Esra ta leshele oshigwana ompango
1 Mesiku lyotango lyomwedhi omutiheyali oshigwana ashihe osha gongala muJerusalem mehalandjandja lyopOsheelo shomeya. Oya pula omuyambi nomunongompango Esra, a ka tale embo lyompango ndjoka Omuwa e yi pele Aaisraeli ye endele muMoses.
2 Esra okwe li eta moshigongi shaantu mboka ya gongala — aasamane naakulukadhi naanona mboka ye na omimvo dha gwana noyu uvite ko. 3 Mehalandjandja lyopOsheelo shomeya okwe ya leshele mompango okuza kepito lyetango sigo omoshanga shomutenya, noyo ayehe oya pulakene yi itula mo.
4 Esra okwa li a thikama komutuni gwiipilangi ngoka gwa li gwa tungilwa ompumbwe ndjoka. Mboka ya li ya thikama kolulyo lwe, oyo Mattitia, Shema, Anaia, Uria, Hilkia naMaaseia; naamboka ya li ya thikama kolumoho lwe, oyo Pedaia, Mishael, Malkija, Hashum, Hashbaddana, Sakaria naMeshullam.
5 Esra sho a thikama komutuni puule pombanda, aantu oya li ye mu nzanena mo omeho. Oya thikama mbala, sho a yanuna embo. 6 Esra okwa ti: “Hambeleleni Omuwa, Kalunga omunene!”
Aantu ayehe oya yelutha omaako gawo mombanda e taa yamukula taa ti: “Amen! Amen!” Oya tsu oongolo yi inyongamena pevi e taa galikana.
7 Nena oya galuka e taa thikama pomahala gawo. Aalevi mbaka ye ya fatululile ompango: Jeshua, Bani, Sherebia, Jamin, Akkub, Shabbetai, Hodia, Maaseia, Kelita, Azaria, Josabad, Hanan naPelaia. 8 Oya tolokele aantu ompango yaKalunga e taye yi fatulula, opo ye yi uve ko.
9 Aantu sho ya pulakene ompango tayi leshwa, oya tameke okulila. Nena omunashikandjo Nehemia, omuyambi nomunongompango Esra nAalevi mboka ya li taa fatululile aantu ompango, oya lombwele ayehe taa ti: “Esiku ndika olya yapulilwa Omuwa, Kalunga keni, onkee inamu yemata nenge mu lile. 10 Ngashingeyi indeni kaandjeni, mu dhane oshituthi. Topoleni iikulya nomaviinu naamboka yaa na sha. Esiku ndika olya yapulilwa Omuwa gwetu, onkee inamu yemata. Enyanyu ndyoka Omuwa te li gandja, nali mu kumike.”
11 Aalevi oye ende mokati kaantu, taye ya hekeleke taa ti: “Mweneni, oshoka esiku ndika eyapuki. Inamu sa oluhodhi.” 12 Aantu ayehe oya yi koyaandjawo e taa li e taa nu nokunyanyukwa noya topolele wo yalwe shoka ya li ye shi na, oshoka oya li yu uvite ko shoka ye shi leshelwa.
Oshituthi shomatsali giihwa iitalala
13 Esiku lya landula ko aakuluntu yomaludhi pamwe naayambi nAalevi oya yi kuEsra, ya konakone ompango. 14 Oye shi kutha mo nawa kutya ompango ndjoka Omuwa a pele Moses, otayi lombwele Aaisraeli, ya kale momatsali giihwa iitalala momasiku goshituthi. 15 Oyi igidhile aantu muJerusalem, miilando yilwe nomomikunda adhihe taa ti: “Indeni koondundu, mu ka komangele iitayi yomiolivi noyomidhime, iiyale yomilunga niihwa yilwe iitalala, mu dhike omatsali giihwa iitalala, ngaashi sha popiwa mompango.”
16 Aantu oya ka tala iitayi e taa dhike omatsali kombanda yoontala dhoongulu dhawo, momahalandjandja gomagumbo gawo, mehale lyotempeli nomehalandjandja lyopOsheelo shomeya nolyopOsheelo shaEfraim. 17 Aantu ayehe mboka ya galuka muupika, oya dhike omatsali e taa kala mo. Shika osho sha li shotango sha ningwa okuza komasiku gaJosua yaNun, naayehe oya li ya nyanyukwa noonkondo.
18 Okuza kesiku lyotango lyoshituthi sigo okehulilo oya kala taa lesha sha mompango yaKalunga. Oya dhana oshituthi omasiku gaheyali, nomesiku etihetatu oya hulitha nelongelokalunga, ngaashi shu uthwa kompango.
© Oshindonga Bible © Bible Society of Namibia, 2008.
