Israel ta sindi Og
(Num. 21:31-35)1 “Nosho twa hedha kuumbangalantu twa taalela oshilongo Baasha, omukwaniilwa Og okwe ya naakwiita ye ayehe, e tu kondjithe popepi noshilando Edrei. 2 Omuwa okwa lombwele ndje a ti: ‘Ino tila, otandi mu gandja naantu ye noshilongo she ashihe miikaha yoye. Mu ninga ngaashi wa ningi Sihon, omukwaniilwa gwAayamori ngoka a kala muHeshbon.’
3 “Omuwa okwa gandja Og naantu ye miikaha yetu, e tatu ya dhipaga po ayehe. 4 Pethimbo tuu ndyoka otwa kwata po iilando ye ayihe. Kakwa li nando oshimwe inaatu shi kwata po. Ayihe kumwe oya li iilando omilongo hamano — oshikandjo ashihe shaArgob, moka omukwaniilwa Og gwaBashan a li ta pangele. 5 Iilando ayihe mbika oya li ya tungwa nomakuma omale, nomiyelo nomalukambo goku dhi patitha; okwa li wo omikunda dhaa na omankolokuma. 6 Iilando ayihe otwe yi hanagula po notwa dhipaga aalumentu ayehe naakiintu naanona, naanaa ngaashi twe shi ningile Sihon, omukwaniilwa gwaHeshbon. 7 Otwa kutha po iimuna notwa yugu iilando.
8 “Pethimbo tuu mpoka otwa yugu aakwaniilwa mbeyaka yaali yAayamori evi lyokuuzilo waJordan, okuza komulonga Arnon sigo okondundu Hermon. 9 (Ondundu Hermon oya lukwa kAasidoni Sirjon nokAayamori Senir.) 10 Otwa lala oshilongo ashihe shaOg, omukwaniilwa gwaBaasha: iilando yoketumbalalovi, Gilead alihe naBashan alihe sigo okiilando Salka naEdrei kuuzilo.”
11 (Omukwaniilwa gwaBaasha Og oye a li Omurafe omuhugunini mokudhipagwa. Oshiketha she shomudhimba sha hongwa memanya osha li shuule woometa omugoyi noshomutamo gwoometa ne. Otashi monika moshilando shAayammoni Rabba.)
Omazimo ga tula kuuzilo waJordan
(Num. 32:1-42)12 “Sho twa lala oshilongo, onda pe omazimo gaRuben naGad oshilongo shokuumbangalantu woshilando Aroer popepi nomulonga Arnon noshitopolwa shoshilongo shokoondundu dhaGilead nomikunda dhasho. 13 Etatazimo lyaManasse onde li pe oshihupe shaGilead naBaasha alihe, moka Og a li ta pangele, kokutya oshitopolwa ashihe shaArgob.”
(Bashan osha li oshilongo shAarafa. 14 Jair gwomezimo lyaManasse okwa kutha po oshitopolwa ashihe shaArgob, kokutya Baasha, sigo ongamba yaGeshur naMaaka. Omikunda okwe dhi ilukile, nohadhi ithanwa omikunda dhaJair.)
15 “Gilead onde li gandja koludhi lwaMakir gwomezimo lyaManasse. 16 Omazimo gaRuben naGad onde ga pe oshitopolwa shaGilead sigo omulonga Arnon. Ongamba yokuumbugantu oya li pokati komulonga, nongamba yawo yokuumbangalantu oya li omulonga Jabbok, ngoka oshitopolwa shimwe shagwo sha li ongamba yAayammoni. 17 Kuuninginino oshitopolwa shawo osha taandela sigo omulonga Jordan, okuza kefuta lyaGalilea kuumbangalantu sigo okEfuta lyeso kuumbugantu noponyonga yondundu Pisga kuuzilo.
18 “Pethimbo tuu ndyoka onde ya pe omakumagidho taga ti: ‘Omuwa Kalunga ketu okwe mu pe evi ndika kuuzilo waJordan, mu li lale. Ngashingeyi ihomatekeni, ne aalumentu amuhe mboka tamu vulu okukondja, mu kwatele Aaisraeli ooyakweni komeho, mu tokole Jordan noku ya kwathela okulala evi lyawo. 19 Aakulukadhi yeni ayehe, aana yeni niimuna yeni — ondi shi shi kutya omu na iimuna oyindji — otayi kala po miilando nde yi mu pe. 20 Kwatheni Aaisraeli ooyakweni, sigo ya lala evi ndyoka Omuwa te li ya pe kuuninginino waJordan, sigo Omuwa te ya pe evululuko, ngaashi e mu ningile mpaka. Konima otamu ka galuka, mu ye kevi lyeni ndika nde li mu pe.’
21 “Onda lombwele Josua nda ti: ‘Owa mono ayihe mbyoka Omuwa Kalunga keni e yi ningile aakwaniilwa mbeyaka yaali, Sihon naOg. Osho ta ka ningila ayehe mboka tamu ka matukila evi lyawo. 22 Inamu ya tila, oshoka Omuwa Kalunga keni ote mu kondjele.’ ”
Moses ti indikwa okuya kuKaanan
23 “Pethimbo ndyoka onda galikana nda mana mo e tandi ti: 24 ‘Omuwa Omupangeliawike, ondi shi shi kutya owu ulukile ndje etameko lyiinima iinene niikumithi mbyoka to ka ninga. Kape na kalunga megulu nenge kombanda yevi ta vulu okulonga iilongankondo mbyoka wa longo! 25 Taagulukitha ndje Jordan, ndi ka mone evi ndyoka lyo opala handiyaka, oshilongo sho opala shokoondundu noondundu dhaLibanon.’
26 “Ihe Omuwa okwa geele ndje molweni noina hala okupulakena ndje. Okwa ti owala: ‘Opuwo tuu ngaaka! Mwena nokuli, ino popya we nangame! 27 Londa kondungu yondundu Pisga e to tala lwokuumbangalantu nolwokuumbugantu, kuuzilo nokuuninginino. Lengalenga u tale nawa shoka to mono, oshoka ito ka taaguluka Jordan nando okuli. 28 Nongeka Josua. Mu tsa omukumo noku mu koleka, oshoka oye ta ka wilika oshigwana shi tokole Jordan, opo shi ka lale evi ndyoka to li tala.’
29 “Otwa kala mesilu lya taalelathana noshilando Betpeor.”
© Oshindonga Bible © Bible Society of Namibia, 2008.
