Omakumagidho gaNatan neitedhululo lyaDavid
1 Omuwa okwa tumu omuhunganeki Natan kuDavid. Natan okwa yi kuye e ta ti: “Momukunda gumwe omwa li mu na aalumentu yaali; gumwe okwa li omuyamba, nomukwawo okwa li ohepele. 2 Omuyamba okwa li e na iimuna oyindji, oonzi noongombe, 3 manga ohepele okwa li e na okanzi kamwe, nkoka e ka landa. Okwe ka palutha niikulya ye mwene, noka kokele maandjawo pamwe noyana, haka nwine moshitenga she mwene nohaka lala mekolo lye. Okanzi oka li ka fa omwana omukadhona. 4 Esiku limwe omuyenda okwe ya kegumbo lyomuyamba. Omuyamba ka li a hala a dhipage po shimwe shomiimuna ye, a telekele omuyenda gwe, ihe okwa kutha po okanzi kohepele e te ka telekele po omuyenda gwe.”
5 David okwa geele omuyamba noonkondo e ta ti: “Otandi gana kuKalunga omunamwenyo kutya omuntu ngoka oku na okusa, sho a longo ngaaka! 6 Sho a longo iihuna yi thike mpoka, oku na okufuta lune shi vulithe shoka a kutha.”
7 Natan okwa ti kuDavid: “Omulumentu ngoka ongoye. Omuwa Kalunga kaIsrael ota ti ngeyi: ‘Onde ku ningi omukwaniilwa gwaIsrael nonde ku yugulula miikaha yaSaul. 8 Onde ku pe oshilongo she naakiintu ye; onde ku kwaniileke, u pangele Israel naJuda. Nongele mbika inayi gwana, ando onda li ndi na oku yi ku pa lwaali nokuli. 9 Omolwashike ano wa dhini iipango yandje? Omolwashike wa ningi iinima iiwinayi ya tya ngeyi? Owa dhipagitha Uria miita; we mu dhipagitha kAayammoni e to kutha po omukiintu gwe! 10 Kongashingeyi egongamwele itali ka gamuka ezimo lyoye, oshoka wa dhini ndje nowa yugu po omukulukadhi gwaUria. 11 Otandi ku ganene kutya otandi ka pendutha gumwe gwomegumbo lyoye mwene, ngoka te ke ku etela uudhigu. Oto ke shi mona, sho tii ke ku kutha aakiintu yoye e tandi ya gandja kugulwe; noye ta ka lala nayo moshanga shomutenya. 12 Ngoye owe shi ningi meholamo, ihe ngame otandi ke shi ningitha moshanga shomutenya montaneho yAaisraeli ayehe.’ ”
13 David okwa ti: “Ngame onda yono kuKalunga.”
Natan okwa yamukula a ti: “Omuwa okwe ku dhimine po; ito ka sa we. 14 Ihe sho wa holola ondhino ya tya ngaaka yokudhina Omuwa, e to ningi ngeyi, okanona koye otaka si.” 15 Nena Natan okwa yi kaandjawo.
Eso lyokanona kaDavid
Kalunga okwa gombokitha okanona nkoka ka valelwa David komukiintu gwaUria; oka li taka alukililwa. 16 David okwa galikana Kalunga, opo okanona ka aluke. Okwa tindi okulya iikulya, uusiku okwa yi momutala gwe nokwa kala a lala pevi. 17 Aambala ye aakuluntu oya yi kuye noya kambadhala oku mu pendutha, ihe okwa tindi noina hala okulya pamwe nayo. 18 Mesiku etiheyali okanona oka si, naambala ye oya tila oku mu lombwela kutya okanona ka sa. Oya ti: “Okanona sho ka li ke na omwenyo, David ine tu yamukula, sho twe mu popitha. Otatu vulu oku mu hokololela ngiini kutya okanona ka si? Otashi vulika i imonithe oshiponga.”
19 David sho a ndhindhilike kutya aambala ye otaa nongonenathana, okwa dhimbulula kutya okanona oka sa. Onkee okwe ya pula a ti: “Okanona oka sa?”
Oya yamukula ya ti: “Eeno, oka si.”
20 David okwa yambuka po pevi, okwi iyogo, okwi igwayeke nokwi ikamula nawa e ta zala oonguwo dhilwe. Nena okwa yi mongulu yOmuwa e ta galikana. Sho a galukile muuwa, okwa pula a pewe iikulya nokwe yi li po mbala, sho e yi etelwa. 21 Aambala ye oya ti kuye: “Shika katu shi uvite ko nande. Okanona manga ka li ke na omwenyo, owe ka lili noino hala nando okulya; ihe nanziya okanona sho ka si, owa yambuka po e to li!”
22 David okwa yamukula a ti: “Eeno, ondi idhilike iikulya nonda lili, manga ka li ke na omwenyo. Onda dhiladhila kutya Kalunga pamwe ota sile ndje ohenda noita pitika, okanona ka se. 23 Ihe ngashingeyi sho ka si, otandi idhilikile we shike? Itandi vulu we oku ka galulila omwenyo. Esiku limwe onandi ka ya ngaa nkoka ke li, ihe ko itaka vulu okugalukila kungame.”
Salomo ta valwa
24 Nena David okwa hupulutha omukadhi Batseba. Okwa lala naye e ta vala okamati, nkoka David e ka luku Salomo. Omuwa okwa li e hole okamati haka 25 e ta lombwele omuhunganeki Natan, a luke okamati Jedidja, oshoka Omuwa okwa li e mu hole.
David ta kwata po Rabba
(1 Ondjal. 20:1-3)26 Joab okwa tsikile okumatukila Rabba, oshilandolelo shaAmmon, nokwa li poku shi lala. 27 Okwa tumu aatumwa kuDavid, ye mu tseyithile taa ti: “Onda ponokele Rabba nonda kwata po eha lyomeya. 28 Ngashingeyi hiya omatanga goye ngoka ga kala hoka, u ponokele oshilando, u shi sinde ngoye mwene. Ngame ine hala ku tiwe, ongame nde shi kwata po.” 29 Osho ngaaka David okwa gongele omatanga ge, a yi kuRabba, e shi ponokele e te shi lala. 30 Komutse gwoshimenka shAayammoni, edhina lyasho Milkom, David okwa kutha ko oshishani shuudhigu wookilohalama omilongo ndatu nantano sha tya okawe kondilo. David okwe shi zala komutse gwe mwene. Okwa yangudhula wo omaliko ogendjigendji moshilando. 31 Aantu yasho okwe ya tula miilonga yiisaaha, yoombike noyomakuya, nokutholoma oondhopi. Aantu ayehe yomomikunda dhilwe dhAayammoni okwe ya ningile sha faathana. Nena okwa galukile naantu ye kuJerusalem.
© Oshindonga Bible © Bible Society of Namibia, 2008.
