Simson nomukadhona gwokuTimna
1 Esiku limwe Simson okwa yi kuTimna, nkoka i itsu omukadhona Omufilisti. 2 Okwa shuna kaandjawo e ta ti kaakuluntu ye: “Onde endela omukadhona Omufilisti kuTimna. Ke mu talelii ndje; onda hala oku mu hokana.”
3 Ihe aakuluntu ye oye mu pula: “Omolwashike to yi kumboka aapagani Aafilisti, u kuthe ko omukiintu? Ito vulu okukutha omukiintu moludhi lwetu, mokati koshigwana shetu?”
Ihe Simson okwa ti kuhe: “Oye awike nda hala, mu ke mu talele ndje. Ondi mu hole.”
4 Aakuluntu ye inaa tseya kutya Omuwa okwa li te enditha Simson okuninga ngeyi, oshoka Omuwa okwa li ta kongo olweedhe lwo opala okukondjitha Aafilisti. Pethimbo ndika Aafilisti oya li taa pangele Israel.
5 Osho ngaaka Simson okwa yi kuTimna pamwe naakuluntu ye. Manga ya li taa yi koshitsambe shomiviinu, oku uvu onkoshi ongundjuka tayi pumbu. 6 Ohaluka oonkondo dhOmuwa dhe ya muSimson, nokwa toogonyona onkoshi niikaha ye, oto ti omuntu ta toogonyona onkombwena. Ihe ina lombwela nando aakuluntu ye shoka a ningi.
7 Okwa yi nduno e ta popi nomukadhona nokwa li e mu hokwa. 8 Omasiku gamwe sho ga piti po, Simson okwa shuna ko ishewe, e ke mu hokane. Mondjila okwa peguka mo, a tale onkoshi ndjoka a dhipagele, nokwa li a kumwa, sho a mono ehunga lyoonyushi nomagadhi gadho ge li molukolo lwonkoshi ndjoka ya sa. 9 Okwa kogonyona mo omagadhi goonyushi niikaha ye e te ga li, manga te ende. Nena okwa yi kaakuluntu ye e te ya pe ko wo. Oye ga li, ihe Simson ine ya lombwela kutya okwe ga kutha molukolo lwonkoshi ya sa.
10 He yaSimson okwa yi kaandjamukadhona, naSimson okwa ningi omatelekela hwiyaka. Shika osha li omukalo mokati kaagundjuka. 11 Aafilisti sho ye mu mono, oya tumu aagundjuka aamati omilongo ndatu, ya kale puye. 12-13 Simson okwa ti kuyo: “Nandi mu pule otumbutumbu. Otandi mbetse nakehe gumwe gwomune ohema yoliina ya thola nomutsuhu gwuufuuli nokutya itamu vulu okulombwela ndje momasiku ngaka gaheyali gohango kutya otayi ti ngiini.”
Oyo ya ti kuye: “Tu lombwela otumbutumbu yoye.”
14 Okwa ti:
“Iikulya oya zi momufukedhi;
uutoye owa zi momunankondo.”
Oya kala ya nyengwa uule womasiku gatatu okutseya otumbutumbu.
15 Mesiku etine oya ti kumukadhaSimson: “Enda omulumentu gwoye miineya, u tu lombwele kutya otumbutumbu otayi ti ngiini. Ngele hasho, otatu ka tomeka egumbo lyaho omulilo e tatu mu lungunithile mo. Omwe tu hiya nani, mu tu yuge! Hasho?”
16 MukadhaSimson okwe ya kuye ta lili e ta ti: “Ngoye ku hole ndje! Ou tonde ndje! Owa pula yakwetu otumbutumbu ngoye ino lombwela ndje kutya otayi ti ngiini.”
Simson okwa ti kuye: “Tala, inandi yi lombwela nande otate nameme. Omolwashike ndi na oku yi ku lombwela?” 17 Oye a lili omasiku ngoka agehe gaheyali gohango. Ihe mesiku etiheyali Simson okwe mu lombwele shoka otumbutumbu tayi ti, oshoka omufuko okwe mu tsitsimike unene. Nena omukiintu okwa lombwele Aafilisti. 18 Mesiku etiheyali manga Simson inaa ka lala, aantu yomoshilando oya ti kuye:
“Oshike oshitoye shi vule omagadhi goonyushi?
Oshike shi na oonkondo shi vule onkoshi?”
Simson okwa yamukula:
“Ando omwa li inaamu pululitha ontana yandje,
ando inamu tseya eyamukulo.”
19 Ohaluka oonkondo dhOmuwa odhe ya muye nokwa yi kuAshkelon e ta dhipaga aalumentu omilongo ndatu e ta kutha ko oonguwo dhawo dhuufuuli e te dhi pe aalumentu mboka ya fatulula otumbutumbu. Konima yaashika okwa yi kegumbo nokwa li a ngunya, a geele shoka sha ningwa po. 20 Omufuko gwe okwa kuthwa po koshinkumbi she.
© Oshindonga Bible © Bible Society of Namibia, 2008.
