JEREMIA 23 - Oshindonga Bible (ONDB)

Omukwaniilwa gwokomeho

1 “Akwetse aasita mboka taa yonagula nokuhalakanitha oonzi dhuusita wandje,” Omuwa osho ta ti. 2 Onkee ano Omuwa, Kalunga kaIsrael, ota popi ta lombwele aasita mboka taa litha aantu ye ta ti: “Inamu sila nawa aantu yandje oshimpwiyu; omwe ya halakanitha nomwe ya tidha po. Ngashingeyi otandi ke mu geelela uuwinayi mboka mwe u ningi. 3 Otandi ka gongela oshihupe shaantu yandje miilongo moka nde ya halakanithile mo notandi ya eta kevi lyawo. Otaa ka kala ye na aanona oyendji notayi indjipala. 4 Otandi ka langeka aaleli ye ya sile oshimpwiyu. Aantu yandje itaa ka tila we nenge ya haluke, noitandi ke ya geela we. Ongame, Omuwa, nda popi.”

5 Omuwa ota ti: “Esiku otali ya, uuna tandi ka hogolola omukwaniilwa omuyuuki gwomoluvalo lwaDavid. Omukwaniilwa ngoka ota ka lela nowino nota longo shoka shu uka nosho opala mevi alihe. 6 Uuna ta ningi omukwaniilwa, Aajuda otaa ka kala yaa na ombudhi yasha, nAaisraeli otaa ka kala ye na ombili. Ota ka lukwa ‘Omuwa ehupitho lyetu.’ ”

7 Omuwa ota ti: “Esiku otali ya, uuna aantu itaa ka gana we medhina lyOmuwa omunamwenyo ngoka a tembudha mo Aaisraeli muEgipiti, 8 ihe otaa gana medhina lyOmuwa omunamwenyo ngoka e ya tembudha mo moshilongo shokuumbangalantu nomiilongo ayihe moka nde ya halakanithile mo. Nena otaa ka kala mevi lyawo yene.”

Aahunganeki yiifundja taa hunganekwa

9 Omutima gwandje ogwa nyanyagulwa,

nonda kwatwa kuugolwe.

OmolwOmuwa noohapu dhe oondjapuki

onda fa omuntu a kolwa,

omulumentu a dhenga omeya.

10 Evi olyu udha mboka yi iteka Omuwa;

otaa uka muuwinayi

notaa longitha oonkondo dhawo pombambo.

Molwethingano lyOmuwa oshilongo otashi lili,

nomaunapelo oga kukuta.

11 Omuwa ota ti:

“Aahunganeki naayambi oyo aakaanakalunga;

onde ya adhelele taa yonene motempeli yandje.

12 Ondjila yawo otayi ka ninga omuthenu yo yi na omilema.

Otandi ke ya tengukitha, ya gwile po.

Otandi ke ya umbila omupya;

ethimbo lyegeelo lyawo olya thikana.

Ongame, Omuwa, nda popi.

13 Onda mono oshiyematitha maahunganeki yomuSamaria:

oya hunganeke medhina lyaBaal

noya pukitha aantu yandje.

14 Ihe maahunganeki yomuJerusalem onda mono mo iihuna:

otaa hondele yo taa fundju;

otaa koleke mboka taa kolokosha,

onkee ano kaku na nando ogumwe te etha uuwinayi.

Kungame oyo ayehe aawinayi,

oya fa Aasodomu nAagomorra.

15 “Onkee ano ngame, Omuwa Omunankondoawike, otandi popi aahunganeki Aajerusalem te ti: otandi ke ya litha oshigwanga oshilulu noku ya nwetha omeya guuzigo, oshoka oya taandelitha uukwaanakalunga noshilongo ashihe.”

16 Omuwa Omunankondoawike ota lombwele Aajerusalem ta ti: “Inamu pulakena shoka aahunganeki mboka taa ti! Otaye mu tula muugoya, otaye mu lombwele omafafaeko gawo yene, hangaashi nde ya lombwela. 17 Otaa dhiginine okulombwela aantu mboka haa dhini ndje kutya Omuwa ota ti: ‘Otamu kala nombili.’ Nokumboka ya tangalala koomwenyo dhawo, otaa ti: ‘Itamu adhika nando okoshiponga shasha.’ ”

18 Olye gwomuyo a kundathana nOmuwa, a pulakene nokuuva elaka lye? Olye a dhimbulula nokupupa ko koohapu dhe? 19 Ondjahi ye oyo oshikungulu, ombepo yepukutula tayi ka tukulukila komitse dhaakaanakalunga, 20 noitayi ka lota, sigo a gwanitha ayihe mbyoka a nuna okuninga. Momasiku tage ya aantu ye otaa ka uva ko nawa ayihe mbika.

