Emoniko lyondhinga yembo tayi tuka
1 Onda ligamene ishewe, nopethimbo ndika onda mono ondhinga yembo tayi tuka mewangandjo. 2 Omuyengeli okwa pula ndje: “Ou wete shike?” Ngame onda yamukula: “Ondhinga yembo tayi tuka mewangandjo; oyi na uule woometa omugoyi nomutamo gwoometa ne netata.”
3 Nena omuyengeli okwa ti kungame: “Muyo omwa nyolwa etulomutima ndyoka tali adha evi alihe. Kombinga yimwe yondhinga otaku tiwa kutya omufuthi kehe ota ka kuthwa mo moshilongo; nokombinga onkwawo otaku tiwa kutya shaa ngoka ha popi iifundja mokugana, ota ka kuthwa mo. 4 Omuwa Omunankondoawike ota ti kutya ota ka tuma etulomutima ndika, notali ka adha egumbo lyomufuthi kehe negumbo lyakehe ngoka ha popi iifundja mokugana. Otali ka kala momagumbo gawo, notaa ka teka po.”
Omukiintu e li meshungu
5 Omuyengeli okwa holoka ishewe e ta ti: “Tala! Otaku zi sha!”
6 Onda pula nda ti: “Oshike?”
Okwa yamukula: “Osho eshungu tali yeleke oondjo dhoshilongo ashihe.”
7 Eshungu olya li li na oshisiikilo sha ningwa moholo. Sho nda tongolola, eshungu olya suukululwa, omo nomwa li omukiintu a kuutumba. 8 Omuyengeli okwa ti: “Omukiintu oku lile po aantu aagoyoki.” Nena okwe mu tula meshungu nokwe li siikile. 9 Onda ligamene nonda mono aakiintu yaali taa tuka yu uka kungame ye na omawawa omanene ga fa gakandoko. Oya kutha po eshungu e taa tuka nalyo. 10 Onda pula omuyengeli: “Otaye li fala peni?” 11 Okwa yamukula: “OkuBabilon, nkoka taa ke li tungila otempeli. Otempeli ngele ya pu okutungwa, eshungu otali ka tulwa mo, opo li simanekwe.”
© Oshindonga Bible © Bible Society of Namibia, 2008.
