1 Itaku ka kala ku na ompito yokuhenuka uudhigu mbuka.
Omukwaniilwa gwokomeho
Evi lyomazimo gaSebulon nogaNaftali olya li lya dhinika, ihe konakuyiwa esimano otali ke ya koshikandjo shika okuza kEfuta lyopokati sigo okevi lyohandiyaka yaJordan, nokuGalilea, moka aakwiilongo ya kala.
2 Oshigwana she ende momilema,
otashi mono uuyelele owindji.
Oomboka ya kala momilema thokothoko,
uuyelele otau ya minikile.
3 Aantu oto ya shambudha noonkondo, Omuwa,
oto ya pe enyanyu enene.
Otaa nyanyukilwa koshipala shoye,
ngaashi aantu haa nyanyukwa, uuna taa teya iilya nenge taa topola oshihakanwa.
4 Oshoka ongoye wa teya ondjoko yawo ndjoka ya li ye yi uvitile uudhigu,
nowa tokola ongola ndjoka ye ya dhenge komapepe.
Omuwa, owa dhenge iigwana mbyoka ya hepeke aantu yoye,
naanaa ngaashi wa dhengele Aamidiana nale ndjiyaka.
5 Oongaku dhaahomoni noonguwo dhawo dha yaywa mombinzi
otadhi fikwa po.
6 Otwa valelwa omunona!
Otwa pewa omumati!
Epangelo olye; oli li komapepe ge.
Ota lukwa Omupukululi omukumithi,
Kalunga omunankondo, He yomuukwaaluhe,
Omuwa gwombili.
7 Uukwaniilwa we kau na mpoka tau hulu po,
noshilongo she otashi kala aluhe shi na ombili.
Ota ka kuutumba koshipangelapundi shaDavid ta lele oshilongo she.
Oonkondo dhe odha kankamekelwa keutho nokuuyuuki,
okuza nena sigo aluhe.
Uulaadhi wOmuwa Omunankondoawike otau shi ningi.
Omuwa ta pangula Israel
8 Omuwa okwa tumbulile oshilongo shaIsrael epangulo, a pangule oluvalo lwaJakob. 9 Aaisraeli ayehe, shaa ngoka a kala moshilando Samaria, ota ka tseya kutya shika okwe shi ninga. Ihe otayi inomo noya lunduka. Otaa ti: 10 “Oondhopi odha kumuka po, ihe otatu ka tunga po omakuma gomamanya ga hongwa. Omikwiyu odha hokoka po, ihe tse otatu ka tsika mo omisedeli.”
11 Omuwa okwe ya shongele aatondi yawo ye ya matukile. 12 Siria kuuzilo naFilistia kuuninginino oye ekama omakana gawo ya nine po Israel. Nomushika ondjahi yOmuwa inayi lota; okwooko kwe onatango kwa taganana.
13 Aaisraeli inayi itedhulula natango. Nando Omuwa Omunankondoawike okwe ya geele, inaa galukila kuye. 14 Polumwe Omuwa ota ka geela Israel naawiliki ye; ote ke ya teta omutse nomushila. 15 Aakuluntu naanenentu oyo omutse, naahunganeki mboka taa longo omalongo giifundja, oyo omushila. 16 Aawiliki yaantu mbaka oya ningi aapukithi, naawilikwa oya piyaganekwa thiluthilu. 17 Omolwashoka Omuwa ina hokwa aagundjukamati yawo noita sile nando aaselekadhi yawo noothigwa ohenda, oshoka aantu ayehe oyo aakaanakalunga naakolokoshi, naashihe shoka taa popi, oshiwinayi. Nopushika ondjahi yOmuwa inayi lota natango; okwooko kwe onatango kwa taganana.
18 Uukolokoshi waantu owa hwama wa fa epeya tali lungunitha po omano noondjoho. Owa taandela wa fa okuti taku pi notaku gundumuka olwithi. 19 Molwaasho Omuwa Omunankondoawike a geya, ondjahi ye oya hwama ya fa omulilo tagu lilima noshilongo tagu lungunitha po aantu, noitaa silathana ohenda. 20 Shaa mpoka moshilongo aantu otaa hakana nokulya po uundjagumuke wiikulya mboka taa mono, ihe itaa kuta. Nando naa lye po oyana, aawe, onkene tuu itaa kuta. 21 Aamanasse nAaefraim otaa matukilathana, noyo kumwe ayehe otaa ponokele Juda. Natango ondjahi yOmuwa inayi lota; okwooko kwe onatango kwa taganana.
© Oshindonga Bible © Bible Society of Namibia, 2008.