21 Omuwa okwa ti: “Aahunganeki mbaka inandi ya tuma, nando oya yi. Inandi ya pa elaka lyandje, ihe otaa popi medhina lyandje. 22 Andola oya kundathana nangame, ando oyu uvithile aantu yandje oohapu dhandje noku ya galula ko koondjila dhawo oombwinayi nokiilonga yawo iiwinayi.

23 “Ongame Kalunga ndi li apehe, hapeha limwe alike. 24 Kaku na ngoka ta vulu okuholama ndje, ndaaye mu mone andola. Hangame nguka tandi udha egulu nokombanda yevi? 25 Onda tseya aahunganeki mboka, nkene taa popi iifundja medhina lyandje. Aniwa onde ya lombwela oohapu dhandje moondjodhi dhawo. 26 Sigo uunake aahunganeki mboka taa pukitha aantu yandje niilombo yawo ye yi toto? 27 Otaa dhiladhila kutya oondjodhi ndhoka taa hokololelathana, otadhi dhimbitha ndje kaantu yandje, naanaa ngaashi oohekulu ya dhimbwa ndje e taa gama kuBaal. 28 Omuhunganeki ngoka a yaguma, oku na okutya, ndjika ondjodhi yowala, ihe omuhunganeki ngoka u uvu oohapu dhandje, oku na oku dhi uvitha nuudhiginini. Etutu otali yelekwa tuu niilya? 29 Oohapu dhandje odha fa omulilo, nodha fa osilwa tayi nyanyagula omamanya. 30 Otandi kondjitha aahunganeki mboka taa taambathana oohapu yo taye dhi uvitha dha fa dhandje. 31 Otandi tsu ondumbo naahunganeki mboka taa uvitha oohapu dhawo notaa ti, odha za kungame. 32 Pulakeneni shoka ngame, Omuwa, tandi mu lombwele. Onda tsa ondumbo naahunganeki mboka taa hokolola oondjodhi dhawo dhu udha iifundja. Otaa uvitha oondjodhi dhawo e taa pukitha aantu yandje niilombo yawo nomainomo gawo. Inandi ya tuma nando nenge ndi ya lombwele ya ye, nokaye na omupondo gwasha kaantu yandje. Ongame, Omuwa, nda popi.”

Omutenge gwOmuwa

33 Omuwa okwa lombwele ndje a ti: “Jeremia, uuna gumwe gwomaantu yandje nenge omuhunganeki nenge omuyambi te ku pula ta ti: ‘Etumwalaka lyOmuwa oshike?’ ou na oku mu lombwela to ti: ‘One omutenge gwOmuwa, note ke mu ekelahi.’ 34 Ngele gumwe gwomaantu yandje nenge omuhunganeki nenge omuyambi ta longitha iitya mbika ‘omutenge gwOmuwa’, otandi ke mu geela negumbo lye. 35 Peha lyasho shaa ngoka oku na okupula ookuume ke naakwawo ta ti: ‘Omuwa okwa gandja eyamukulo lini? Omuwa okwa ti ngiini?’ 36 Ano inaa popya we ya tye ‘omutenge gwOmuwa’, oshoka ngele oku na ngoka te shi ningi, etumwalaka lyandje otali ka ninga shili omutenge kuye. Aantu oya goyokitha oohapu dhaKalunga kawo, Kalunga omunamwenyo, Omuwa Omunankondoawike. 37 Jeremia, pula aahunganeki to ti: ‘Omuwa okwe mu pe eyamukulo lyashike? Omuwa okwa ti ngiini?’ 38 Nongele itaa vulika kelombwelo lyandje yo taa tumbula iitya ‘omutenge gwOmuwa’, nena ya lombwela kutya 39 otandi ke ya tudha mo e tandi ya umbile kokule nangame, ayehe pamwe noshilando shoka nde shi ya pele noohekulu. 40 Otandi ya undulile ohoni nesheko lyaaluhe ndyoka lyaa na mpoka nali dhimbiwa.”