igandje kAababilon. Kaleni moshilongo shika, ne mu longele omukwaniilwa gwaBabilon. Nena otamu kala nawa.”

25 Ihe momwedhi omutiheyali gwomumvo tuu ngoka Ismael yaNetania, omutekulu gwaElishama gwomezimo lyaakwaniilwa, okwa yi kuMispa e na aalumentu omulongo e ta dhipaga Gedalia nAaisraeli nAababilonia mboka ya li puye. 26 Nena Aaisraeli ayehe, aale naafupi, pamwe naakuluntu yomatangakwiita oya tembukile kuEgipiti, oshoka oya tila Aababilonia.

Jehoiakin ta piti mondjedhililo

(Jer. 52:31-34)

27 Momumvo ngoka Evilmerodak a ningi omukwaniilwa gwaBabilon, okwa sile omukwaniilwa gwaJuda Jehoiakin ohenda e te mu pititha mo mondjedhililo. Shika osha ningwa mesiku etimilongombali netiheyali lyomwedhi omutimulongo nomutiyali gwomumvo omutimilongondatu nomutiheyali, sho Jehoiakin a falwa muupika. 28 Evilmerodak okwe mu ningi nawa e te mu yele nesimano e vule aakwaniilwa aakwawo a li nayo muupika muBabilon. 29 Jehoiakin okwa li a pitikwa, a hule mo oonguwo dhe dhomondjedhililo e ta li poshitaafula shomukwaniilwa omasiku ge agehe, manga a li e na omwenyo. 30 Esiku kehe manga a li e na omwenyo, okwa li a gwanithilwa oompumbwe dhe adhihe.