Oondjokana
(Mrk. 10:1-12)1 Jesus sho a mana okupopya oohapu ndhoka, okwa zi muGalilea e tu uka komikunda dhaJudea handiyaka yaJordan. 2 Oongundu oonene dhaantu odhe mu landula. Oye nokwe ya aludha.
3 Aafarisayi oye ya kuye oku mu makela ya ti: “Oshu uka tuu, omulumentu ngele ta henge po omukiintu gwe omolwoshinima kehe?”
4 Jesus okwe ya pula wo a ti: “Inamu lesha nani kutya petameko Omushiti okwe ya shiti omulumentu nomukiintu? 5 Onkee ano omulumentu e na okuthiga po he nayina e ti ihanganitha nomukiintu gwe, ayehe yaali e taa ningi omuntu gumwe. 6 Kaye li we yaali, aawe, oyo omuntu gumwe. Ano shono Kalunga e shi tula kumwe, inashi kuthwa kumwe komuntu.”
7 Aafarisayi oye mu pula ya ti: “Omolwashike Moses a pitika, omulumentu a gandje onzapo yehengo komukiintu gwe, e mu ethe po?”
8 Jesus okwe ya yamukula a ti: “Moses okwa pitika, mu henge po aakiintu yeni omolwokwaahavulika kweni. Ihe hasho sha li ngaaka petameko. 9 Ihe ngame otandi mu lombwele: Oongoka ta henge po omukiintu gwe omolwoshinima shilwe shaa shi oluhondelo e ta hokana gulwe, oye ota hondele. Naangoka ta hokana omuhengwa, oye ota hondele.”
10 Aalongwa oya ti kuJesus: “Ano ngele okukala kwomulumentu nomukiintu gwe okwa tya ngeyi, nena okuhokana inaku opala.”
11 Jesus okwa ti kuyo: “Haayehe taa uvu ko oohapu ndhika, aawe, oomboka ayeke ye shi pewa. 12 Oshoka oku na oonakwiikalela nkene tuu ya valwa, oye li ngaaka okuza mela lyayina. Oku na wo mboka ya ningwa oonakwiikalela kaantu. Oku na ishewe mboka yi iningi oonakwiikalela yoyene omolwOshilongo shegulu. Oongoka ta vulu oku dhi taamba, ne dhi taambe.”
Jesus ta yambeke uunona
(Mrk. 10:3-16Luk. 18:5-17)13 Aantu yamwe oye eta uunona kuJesus, opo e u tenteke iikaha ye, ye a galikane. Aalongwa noya ganda mboka ye u eta. 14 Ihe Jesus okwa ti: “Etheni uunona, u ye kungame, inamu u keelela ko, oshoka Oshilongo shegulu oshaamboka ye u fa.”
15 Oye okwe u tenteke iikaha ye, e ta yi.
Omugundjuka omuyamba
(Mrk. 10:17-31Luk. 18:18-30)16 Nena omulumentu gumwe okwe ya kuJesus e ta ti: “Muhongi, nandi longe uuwanawa washike, ndi mone omwenyo gwaaluhe?”
17 Jesus okwa ti kuye: “Omolwashike to pula ndje kutya oshiwanawa oshini po? Gumwe awike omwaanawa. Ngele owa hala okuya momwenyo, gwanitha iipango.”
18 Oye okwa pula Jesus a ti: “Oyini po?”
Jesus okwe mu yamukula a ti: “Oombika: ‘Ino dhipaga,’ ‘Ino hondela,’ ‘Ino yaka,’ ‘Ino lundila,’ 19 ‘Simaneka ho nanyoko,’ ‘Hola mukweni ngaashi ngoye wi ihole mwene.’ ”
20 Omugundjuka okwa ti kuye: “Ayihe mbika onde yi gwanitha. Oshike nde shi pumbwa natango?”
21 Jesus okwe mu yamukula a ti: “Ngele owa hala, u kale wa gwana wa pwa, inda, u ka landithe po ayihe mbyoka u na, iimaliwa e to yi pe oohepele, ngoye e to kala u na eliko megulu. Ila ihe, u landule ndje.”
22 Omugundjuka sho u uvu oohapu ndhoka, okwa zi po a sa oluhodhi, oshoka okwa li e na eliko olindji.
23 Opo Jesus okwa ti kaalongwa ye: “Ongame tandi mu lombwele: Omuyamba oku na uudhigu okuya mOshilongo shegulu. 24 Niishewe tandi mu lombwele: Okupitila kwongamelo mombululu yonane ihwepo ku vule okuya kwomuyamba mOshilongo shaKalunga.”
25 Aalongwa sho ye shi uvu, oya haluka noonkondo noya pula e taa ti: “Olye ano ta vulu okuhupithwa?”
26 Jesus okwe ya tongolola e ta yamukula: “Eeno, aantu ohaa nyengwa, ihe Kalunga iha nyengwa kusha.”
27 Nena Petrus okwa ti kuJesus: “Tala, otse twa thigi ko iinima ayihe e tatu ku landula. Otatu ka pewa shike?”
28 Jesus okwe ya yamukula a ti: “Ongame tandi mu lombwele: Muuyuni mboka uupe Omuna gwOmuntu sho ta ka kuutumba koshipangelapundi shesimano lye, nane wo mboka mwa landula ndje, otamu ka kuutumba kiipangelapundi omulongo niiyali, mu pangule omazimo gaIsrael omulongo nagaali. 29 Nokehe tuu ngoka a thigile ko egumbo nenge aamwayina aalumentu nenge aamwayina aakiintu nenge he nenge yina nenge oyana nenge epya omolwandje, ote ke yi mona lwethele yi vule mbika, nomwenyo gwaaluhe ote gu pewa. 30 Ihe aatango oyendji otaa ka ninga aahugunini, naahugunini oyendji otaa ka ninga aatango.”
© Oshindonga Bible © Bible Society of Namibia, 2008.
