Atalia ta kondjithwa
(2 Aak. 11:4-16)1 Momumvo omutiheyali omuyambi Jehoiada okwa tokola kutya ota ningi po sha. Okwa uvathana naawiliki mbaka yaakwiita ethele: Azaria yaJeroham, Ismael yaJehohanan, Azaria yaObed, Maaseia yaAdaia naElisafat yaSikri. 2 Oye ende niilando ayihe yaJuda e taye etelele Aalevi naakuluntu ayehe yomaludhi kuJerusalem.
3 Ayehe oya gongala motempeli e taa hangana naJoas, omuna gwokombanda. Jehoiada okwa ti kuyo: “Omuna gwokombanda oye nguka. Ota ningi omukwaniilwa, ngaashi Omuwa u uvanekele oluvalo lwomukwaniilwa David. 4 Shika osho tatu gwanitha. Aayambi nAalevi sho taa ya miilonga mEsabati, oshititatu shawo otashi tonatele omiyelo dhotempeli, 5 oshititatu oshikwawo otashi tonatele uuwa, noshihupe otashi kala posheelo Jesod. Aantu ayehe naa gongale mehale lyotempeli. 6 Kape na ngoka ta vulu okuya motempeli kakele kaayambi nAalevi mboka ye li miilonga. Oyo otaa vulu okuya mo, oshoka oyo ya yapuka, ihe aantu yalwe naa vulike komalombwelo gOmuwa, ya kale pondje. 7 Aalevi naa tonatele omukwaniilwa ye na omagongamwele pomake ye mu tula mekondeka. Naa kale pomukwaniilwa shaa mpoka ta yi. Shaa ngoka ta yelekele okuya motempeli, na dhipagwe.”
8 Aalevi nAajuda oya gwanitha omalombwelo gaJehoiada. Aantu inaa lalekwa, sho taa zi miilonga mEsabati, omalenga oga tula ayehe miilonga — mboka taa ya koshilonga naamboka taa zimbuka. 9 Jehoiada okwa pe omalenga omagonga niikandekitho yaDavid, mbyoka ya li ya pungulwa motempeli. 10 Okwa tula aantu ye na omagongamwele ya kunduka omukwaniilwa potempeli, ye mu gamene. 11 Nena Jehoiada okwa pititha mo Joas e te mu zaleke oshishani komutse e te mu pe embo lyompango yokulelitha. Osho ngaaka a kwaniilekwa. Omuyambi Jehoiada noyana oya gwayeke Joas, noshaa ngoka okwa kugilile ta ti: “Omukwaniilwa na kale e na omwenyo!”
12 Atalia oku uvu aantu taa ligolele omukwaniilwa nokwa matukile kotempeli, nkoka kwa gongala aantu oyendji. 13 Okwa mono ko omukwaniilwa omupe a thikama posheelo shotempeli pongudhi yaakwaniilwa, e li mekondeka lyomalenga giita naahiki yoombenda. Aantu ayehe oya li taa igidha kenyanyu yo taa hiki oombenda, naayimbi yomotempeli ye na iihikomwa yawo taa wilike oshituthi. Atalia okwa tuula oonguwo dhe a sa uumbanda e ti igidha ta ti: “Mwa kotokele ndje!”
14 Jehoiada ka li a hala Atalia a dhipagelwe mehale lyotempeli, onkee okwa lombwele omalenga giita a ti: “Mu pititheni pokati komikweyo dhaalangeli ne mu dhipage shaa ngoka ta yelekele oku mu popila.”
15 Oye mu kwata e taye mu fala muuwa e taye mu dhipagele pOsheelo shuukambe.
Omaopaleko gaJehoiada
(2 Aak. 11:17-20)16 Omuyambi Jehoiada okwa hangana nomukwaniilwa noshigwana ashihe kutya yo otaa ningi aantu yOmuwa. 17 Nena oya yi kotempeli yaBaal e taye yi kumuna po. Oya kumagula po iiyambelo niimenka e taa dhipaga Mattan, omuyambi gwaBaal, komeho giiyambelo. 18 Jehoiada okwa langeke aayambi nAalevi mesiloshimpwiyu lyotempeli. Oya li ye na okugwanitha iilonga ye yi pelwe komukwaniilwa David, ya fikile Omuwa omayambo pampango yaMoses. Oya li wo taa tonatele olwiimbo niituthi. 19 Jehoiada okwa langeke wo aalangeli piiyelo yotempeli, opo ya keelele mo ngoka kee na uuyogoki pamisindilo.
20 Omalenga giita, oomvalekele, aakwanepangelo noshihupe shoshigwana oye ende mosheendo naJehoiada, sho a pititha mo omukwaniilwa motempeli e te mu fala muuwa. Oya pitile mosheelo shopombanda, nomukwaniilwa a kuutumba koshipangelapundi she. 21 Aantu ayehe oya li ya nyanyukwa, nengungumano olya pangele moshilando, oshoka Atalia okwa dhipagwa.
© Oshindonga Bible © Bible Society of Namibia, 2008.
