Omukwaniilwa gwaTiro ta hunganekwa
1 Omuwa okwa lombwele ndje a ti: 2 “Muna gwomuntu, lombwela omupangeli gwaTiro shoka ngame, Omuwa Omupangeliawike, tandi mu lombwele: Muuntsa woye oto inomo kutya ongoye kalunga. Oto ti owa kuutumba koshipangelapundi wa fa kalunga, wa kundukwa komafuta. Oto ifethitha kalunga, ihe hasho, ngoye omusi, ku shi kalunga. 3 Oto dhiladhila ngoye omunandunge u vule Daniel nokape na oshiholekwa tashi ku holekwa. 4 Uunongo woye nomakoto goye oge ku ningi omuyamba gwomaliko goshingoli noshisiliveli. 5 Owa pindike noondunge e to mono iihohela. Oto itangele uuyamba woye!
6 “Ngashingeyi ngame, Omuwa Omupangeliawike otandi ti: Molwaashoka to dhiladhila kutya ngoye ou na oondunge ngaashi kalunga, 7 Otandi ka eta aatondi yaa na ohenda, ye ku ponokele. Otaa ka hanagula po iinima yoye ayihe iiwanawa mbyoka wa likola kuunkulungu nokuunongo woye. 8 Otaye ke ku dhipaga po e taye ku undulile mefuta, omo u fumvikwe. 9 Nge taye ya ye ku dhipage po, oto ki inoma natango tuu kutya ongoye kalunga? Koshipala shaadhipagi yoye oto ka ninga omusi, ku shi kalunga nande. 10 Oto ka sa wa fa ombwa miikaha yaakwiilongo aakaanakalunga. Ongame, Omuwa Omupangeliawike, nda gandja oshipango shika.”
Okutekapo kwomukwaniilwa gwaTiro
11 Omuwa okwa lombwele ndje ishewe a ti: 12 “Muna gwomuntu, lilila oshiponga shoka sha tegelela omukwaniilwa gwaTiro. Mu lombwela shoka ngame, Omuwa Omupangeliawike, tandi ti: Tango owa li oshiholelwa sheopalo. Owa li omunandunge nomuntuuntuu! 13 Owa kala muEden, oshikunino shaKalunga, nowa zala omamanya ge na ondilo gomaludhi ogendji: oorubini, ootopasi, oojaspes, ookrisoliti, okarenelia, oohoniks, oosafire, ooturkoisi noosmaragdi. Owa li u na uulenga woshingoli. Owe u ningilwa, uuna wa shitwa. 14 Onda langeke ko omukerubi, e ku langele. Owa kala kondundu yandje ondjapuki nowa lyanga mokati komamanya taga adhima. 15 Okuza uuna wa shitwa, owi ihumbata nawa, sigo wa tameke okulonga uuwinayi. 16 Owa li wi ipyakidhila niipindi nokulanditha, noshe ku fala muukolokoshi nomuulunde. Omolwashoka nde ku thiminike, u ze ko kondundu yandje ondjapuki, nomukerubi ngoka e ku langele, okwe ku tidha mo momamanya taga adhima. 17 Owi itangele eopalo lyoye, nesimano lyoye lye ku ningi egoya. Molwaashika onde ku hata pevi nonde ku thigi po, u ninge elondodho kaakwaniilwa yalwe. 18 Nuuwinayi woye owindji nomakotokelo goye mokulanda owa nyateke omahala goye omayapuki. Onkee onda tomeke oshilando shoye omulilo, nogwe ku lungunitha po. Ayehe mboka taye ku tala ngashingeyi, otaa ku mono wa fupipikwa momutoko. 19 Owa kana, wa kana sigo aluhe, niigwana ayihe mbyoka ya li ye ku tseya, oya haluka, ya tila kutya otayi ka adhika koshiponga shoye.”
Sidon ta hunganekwa
20 Omuwa okwa lombwele ndje a ti: 21 “Muna gwomuntu, hunganeka oshilando Sidon. 22 Lombwela aantu yamo shoka ngame, Omuwa Omupangeliawike, tandi ya lombwele: Ngame omutondi gwoye, Sidon; otandi ke ku hololela uuyapuki wandje. Aantu otaa ka tseya kutya ongame Omuwa, sho tandi geele mboka ya kala mungoye. 23 Otandi ke ya tumina elega nokukungululitha ombinzi momapandaanda goye. Oto ka homonwa koombinga adhihe, naantu yoye otaa ka dhipagwa po. Nena oto ka tseya kutya ongame Omuwa.”
Israel ta yambekwa
24 Omuwa okwa ti: “Kaku na nando oshimwe shomiigwana mbyoka ya kunduka Israel, tashi mu sheke, tashi ka ninga we omakwega noondjoho, shi ehameke Israel. Oyo notayi ka tseya kutya ongame Omuwa Omupangeliawike.”
25 Omuwa Omupangeliawike ota ti: “Otandi ka kongolola Aaisraeli miigwana moka nde ya halakanithile, ndele niigwana ayihe tayi ka tseya kutya ongame omuyapuki. Aaisraeli otaa ka kala mevi lyawo yene, evi tuu ndyoka nde li pe omuntu gwandje Jakob. 26 Otaa ka kala mo nombili. Otaa ka tunga omagumbo e taa tsike iitsambe yomiviinu. Otandi ka geela aashiinda yawo ayehe mboka taye ya dhini, Israel nota ka kala megameno. Notaa ka tseya kutya ongame Omuwa Kalunga kawo.”
© Oshindonga Bible © Bible Society of Namibia, 2008.
