Jehoahas, omukwaniilwa gwaIsrael
1 Momumvo omutimilongombali nandatu gwepangelo lyaJoas yaAhasia omukwaniilwa gwaJuda, Jehoahas yaJehu okwa ningi omukwaniilwa gwaIsrael nokwa lele muSamaria omimvo omulongo naheyali. 2 Okwa yono, sho a landula oondjila dhaJeroboam yaNebat, ngoka a yono kOmuwa nokwa fala Israel muulunde; ine etha oondjila dhe oombwinayi. 3 Omolwashoka Omuwa okwa geele Israel e ta pitika, omukwaniilwa gwaSiria Hasael nomwana Benhadad ya sinde Israel omathimbo nomathimbo. 4 Nena Jehoahas okwa galikana Omuwa. Omuwa okwa yamukula omagalikano ge, oshoka okwa mono, nkene omukwaniilwa gwaSiria ta hepeke Aaisraeli noonkondo. 5 Omuwa okwa penduthile Israel omuwiliki, ngoka e ya mangulula miikaha yAasiria. Aaisraeli oya kala ye na ombili, ngaashi ya kala nale. 6 Ihe natango tuu inaa etha uulunde mboka ya falwa mo kuJeroboam. Oya tsikile oku u ninga, noshiyelekela shoshikalungakiintu Asheera osha kala muSamaria.
7 Jehoahas okwa kanitha aakwiita ye ayehe, kakele kaakawilinkambe omilongo ntano nomatembakwiita omulongo naakwiita yokolupadhi omayuvi omulongo, oshoka omukwaniilwa gwaSiria okwa li e ya hanagula po e te ya lyatele pevi ngaashi ontsi.
8 Ashihe shilwe shoka Jehoahas a ningi niilonga ye ayihe yuupenda oya nyolelwa membo lyondjokonona yaakwaniilwa yaIsrael. 9 Okwa si nokwa fumvikwa muSamaria nomwana Jehoas okwe mu landula muukwaniilwa.
Jehoahas, omukwaniilwa gwaIsrael
10 Momumvo omutimilongondatu naheyali gwepangelo lyomukwaniilwa gwaJuda Joas, Joahas yaJohoahas okwa ningi omukwaniilwa gwaIsrael e ta lele muSamaria omimvo omulongo nahamano. 11 Naye wo okwa yono kOmuwa e ta landula oshiholelwa oshiwinayi shomukwaniilwa Jeroboam, ngoka a fala Israel muulunde.
12 Ashihe shilwe shoka Jehoas a ningi, mwa kwatelelwa uufule we miita okukondjitha omukwaniilwa gwaJuda Amazia, osha nyolelwa membo lyondjokonona yaakwaniilwa yaIsrael. 13 Jehoas okwa si e ta fumvikwa moombila dhaakwaniilwa muSamaria, nomwana Jeroboam okwe mu landula muukwaniilwa.
Eso lyaElisa
14 Omuhunganeki Elisa okwa kwatwa kuuvu. Sho a li popepi nokusa, omukwaniilwa Jehoas okwe ya oku mu talela po. Okwe ya ta lili ta ti: “Tate, tate! Etemba lyaIsrael naakawili yalyo!”
15 Elisa okwe mu lombwele ta ti: “Inda, u ka tale uutati niikuti.” Jehoas okwe shi ningi, 16 Elisa nokwe mu lombwele, a pameke oshikuti monkandja. Omukwaniilwa okwe shi ningi. Elisa okwa tula iikaha ye kiikaha yomukwaniilwa. 17 Nena palombwelo lyomuhunganeki omukwaniilwa okwe egulula ekende ndyoka lya taalela lwokuSiria. Elisa okwa ti: “Umba!” Nanziya sho omukwaniilwa u umbu, omuhunganeki okwi igidha a ti: “Ngoye oshikuti shOmuwa shoka ta ka sinda nasho Siria. Oto ka kondjitha Aasiria muAfek, sigo to ya dhenge.”
18 Nena Elisa okwa ti komukwaniilwa: “Kutha iikuti yilwe e to dhenge nayo pevi.” Omukwaniilwa okwa dhenge pevi lutatu e ta mwena. 19 Shika osha geyitha Elisa e ta ti komukwaniilwa: “Ando wa dhengele lutano nenge luhamano, ando owa ka sinda Aasiria thilu; ihe nena oto ke ya dhenga ashike lutatu.”
20 Elisa okwa si nokwa fumvikwa.
Omumvo kehe aayugani Aamoabi oya matukile moshilongo shaIsrael. 21 Esiku limwe manga aalumentu yamwe yi ipyakidhila okufumvika omudhimba gwontumba, oya mono ongundu yaayugi. Oyu umbile omudhimba mombila yaElisa e taa fadhuka po. Nanziya omudhimba sho gwa gumathana niipongo yaElisa, omulumentu okwa yumuka e ta yambuka po.
Iita pokati kaIsrael naSiria
22 Omukwaniilwa gwaSiria Hasael okwa hepeke Aaisraeli methimbo alihe lyepangelo lyaJehoahas, 23 ihe Omuwa okwe ya sile ohenda nokwa li e na ombili nayo. Ine ya etha, ya hanagulwe po, ihe okwe ya kwatha omolwehangano lye naAbraham, Isak naJakob. Ina dhimbwa nando oshigwana she.
24 Peso lyomukwaniilwa gwaSiria Hasael, omwana Benhadad okwa ningi omukwaniilwa. 25 Nena omukwaniilwa gwaIsrael Jehoas okwa dhenge Benhadad lutatu e ta yugulula ko iilando mbyoka ya kuthilwe ko kuBenhadad muuyuni waJehoahas, he yaJehoas.
© Oshindonga Bible © Bible Society of Namibia, 2008.
