EHOLOLO 3 - Oshindonga Bible (ONDB)

Kegongalo lyokuSarde

1 “Nyolela omuyengeli gwegongalo lyomuSarde, u tye:

“ ‘Ngoka e na oombepo ndhoka heyali dhaKalunga noonyothi heyali, ota ti:

“ ‘Iilonga yoye ondi yi shi; ou na esimano wa fa u na omwenyo, ihe owa sa. 2 Onkee ano tonata, ngoye u koleke mboka ye li po natango, manga inaaya pwa po. Oshoka onda dhimbulula kutya iilonga yoye inayi gwana natango koshipala shaKalunga kandje. 3 Dhimbulukwa ano shoka wa longwa nankene we shi uvu. Vulika e to itedhulula, u ethe uulunde woye. Ngele ito tonata, nena ngame otandi ke ya kungoye ombaadhilila noito ka tseya nando ethimbo ndyoka tandi ya kungoye. 4 Ihe yamwe yomune, ne Aasarde, inaa nyateka oonguwo dhawo. Oyo otaa ka enda pamwe nangame ya zala oonguwo oontokele, oshoka oya gwana oku shi ninga. 5 Oomboka taa sindana, otaa ka zalekwa ngeyi oonguwo oontokele, nomadhina gawo itandi ke ga dhima mo membo lyaanamwenyo. Ongame otandi ka hempulula koshipala shaTate nomontaneho yaayengeli ye kutya oyo oyandje.

6 “ ‘Ngoka e na omakutsi, nu uve ko shoka Ombepo te shi lombwele omagongalo.’ ”

Kegongalo lyokuFiladelfia

7 “Nyolela omuyengeli gwegongalo lyomuFiladelfia, u tye:

“ ‘Omuyapuki nOmunashili, ngoka e na iipatululo yaDavid, oongoka he egulula nokaku na ngoka ta vulu okweedhila, nohe edhile nokaku na ngoka ta vulu okweegulula, ota ti:

8 “ ‘Iilonga yoye ondi yi shi; onda tseya kutya ou na owala uunkondo uushona, ihe owa dhiginine oohapu dhandje nowa li omwiinekelwa. Onde ku egululile osheelo nokaku na nando omuntu ta vulu oku shi edhila po. 9 Pulakena! Ongundu yaantu yaSatana, mboka haa fundju nohaa iti Aajuda, ihe hayo, otandi ke ye ku pa, ye ku tsile oongolo. Oyo otaa ka tseya kutya ondi ku hole. 10 Ano sho wa dhiginine oohapu dhandje nowi idhidhimike, nangame wo otandi ke ku hupitha mo momathimbo omadhigu ngoka tage ya muuyuni auhe okumakela aantu ayehe mboka ye li kombanda yevi. 11 Ongame otandi ya mbala. Dhiginina shoka u shi na, opo waa yugwe nando okomuntu ondjambi yoye yesindano. 12 Oongoka ta sindana, otandi ke mu ninga ongundhi motempeli yaKalunga kandje, oye noita ka za mo we. Ongame otandi ke mu nyola edhina lyaKalunga kandje nedhina lyoshilando shaKalunga kandje, Jerusalem oshipe, shoka tashi ka za megulu kuKalunga kandje. Otandi ke mu nyola edhina lyandje epe.

13 “ ‘Ngoka e na omakutsi, nu uve ko shoka Ombepo te shi lombwele omagongalo.’ ”

Kegongalo lyokuLaodikea

14 “Nyolela omuyengeli gwegongalo lyomuLaodikea, u tye:

“ ‘Oongoka Amen, omwiinekelwa, omuhokololi omunashili nekota lyiishitwa ayihe yaKalunga ota ti:

15 “ ‘Iilonga yoye ondi yi shi; onda tseya kutya ku shi omutalala nenge omupyu. Ando wa kala omutalala nenge omupyu, ando hwepo. 16 Ihe sho u na owala okayenye okashona, waa shi omupyu nenge omutalala, otandi ku kungu mo mokana kandje. 17 Oto ti kutya ongoye omuyamba u li nawa noku na sho wa pumbwa. Ihe ino tseya nani kutya ongoye ohepelelela? Ongoye ohepele, u li olutu lwowala nomuposi. 18 Otandi ku tsu omayele, u ye kungame, u ilandele oshingoli, oshingolilela, u ninge omuyamba. Ilandela omuzalo omutokele, u siikile epenge lyoye. Ilandela wo omuti, u tule momeho goye, opo u mone ko. 19 Ayehe mboka ndi ya hole, ohandi ya geele nohandi ya dhenge. Itedhulula ano wa mana mo. 20 Tala, onda thikama posheelo notandi konkola. Ngele ku na ngoka tu uvu ewi lyandje note egulula ndje, otandi ya maandjawo e tatu li uulalelo pamwe naye. 21 Oongoka ta sindana, otandi mu kuutumbike pungame koshipangelapundi shandje, naanaa ngaashi ngame nda sindana e te kuutumba puTate koshipangelapundi she.

22 “ ‘Ngoka e na omakutsi, nu uve ko shoka Ombepo te shi lombwele omagongalo.’ ”