Elia ta yi megulu
1 Ethimbo olya thikana, Omuwa a fale Elia kegulu moshikungulu. Elia naElisa oya zi muGilgal, 2 nomondjila Elia okwa ti kuElisa: “Kala mpaka, oshoka Omuwa okwa tumu ndje kuBetel.”
Ihe Elisa okwa yamukula a ti: “Otandi gana kOmuwa omunamwenyo nokungoye kutya itandi ku thigi po.” Osho ngaaka ya yi kuBetel.
3 Ongundu yaahunganeki mboka ya kala nkoka, oya yi kuElisa e taye mu pula taa ti: “Ou shi shi tuu kutya Omuwa ota ka kutha po mwene gwoye pungoye nena?”
Elisa okwa yamukula a ti: “Ee, ondi shi shi, ihe inamu shi popya.”
4 Nena Elia okwa ti kuElisa: “Kala mpaka, oshoka Omuwa okwa tumu ndje kuJeriko.”
Ihe Elisa okwa yamukula a ti: “Otandi gana kOmuwa omunamwenyo nokungoye kutya itandi ku etha po.” Oyo noya yi kuJeriko.
5 Ongundu yaahunganeki mboka ya kala nkoka, oya yi kuElisa noye mu pula ya ti: “Ou shi shi tuu kutya Omuwa ota ka kutha po mwene gwoye nena pungoye?”
Elisa okwa yamukula a ti: “Ee, ondi shi shi, ihe inamu shi popya.”
6 Nena Elia okwa ti kuElisa: “Kala mpaka, oshoka Omuwa okwa tumu ndje komulonga Jordan.”
Ihe Elisa okwa yamukula a ti: “Otandi gana kOmuwa omunamwenyo nokungoye kutya itandi ku etha po.” Oyo noya tsikile ondjila. 7 Nongundu yaahunganeki omilongo ntano oye ya landula kuJordan. Elia naElisa oya thikama pomulonga, naahunganeki mbeyaka omilongo ntano oya thikama lwopopepi nayo. 8 Nena Elia okwa kutha elwaakani lye, e li gonyo e te li dhenge omeya. Omeya oga topoka pokati, Elia naElisa noya tokola Jordan puukukutu e taa yi handiyaka. 9 Hwiyaka Elia okwa ti kuElisa: “Lombwela ndje shoka wa hala ndi ku ningile, manga inaandi kuthwa po.”
Elisa okwa yamukula a ti: “Otandi ku galikana, thigululitha ndje iitopolwa iyali yomombepo yoye mbyoka tayi ningitha ndje omulanduli gwoye.”
10 Elia okwa yamukula a ti: “Eindilo ndika edhigu okugwanitha, ihe oto ke yi pewa, ngele oto mono ndje, sho te kuthwa po pungoye; ihe ngele ito mono ndje, nena ito pewa sha.”
11 Oya li taa kundathana, manga taye ende. Ohaluka etemba lyomulilo tali hilwa kuukambe womulilo, olye ya pokati kawo, naElia okwa kuthwa po a falwa megulu moshikungulu. 12 Elisa okwe shi mono e ti igidha Elia ta ti: “Tate, tate! Etemba lyaIsrael naakawili yalyo!” Sigo ke mu wete we.
Moluhodhi Elisa okwa tuula elwaakani lye pokati miitopolwa iyali. 13 Okwa toola po elwaakani lyaElia ndyoka lye mu gu e ta shuna nokwa thikama pomunkulo gwaJordan. 14 Okwa dhenge omeya nelwaakani lyaElia e ta ti: “Omuwa, Kalunga kaElia, ou li peni?” Nena okwa dhenge omeya ishewe, ogo noga topoka. Okwa taaguluka a yi handiyaka. 15 Aahunganeki mbeyaka omilongo ntano yokuJeriko oye mu mono noya ti: “Ombepo yaElia oyi li muElisa!” Oya yi, ye mu tsakaneke. Oye mu inyongamene 16 e taa ti: “Mpaka otu li po omilongo ntano, atuhe otwa kola. Tu etha, tu ka konge mwene gwoye. Pamwe ombepo yOmuwa oye mu fala e tayi mu thigi mondundu yontumba nenge molusilu lwapenipeni.”
Elisa okwa yamukula a ti: “Aawe, inamu ya ko.”
17 Ihe oye mu thiminike, sigo e ya pitika, ya ye. Mbeyaka omilongo ntano oya yi e taa kongo Elia koondundu nomomasilu omasiku gahetatu, ihe inaye mu mona. 18 Nena oya galukile kuElisa, ngoka a li a tegelela puJeriko e ta ti kuyo: “Inandi mu lombwela kutya inamu ya ko?”
Iilongandhindhiliko yaElisa
19 Aantu yamwe ya zi muJeriko, oya yi kuElisa e taa ti: “Ou shi shi naanaa, tatekulu, kutya oshilando shika oshiwanawa, ihe omeya gamo omawinayi, naakiintu olwindji ohage ya gwithitha mo omala.”
20 Elisa okwa ti: “Tuleni omongwa mokayo okape ne mu ka ete kungame.” Oye ka eta kuye, 21 noye okwa yi koluthithiya e ta pimpile omongwa momeya e ta ti: “Omuwa ota ti: ‘Omeya ngaka otandi ga ningi omayelele noitaga ka sitha we nenge ga gwithithe mo ela.’ ” 22 Omeya noga ningi omayelele sigo onena, opahapu dhaElisa ndhoka a popi.
23 Elisa okwa thigi po Jeriko u uka kuBetel, nomondjila okwa tsakaneke aamati yamwe taa zi koshilando e taye mu nyenkele taa ti: “Za po, angwala! Angwala, inda!”
24 Elisa okwa pungulukile kuyo e te ya geele nokwe ya thingi medhina lyOmuwa. Opo ihe omamwanka gaali omanyali oga hituluka miihwa e taga nyanyagula aagundjuka omilongo ne nayaali.
25 Elisa okwa tsikile ondjila sigo okondundu Karmel, nokonima okwa ka galukila kuSamaria.
© Oshindonga Bible © Bible Society of Namibia, 2008.
