EHOLOLO 6 - Oshindonga Bible (ONDB)

Iihako

1 Nena onda mono Onzigona a matula nokwa suukulula shotango shomiihako mbyoka iheyali; nondu uvu shimwe shomiinamwenyo mbyoka ine sha popi newi lya fa lyomutyalakato sha ti: “Ila!” 2 Ngame onda tala nonda mono ko okakambe okatokele. Omukayili gwako okwa li e na uutati nokwa pewa oshishani. Oye okwa yi, a ka sindane, oshoka oye omusindani.

3 Nena Onzigona okwa matula oshihako oshitiyali; nondu uvu oshinamwenyo oshitiyali sha ti: “Ila!” 4 Okakambe okakwawo okatiligane oka holoka. Omukayili gwako okwa pewa oonkondo dhokuhomonena evi alihe iita, aantu tameke okudhipagathana. Oye nokwa pewa egonga enene.

5 Nena Onzigona okwa matula oshihako oshititatu; nondu uvu oshinamwenyo oshititatu sha ti: “Ila!” Onda tala nonda mono ko okakambe okaluudhe. Omukayili gwako okwa li e na oshiviha moshikaha she. 6 Ngame ondu uvu ewi lya zi mokati kiinamwenyo mbyoka ine lya ti: “Okatungwa kiilyawala oke thike pondjambi yomesiku nosha wo uutungwa utatu womahangu. Ihe omagadhi nomaviinu ino ga etela oshiponga.”

7 Nena Onzigona okwa matula oshihako oshitine; nondu uvu oshinamwenyo oshitine sha ti: “Ila!” 8 Ngame onda mono ko okakambe okakwaya. Omukayili gwako oye ngoka e na edhina Eso, Oshaasi noshe mu landula. Mbika iyali oya pewa oonkondo dhokupangela oshitine shevi nokudhipagitha aantu kiita, kondjala, komalega nokiilikama.

9 Nena Onzigona okwa matula oshihako oshititano. Opo onda mono kohi yoshiyambelo oomwenyo dhaamboka ya dhipagwa omolwokuuvitha oohapu dhaKalunga noya kala aahokololi aainekelwa. 10 Oyo oya popi newi enene ya ti: “Omuwa Omunankondoadhihe, omuyapuki nomunashili! Uunake to ka pangula aantu yokombanda yevi nokugeela mboka ye tu dhipaga?” 11 Kehe gumwe gwomaantu mbaka okwa zalekwa onguwo onde ontokele. Oyo oya lombwelwa, ya vululukwe natango okathimbo, sigo kwa monika omwaalu gu udha gwaayakuli nogwooitaali ooyakwawo mboka ye na okudhipagwa ngaashi yo.

12 Ngame onda mono Onzigona a matula oshihako oshitihamano. Nena okwa ningi ekakamo edhigu lyevi, etango olya luudha lya fa onguwo yoluhodhi, nomwedhi ogwa tiligana gwa fa ombinzi. 13 Oonyothi odha gu ko kegulu e tadhi gwile kevi ongomagongwa gomukwiyu taga shikwa ko kepepo enene. 14 Opo eyalelo olya kana po lya fa ombapila tayi ningwa ongonga. Oondundu noontuntu adhihe odha kuthwa po pomahala gadho. 15 Nena aakwaniilwa yokombanda yevi, aapangeli naawiliki yaakwiita, aayamba naanankondo nosho wo aapika naavalwa oya ka holama momakololo nokohi yomamanya gokoondundu. 16 Oyo oyi ithana oondundu nomamanya ya ti: “Gwileni kombanda yetu, mu tu holeke, opo twaa monike kungoka a kuutumba koshipangelapundi notwaa adhike kondjahi yOnzigona! 17 Oshoka esiku enene lyondjahi yawo olyo ndika, nolye ta vulu oku li keelela?”