Egipiti tashi dhengelwa muKarkemish
1 Omuwa okwa lombwele ndje ehunganeko tali popi iigwana. 2 Momumvo omutine gwelelo lyaJehoiakim yaJosia, omukwaniilwa gwaJuda, Nebukadnezzar, omukwaniilwa gwaBabilon, okwa dhengele etangakwiita lyaNeko, omukwaniilwa gwaEgipiti, muKarkemish pomulonga Eufrat. Kombinga yetangakwiita ndika Omuwa okwa ti:
3 “Omalenga gaEgipiti taga kugu:
‘Homateni omahuuyanza geni,
tondokeni onkugo!
4 Kutileni uukambe weni, mu u kayile!
Thikameni mwa tegama mwa zala omagala giiyela!
Upikeni omagonga!
Zaleni omahuuyanza!’ ”
5 “Ondi wete shike?” Omuwa ta pula.
“Otaa shuna mehaluko.
Aakwiita yawo otaa shunithwa ko;
oya kwatwa kuumbanda,
oya yi ontuku yo itaa tala konima.
6 Aanandapolela itaa hunuka mo;
aakwiita itaa vulu okufadhuka po.
Muumbangalantu waEufrat otaa tantala e taa punduka.
7 Olye ngo ta tumbu ko a fa Niili,
a fa omulongafundja gwa tsa koontuni?
8 OEgipiti a tumba a fa Niili,
a fa omulongafundja gwa tsa koontuni.
Egipiti a ti: ‘Otandi yeluka, ndi siikile uuyuni;
tandi hanagula po iilando naantu ya kala mo.
9 Uukambe, homoneni;
aanamatemba, mu ngangalale!
Undukeni, ne aakwiita mboka mwa za kuEtiopia naPut mu na omahuuyanza,
noondjumbeta mwa yambuka muLud.’ ”
10 Esiku ndika olyOmupangeliawike
Omuwa Omunankondoawike;
onena tuu ta polithile ondjahi ye maatondi ye,
onenanena te ya geele.
Egongamwele lye otali ka kuta
notali ka kumwa okunwa ombinzi yawo.
Omuwa ota tsele oontselelandjambo muumbangalantu puEufrat.
11 Aayegipiti, indeni kuGilead;
indii ko mu ka konge omuti!
Omiti dheni adhihe odha tutuka,
kadhi na omwago oku mu aludha.
12 Iigwana oya kundana ohoni yeni;
shaa ngoka okwa uvu tamu kugu.
Omukwiita ota londakana mukwawo,
naayehe yaali otaa gwile pevi ongali.
Nebukadnezzar te ya
13 Omuwa okwa tseyithile ndje, nkene Nebukadnezzar, omukwaniilwa gwaBabilon, ta ka dhenga Egipiti. Okwa ti:
14 “Tseyitheni miilando yaEgipiti,
muMigdol, Memfis naTakpanhes.
Tyeni: ‘Langeleni komatati mu ipopile;
amuhe tamu ka hanagulwa po miita.
15 Oshikalungangombe shoye Apis oshike sha gwila po?
Inashi wapa okuthikama,
oshoka Omuwa e shi hata pevi.’
16 Aakwiita yoye oya tantala noya gwile pevi omulape.
Gumwe ota ti kumukwawo:
‘Thikama, tu ye koyaandjetu,
tu henuke egongamwele lyomutondi.’
17 “Omukwaniilwa gwaEgipiti na lukululwe edhina epe —
‘Munalwango a mana po ethimbo lye.’
18 Ongame Omuwa Omunankondoawike,
Omukwaniilwa, ongame Kalunga Omunamwenyo,
ngoka te ku homona, a fa ondundu Tabor ya lundalala mokati koondundu,
a fa ondundu Karmel ya tumbalala kombanda yefuta.
19 Ilongekidhileni okukwatwa po, ne Aayegipiti!
Memfis otashi shituka ombuga,
omakulukuma gowala mwaa na aantu.
20 Egipiti olya fa onzinzi yoshawo oshinene,
ya kolokelwa komatopola gokuumbangalantu.
21 Aakwiita yalyo aahehelwa oya fa oompunya.
Otaa ka piluka ya ye ontuku,
itaa tegama ya kondje,
oshoka esiku lyehanagulo lyawo olye ya,
esiku lyegeelo lyawo lya thiki.
22 Egipiti olya yele po, otali homa lya fa epili,
aakwiita yomutondi sho taa hedha ko.
Otaye li homona nomakuya ya fa aantu taa keke po omuti
23 e taa mbugaleke omugulu omunene.
Aantu yawo ya nyengana okuyalulwa;
aakwiita yawo oyendji ye vule oombahu.
24 Aayegipiti otaa sithwa ohoni;
otaa sindika kaaumbangalantu.
Ongame, Omuwa, nda popi.”
25 Omuwa, Omunankondoawike, Kalunga kaIsrael, ota ti: “Otandi geele Ammon, oshikalunga shomuThebes, pamwe naEgipiti, iikalunga yalyo naakwaniilwa yalyo. Otandi ka kutha po omukwaniilwa gwaEgipiti naayehe mboka ye mu inekela, 26 noku ya gandja kumboka ya hala oku ya dhipaga, komukwaniilwa gwaBabilonia Nebukadnezzar netangakwiita lye. Ihe konakuyiwa aantu onaa ka kala ishewe muEgipiti, ngaashi ya li ya kala mo nale. Ongame, Omuwa, nda popi.”
Omuwa ta hupitha aantu ye
27 “Omuntu gwandje Jakob, ino tila,
Israel, ino haluka.
Otandi ke ku yugulula ko koshilongo shokokule,
kevi ndyoka wa falwa ko omupongekwa.
Oto ka galukila kegumbo e to kala nombili;
oto ka kala megameno,
nopwaa na ngoka te ku halutha.
28 Otandi ya kungoye, ndi ku hupithe.
Otandi ka hanagula po iigwana ayihe
nkoka nde ku halakanithile ko.
Itandi ke ku yona po,
ihe otandi ku putudha nuuyuuki.
Ongame, Omuwa, nda popi.”