Ohango yomuna gwokombanda
(Luk. 14:15-24)1 Jesus okwe ya lombwele ishewe momayele a ti: 2 “Oshilongo shegulu otashi yelekwa nomukwaniilwa a longekidhile omwana omumati oshituthi shohango. 3 Oye okwa tumu aamati ye, ye ki ithane aahiywa, ye ye koshituthi, ihe oya li inaa hala okuya. 4 Onkee okwa tumununa ko aamati yalwe e ta ti: ‘Lombweleni aahiywa kutya ngashingeyi oshituthi shandje onde shi longekidha, oondumetana niimuna yo ondodhwa oya tselwa, ashihe osha longekidhwa. Ileni kohango.’ 5 Ihe aahiywa oya li kaaye na ko nasha; oyo ya yi. Gumwe okwa yi kepya lye, nomukwawo okwa ka halitha. 6 Ooyakwawo oya kwata aamati ye, oye ya hepeke e taye ya dhipaga. 7 Omukwaniilwa okwa geye ihe, okwa tumu ko aakwiita ye, okwa hanagula po aadhipagi mboka nokwa fike po oshilando shawo. 8 Oye a ti kaamati ye: ‘Oshituthi shohango osha pwa okulongekidhwa, ihe aahiywa inaye shi opalela. 9 Indeni ano koompagiila dhoondjila, ayehe mboka tamu mono, ya hiyeni kohango.’ 10 Aamati oya yi noondjila noye eta mo ayehe mboka ya mono, aawinayi naawanawa, ohango noyu udha aayenda.”
11 “Ano omukwaniilwa sho a yi okutala aayenda, okwa mono mo omuntu gumwe kee na onguwo yoshituthi. 12 Oye okwe mu pula: ‘Kuume, owe ya mo ngiini muka waa na onguwo yoshituthi?’ Ihe oye okwa mwena. 13 Nena omukwaniilwa okwa ti kaamati ye: ‘Mu mangeni omaako nomagulu, ne mu mu umbile momilema dhopondjelela.’ Omo hamu kala elilagano neikokoto lyomayego.”
14 “Oshoka oyendji oyi ithanwa, ihe aashona ya hogololwa.”
Epulo kombinga yokufuta oompale
(Mrk. 12:3-17Luk. 20:20-26)15 Nena aafarisayi oya yi noya kundathana, nkene ye na okuyula Jesus moohapu. 16 Oyo ya tumu kuye aalongwa yawo pamwe naamboka ya gama kuHerodes ya ti: “Muhongi, otu ku shi kutya ongoye omunashili, iho ipula nomadhiladhilo gaantu noiho tala olupe lwomuntu. 17 Tu lombwela, oto ti ngiini, osho opala okupa omupangeli Omuroma oompale, nenge inashi opala?”
18 Jesus sho a dhimbulula uuwinayi wawo, okwa ti: “Aafudhime ne, omolwashike tamu makele ndje? 19 Ulukilii ndje oshimaliwa shoshene!” Oyo oye mu pe oshimaliwa oshisiliveli. 20 Jesus okwe ya pula a ti: “Efano ndino nenyolo li li ko, olyalye?”
21 Oyo ya yamukula: “Olyomupangeli Omuroma.”
Nena Jesus okwe ya lombwele a ti: “Ano shono shomupangeli, shi peni omupangeli, naashoka shaKalunga, shi peni Kalunga.”
22 Sho ye shi uvu, oya kumwa noye mu thigi po e taa yi.
Epulo kombinga yeyumuko
(Mrk. 12:8-27Luk. 20:7-40)23 Esiku tuu ndyoka yamwe yomaasadukayi, mboka haa ti, kaku na eyumuko, oye ya kuJesus noye mu pula e taa ti: 24 “Muhongi, Moses okwa tile: ‘Ngele ku na omulumentu inaa mona oluvalo, e ta si, nena omukiintu gwe na hokanwe po komumwayina, opo nakusa a monenwe oluvalo.’ 25 Putse mpaka opwa li aalumentu aamwayinathana yaheyali. Omutango okwa hokana nokwa si kee na oluvalo, ihe okwa thigile mumwayina omukiintu gwe. 26 Osho omutiyali nomutitatu osigo tuu ayehe yaheyali. 27 Hugunina omukiintu okwa si wo. 28 Ano uuna aasi taa ka yumudhwa, ota ka ninga gwalye mwaambaka yaheyali?” 29 Jesus okwe ya yamukula a ti: “Ne omwa puka, ne inamu tseya Omanyolo omayapuki nosho wo oonkondo dhaKalunga. 30 Oshoka uuna aasi taa ka yumudhwa, itaa ka hokana noitaa ka hokanwa, aawe, megulu otaa ka kala ngaayengeli yaKalunga. 31 Ihe kombinga yeyumuko lyaasi inamu lesha nani ndhoka mwe dhi lombwelwa kuKalunga, sho ta ti: 32 ‘Ongame Kalunga kaAbraham, Kalunga kaIsak naKalunga kaJakob.’ Shika tashi ti, ke shi Kalunga kaasi, aawe, okaanamwenyo.”
33 Aantu sho ye dhi uvu, oya kuminwa elongo lye.
Oshipango oshinene
(Mrk. 12:28-34Luk. 10:25-28)34 Aafarisayi sho yu uvu, Jesus a tompo aasadukayi, oya gongala. 35 Gumwe gwomuyo, omunongompango, okwe mu makele ta ti: 36 “Muhongi, oshipango oshinene shomompango oshini po?”
37 Jesus okwa ti kuye: “ ‘Hola Omuwa Kalunga koye komutima gwoye aguhe nokomwenyo gwoye aguhe nokomadhiladhilo goye agehe.’ 38 Shika osho oshipango oshinene noshotango. 39 Oshitiyali shi thike pusho osho shika: ‘Hola mukweni ngaashi ngoye wi ihole mwene.’ 40 Ompango ayihe nomahunganeko agehe oya kwatelelwa miipango mbika iyali.”
Kristus omuna gwalye
(Mrk. 12:5-37Luk. 20:1-44)41 Aafarisayi sho ya adhika ya gongala, Jesus okwe ya pula: 42 “Kristus otamu mu dhiladhila ngiini? Oye omuna gwalye?”
Oyo ya ti: “OgwaDavid.”
43 Jesus okwe ya pula a ti: “Omolwashike ano David te mu ithana mewiliko lyOmbepo, Omuwa? Oshoka David okwa ti:
44 ‘Omuwa okwa lombwele Omuwa gwandje:
Kala omutumba kolulyo lwandje,
sigo tandi lyatele aatondi yoye kohi yoompadhi dhoye.’
45 Ano David ngele okwe mu ithana Omuwa, ano Kristus omuna gwaDavid pamukalo guni?”
46 Okuza kesiku tuu ndyoka kakwa li we ngoka a wapa oku mu yamukula nando ohapu yimwe, nokakwa li ngoka a vulu oku mu pula sha.
© Oshindonga Bible © Bible Society of Namibia, 2008.
