Mika nezimo lyaDan
1 Pethimbo ndiyaka muIsrael kamwa li nando omukwaniilwa. Uuna ndwiyaka ezimo lyaDan olya li tali kongo ehala lyokukala, oshoka natango olya li inaali pewa ehala lyalyo lyene mokati komazimo gaIsrael. 2 Onkee aantu yaDan oya hogolola momagumbo gawo agehe miilando Soar neEshtaol aalumentu ya pyokoka nawa noye ya lombwele, ya ka ndaadhe evi. Sho ya yi mevi lyokoondundu dhaEfraim, oya kankama paandjaMika. 3 Manga nee ya li mpoka, oya dhimbulula iipopya yomugundjuka Omulevi. Onkee ya yi kuye e taa pula: “Oho longo shike mpaka? Olye e ku eta huno?”
4 Ye okwa yamukula: “Otu uvathana naMika, a fute ndje, sho te longo puye iilonga yuuyambi.”
5 Oyo ya ti kuye: “Alikana, tu kwatha, u pule Kalunga, ondjila yetu ndjika tatu ende ngele oyelago.”
6 Omuyambi okwa yamukula: “Inamu ipyakidhila owala, Omuwa ote mu sile oshimpwiyu mondjila ndjika.”
7 Onkee aalumentu mbaka yatano ya yi e taa ya moshilando Lajish. Oya mono kutya aantu oye li nawa yaa na okapethili kasha, ngaashi naanaa Aasidoni. Oyo aantu aanambili naamweni, mboka ihaaya tamanana nando onalye; oye na ashihe ye shi pumbwa. Oya kala kokule nAasidoni noyaa na ekwatathano naantu yalwe. 8 Aalumentu yatano sho ya galukile kuSoar naEshtaol, aangandjawo oye ya pula shoka ya dhimbulula. 9 Oya yamukula: “Ileni! Tu matukileni Lajish. Otwa mono evi nuuwanawa walyo. Inamu kuutumba owala tamu ongaonga; endeleleni! Undukeni, mu shi hakane! 10 Shimpa mwa thiki ko, otamu ka dhimbulula kutya aantu itaa fekele nando osha. Oshilongo oshinene. Oshi na ayihe omuntu te yi pumbwa, naKalunga okwa gandja ayihe kune.”
11 Onkee etanga lyaalumentu omathele gahamano yomezimo lyaDan oya yi muSoar naEshtaol ya homata. 12 Oya yi e taa yungu ontanda kuuninginino waKiriat Jearim muJuda. Omolwashoka ehala ndyoka natango tuu olya lukwa “Ontanda yaDan”.
13 Oya tsikile ya yi, sigo okaandjaMika kevi lyokoondundu dhaEfraim.
14 Nena aalumentu yatano mboka ya li ya ndaadhele oshilongo sha kunduka Lajish, oya ti kuyakwawo: “Omu shi shi tuu kutya megumbo limwe lyomwaangaka omu na oshimenka shoshiti sha kolongwa noshisiliveli? Omu na ishewe iimenka iikwawo nomapepenguwo. Otamu dhiladhila, tu ningeni ngiini?” 15 Nena oya yi maandjaMika, moka mwa kala omugundjuka Omulevi noye mu kundu. 16 Aakwiita mboka omathele gahamano ya homata ya za kuDan, oya li ya thikama posheelo. 17 Oondaadhi ndhoka ntano odha yi dhu ukilila megumbo e tadhi kutha mo oshimenka shoshiti sha kolongwa noshisiliveli, iimenka iikwawo nomapepenguwo, manga omuyambi a li posheelo pamwe naakwiita omathele gahamano.
18 Aalumentu sho ya yi maandjaMika e taa kutha mo iinima iidhilikwa, omuyambi okwe ya pula: “Otamu ningi shike?”
19 Oyo ya ti: “Mwena! Ino tya sha. Tu landula, u ninge omuyambi nomugandjindunge gwetu. Inashi opala nani okukala omuyambi muIsrael ashihe shi vule okukalela egumbo limwe?”
20 Shika osha shambukitha omuyambi, onkee okwa kutha iinima iidhilikwa e te ya landula. 21 Oyo ya piluka, ya ka tsikile nondjila yawo, noya tetekelitha aanona yawo, iimuna yawo niiniwe yawo yilwe. 22 Oya adhika ya ende oshinano shontumba okuza kegumbo, Mika sho i ithana aashiinda ye, ya ye kolugodhi. Oya adha Aadan 23 noye ya igidha. Aalumentu Aadan oya punguluka e taa pula Mika taa ti: “Oshike ano? Ongundu ndjono oyashike ayihe?”
24 Mika okwa yamukula: “Otamu dhiladhila ngiini, sho tamu ti: ‘Oshike ano?’ One mwa kutha po omuyambi gwandje niikalunga mbyoka nda hongo nomwa yi nayo. Nena onda kala po ihe nashike?”
25 Aalumentu Aadan oya ti: “Ihwepo, waa ye moohapu, opo aalumentu mbaka yaa geye, e taa ku dhenge. Nena ongoye noyaandjeni otamu si.” 26 Opo ihe oya tsikile nondjila yawo. Mika okwa dhimbulula kutya oye mu vule oonkondo, onkee okwa piluka e ta shuna kegumbo.
27-28 Aalumentu Aadan sho ya adhika ya kutha po omuyambi niinima mbyoka Mika a longekidha, oya ka matukila Lajish, oshilando shoka shaantu aanambili naamweni, shoka sha li molusilu lumwe naBetrehob. Oya dhipaga aakalimo e taa fike po oshilando. Kakwa li nando ogumwe te ya popile, oshoka Lajish osha li kokule naSidon noya li yaa na ekwatathano naantu yalwe. Aalumentu Aadan oya tungulula oshilando noya tula mo. 29 Oya lundulula edhina lyasho Lajish lya ningi Dan ye shi lukile hekulu Dan yaJakob. 30 Aalumentu Aadan oya dhike po oshimenka shaMika, opo ye shi simaneke. Jonatan yaGersom, omutekulu gwaMoses, okwa li omuyambi gwezimo lyaDan. Osho wo oluvalo lwe, sigo aantu ya falwa muupika. 31 Oshimenka shaMika osha kala ko ethimbo alihe, otenda yokusimanekela mo Kalunga sho ya li muShilo.
© Oshindonga Bible © Bible Society of Namibia, 2008.
