1 Ontumwafo ndjika oya zi kuPaulus, omumati gwaKalunga nomuyapostoli gwaJesus Kristus.
Ngame onda hogololwa nonda tumwa, ndi kwathele eitaalo lyaahogololwa yaKalunga noku ya thikitha moshili tayi zi meitaalo lyetu, 2 ndyoka li na ekankameno ketegameno lyomwenyo gwaaluhe. Kalunga ngoka ihaa fundju, okwe tu uvanekele omwenyo gwaaluhe, manga uuyuni inaau shitwa. 3 Euvaneko ndika okwe li holola pethimbo lyo opala mevaangeli nopalombwelo lyaKalunga, Omuhupithi gwetu, ngame ondi inekelelwa okuuvitha elaka ndika etoye.
4 Otandi nyolele Titus, omumwandjelela paitaalo lyetu limwe.
Esilohenda nombili yaKalunga Tate noyOmukulili gwetu Jesus Kristus nayi kale nangoye.
Titus ta longo muKreta
5 Onde ku thigi muKreta, opo u pongolole iinima mbyoka ya pumbwa okutulwa melandulathano nou hogolole aakuluntu yegongalo momukunda kehe. Dhimbulukwa omalombwelo gandje: 6 Omukuluntu gwegongalo oku na okukala kee na oshipo, e na owala omukiintu gumwe, oyana oye na okukala ooitaali, inaa uvikila uupwidhi nenge okwaavulika. 7 Omuwiliki gwegongalo oye omusilishimpwiyu megumbo lyaKalunga, ngoka e na okukala kee na oshipo, hamutuwalali, hamugeentu, hankolwi, hamupwidhi nohamukongi gweliko nomakoto. 8 Oye oku na okukala ha yakula aayenda, ha longo uuwanawa, hi ikwata nawa, omuyuuki, omuyapuki nomwiidhiliki. 9 Oye oku na okudhiginina ohapu ndjoka yi shi kwiinekelwa noya tsa kumwe nelongo lyetu. Pamukalo nguka ota ka vula ihe okutsa yalwe omukumo, ya kale melongo lyashili nokuholola omapuko gaamboka taye li kondjitha.
10 Oshoka unene mokati kaamboka ya zi meitaalo lyopaShijuda omu na aapopyagani oyendji, ihaa vulika notaa pukitha yalwe noongano dhawo. 11 Okupopya kwawo oku na okumwenekwa, oshoka otaa piyaganeke omagumbo nokuli nokulonga aantu shoka inaashi opala notaye shi ningi nelalakano lyokukonga eliko. Shika otashi sitha ohoni! 12 Omuhunganeki gumwe gwawo Omukreta okwa tile: “Omulumentu Omukreta oye omufundja noshilikama oshiwinayi. Oye oku li owala melalangali nomuufukedhi.” 13 Omukreta nguka okwa popi dhoshili. Onkee ano ou na oku ya ganda, opo ya taambe eitaalo lyu uka, 14 yo yaa ikwatelele koongano dhAajuda nokiipango yaantu mboka ye etha oshili. 15 Kehe shimwe osha yogoka kwaamboka ya yogoka muyo yene; ihe kaku na shoka sha yogoka kwaamboka ya nyata muyo yene noyaa shi ooitaali, oshoka omadhiladhilo gawo neiyuvo lyawo olya nyata. 16 Oyo otaa ti kutya oya tseya Kalunga, ihe iilonga yawo itayi shi holola. Okukala kwawo okwo iikungitha, ihaa vulika yo itaa vulu okulonga uuwanawa nando owasha.
© Oshindonga Bible © Bible Society of Namibia, 2008.
