Amazia, omukwaniilwa gwaJuda
(2 Ondjal. 25:1-24)1 Momumvo omutiyali gwelelo lyaJehoas yaJehoahas, omukwaniilwa gwaIsrael, Amazia gaJoas okwa ningi omukwaniilwa gwaJuda 2 mepipi lyomimvo omilongo mbali nantano, nokwa lele muJerusalem omimvo omilongo mbali nomugoyi. Yina oJehoaddin gwomuJerusalem. 3 Okwa longo shoka sho opalela Omuwa, ihe ina fa naanaa hekulu, omukwaniilwa David. Mwaayihe okwa longo, ngaashi he Joas a ningile. 4 Ina kumuna po nando omahala giinonoma yuupagani, naantu oya tsikile okuyambela ko oontselelandjambo niitsininondjambo.
5 Nanziya uukwaniilwa we sho wa kolo, Amazia okwa dhipagitha omalenga ngeyaka ga dhipagele omukwaniilwa he. 6 Ihe ina dhipaga aana yago. Okwa landula shoka Omuwa a popya mompango yaMoses: “Aakuluntu inaa dhipagelwa oondjo dha yonwa koyana, naanona inaa dhipagelwa oondjo dha yonwa kaakuluntu yawo; omuntu oku na okudhipagelwa ondjo e yi yono ye mwene.”
7 Amazia okwa dhipagele Aaedom omayuvi omulongo mEkango lyomongwa e ta kwata po oshilando Sela molugodhi e te shi luku Jokteel, sigo onena.
8 Nena Amazia okwa tumu aatumwa komukwaniilwa gwaIsrael Jehoas noku mu shongela olugodhi. 9 Ihe omukwaniilwa Jehoas okwa galula eyamukulo tali ti: “Eno lyokuLibanon olya tseyithile omusendeli gwokuLibanon tali ti: ‘Gandja omumwoye omukadhona, a ninge omufuko gwomumwandjemati.’ Ihe iiyamakuti yomokuti oya piti po e tayi lyatagula po eno. 10 Tala ko, Amazia, ngashingeyi owa dhenge Aaedom noto inenepeke pombanda. Kala wa gwana nesimano lyoye, e to kala pegumbo. Omolwashike to ishongele iiponga ngoye mwene naantu yoye?”
11 Ihe Amazia okwa tindi ye ina pulakena ko, onkee omukwaniilwa Jehoas a piti mo naantu ye e taye mu kondjitha muBet Shemesh muJuda. 12 Etangakwiita lyaAmazia olya dhengwa, naakwiita ye ayehe oya yi ondapo kaandjawo. 13 Jehoas okwa kwata Amazia onkwatwa, okwa tsikile u uka kuJerusalem e ta kumuna po edhingililokuma lyoshilando okuza kOsheelo shaEfraim sigo okOsheelo shokokolonela, oshinano shoometa konyala omathele gaali. 14 Okwa yugu po iisiliveli ayihe niingoli ayihe mbyoka a mono, iikwaniipangitho ayihe yotempeli nomaliko agehe gomuuwa, e ta shuna nago kuSamaria pamwe noonkwatwa.
15 Ashihe shilwe shoka Jehoas a ningi, mwa kwatelelwa uufule we miita yokukondjitha omukwaniilwa gwaJuda Amazia, osha nyolelwa membo lyondjokonona yaakwaniilwa yaIsrael. 16 Jehoas nokwa si e ta fumvikwa moombila dhaakwaniilwa muSamaria, nomwana Jeroboam okwe mu landula muukwaniilwa.
Eso lyomukwaniilwa Amazia
(2 Ondjal. 25:25-28)17 Omukwaniilwa gwaJuda Amazia okwa kala e na omwenyo omimvo omulongo nantano okuza keso lyomukwaniilwa gwaIsrael Jehoas. 18 Ashihe shilwe shoka Amazia a ningi, osha nyolelwa membo lyondjokonona yaakwaniilwa yaJuda.
19 Aatondi yaAmazia muJerusalem oye mu uvanene monanguwi, ye mu dhipage. Okwa yi ondapo koshilando Lakish, ihe aatondi ye oye mu landulile ko e taye mu dhipaga. 20 Omudhimba gwe ogwe etwa kuJerusalem gwa humbatwa kokakambe nogwa fumvikwa moombila dhaakwaniilwa moshilando shaDavid. 21 Oshigwana shaJuda osha kwaniileke osheeli she omumati gwomimvo omulongo nahamano edhina lye Azaria. 22 Azaria okwa lala Elat e te shi tungulula konima yeso lyahe.
Jeroboam omutiyali, omukwaniilwa gwalsrael
23 Momumvo omutimulongo nantano gwepangelo lyaAmazia gaJoas, omukwaniilwa gwaJuda, Jeroboam yaJehoas okwa ningi omukwaniilwa gwaIsrael nokwa lele muSamaria omimvo omilongo ne nagumwe. 24 Okwa yono kOmuwa a landula oshiholelwa shuulunde waJeroboam yaNebat, ngoka a fala Israel muulunde. 25 Okwa lala oshilongo ashihe shoka sha li nale shaIsrael, okuza ketaulilo lyaHamat muumbangalantu sigo Efuta lya sa muumbugantu. Shika osha ningwa pahapu dhOmuwa, Kalunga kaIsrael, a li e dhi popi mokana komumati gwe omuhunganeki Jona yaAmittai gwokuGat Hefer.
26 Omuwa okwa mono okuhepekwa okudhigu kwAaisraeli; ko kakwa li ngoka te ya kwatha. 27 Kalya li elalakano lyOmuwa, a dhime po Aaisraeli thiluthilu, onkee okwa longitha omukwaniilwa Jeroboam yaJehoas oku ya hupitha.
28 Ashihe shilwe shoka Jeroboam yaJehoas a ningi, omalugodhi ge guufule, nonkene a yugulula ko Damaskus naHamat yi ye kuIsrael, oya nyolelwa membo lyondjokonona yaakwaniilwa yaIsrael. 29 Jeroboam okwa si nokwa fumvikwa moombila dhaakwaniilwa, nomwana Sakaria okwe mu landula muukwaniilwa.
© Oshindonga Bible © Bible Society of Namibia, 2008.
