2 AAKWANIILWA 17 - Oshindonga Bible (ONDB)

Hosea, omukwaniilwa gwaIsrael

1 Momumvo omutimulongo nambali gwepangelo lyomukwaniilwa gwaJuda Ahas, Hosea yaEla okwa ningi omukwaniilwa gwaIsrael nokwa lele muSamaria omimvo omugoyi. 2 Okwa yono kOmuwa, ihe hangaashi aakwaniilwa mboka ya lele Israel ye mu tetekela. 3 Omupangeli Salmaneser gwaAssur okwe mu hingile iita; Hosea okwi igandja kuSalmaneser e te mu futu omumvo kehe oompale. 4 Ihe omumvo gumwe Hosea okwa tumu aatumwa komukwaniilwa gwaEgipiti, edhina lye So, ti indile ekwatho lye ye ina fendela we oompale kuAssur. Salmaneser sho e shi koneke, okwa kwata po Hosea e te mu tula mondjedhililo.

Etekopo lyaSamaria

5 Nena Salmaneser okwa matukile Israel e ta kunduka Samaria. Momumvo omutitatu sho e shi kunduka, 6 ngoka gwa li omumvo omutimugoyi gwepangelo lyaHosea, omupangeli gwaAssur okwa kwata po Samaria e ta fala Aaisraeli kuAssur oonkwatwa. Yamwe yomuyo okwe ya langeke moshilando Halak, yamwe opopepi nomulonga Habor moshikandjo shaGosan nayamwe omiilando yAamedia.

7 Samaria osha teka po, oshoka Aaisraeli oya yono kOmuwa, Kalunga kawo, ngoka a li e ya yululula miikaha yomukwaniilwa gwaEgipiti e te ya tembudha muEgipiti. Oya simaneke iikalunga yilwe, 8 oya landula oohedhi dhiigwana mbyoka Omuwa e yi tidha po, opo aantu ye ye ye mo, noya taamba oohedhi dha zi kaakwaniilwa yaIsrael. 9 Aaisraeli oya ningi iinima mbyoka Omuwa, Kalunga kawo, he yi tondo. Momikunda dhawo adhihe oya tungile mo omahala giinonoma yuupagani, okuza mokakunda okashona sigo okoshilando oshinene. 10 Koondundu adhihe nomomizile dhomiti omitalala oya dhike mo oongundhi dhomamanya niiyelekela yoshikalungakiintu Asheera, 11 oyo noya yambele omafikilondjambo kiiyambelo yaapagani, ya landula oshiholelwa shaantu mboka Omuwa e ya tidha mo moshilongo. Oya pendutha ondjahi yOmuwa niilonga yawo iiwinayi 12 yo inaa vulika kOmuwa, nando e ya lombwelele, yaa longele iimenka.

13 Omuwa okwa li a tumu aatumwa ye naahunganeki ye, ya londodhe Israel naJuda taa ti: “Etheni oondjila dheni oombwinayi, ne mu vulike komalombwelo gandje ngoka ga kwatelelwa mompango ndjoka nda pele oohokulu. Onde yi mu tseyithile maantu yandje aahunganeki.” 14 Ihe inaa vulika nando; oya li aatangalali ya fa oohekulu mboka ya li inaa inekela Omuwa, Kalunga kawo. 15 Oya tindi okuvulika komautho ge, inaa dhiginina ehangano e li hangana noohekulu, oyo noya dhini omalondodho ge. Oya simaneke iimenka yowalawala. Noyo yene oya ningi iifakufaku yowala, sho ya landula oohedhi dhiigwana ye ya kunduka yo inaa vulika komalombwelo gOmuwa, yaaye dhi holele. 16 Oya thigi po iipango ayihe yOmuwa, Kalunga kawo, e tayi ihambulile oontana mbali, ye dhi simaneke; oya hambula wo iiyelekela yoshikalungakiintu Asheera, oya simaneke oonyothi noya longele Baal. 17 Oya yamba oyana aamati naakadhona, ya ninge omafikilondjambo kiikalunga yaapagani, oya yi koonganga nokaayanekeli e tayi igandjele naanaa okulonga iihuna koshipala shOmuwa e taa pendutha ondjahi ye. 18 Omuwa okwa geele Aaisraeli e te ya tidha po koshipala she; okwa thigi po ashike oshilongo shaJuda.

19 Ihe nAajuda wo inaa vulika kiipango yOmuwa, Kalunga kawo; oya holele oohedhi dhe ya zile kAaisraeli. 20 Omuwa okwe ekelehi Aaisraeli ayehe, e ya geele e te ya gandja miikaha yaatondi aananyanya, sigo pehulilo e ya undula po koshipala she.

21 Omuwa sho a yoolola Israel muJuda, Aaisraeli oya ningi Jeroboam yaNebat omukwaniilwa gwawo. Jeroboam okwe ya zitha pOmuwa e te ya fala muulunde wiihuna. 22 Oya landula Jeroboam taa longo uulunde auhe mboka a ningile, 23 sigo pehulilo Omuwa te ya undula po koshipala she, ngaashi e ya londodhithile aapiya ye aahunganeki. Osho ngaaka Aaisraeli ya falwa muupika kuAssur, nkoka ya kala sigo onena.

Aayassur taa tula muIsrael

24 Omupangeli gwaAssur okwa kutha aantu miilando Babilon, Kuta, Ivva, Hamat naSefarvaim e te ya langeke miilando yaSamaria peha lyAaisraeli mboka e ya fala muupika. Oya kala miilando mbika noya ningi yawo. 25 Sho ye ya mo tango, inaa longela Omuwa, onkee Omuwa okwa tumu oonime, nodha dhipaga yamwe yomuyo. 26 Omupangeli gwaAssur okwa lombwela kutya aantu mboka e ya langeke miilando yaSamaria, inaa tseya oshipango shaKalunga koshilongo shiyaka, omolwashoka Kalunga okwe ya tumine oonime, ndhoka tadhi ya li po. 27 Nena omupangeli a gandja elaka tali ti: “Shunitheni ko gumwe gwomaayambi mboka twe eta huka oonkwatwa, a ye a ka kale hoka, opo a longe aantu ompango yakalunga kevi ndyoka.” 28 Osho omuyambi gumwe Omuisraeli ngoka a zile muSamaria, okwa yi ko e ta kala muBetel, moka a longo aantu, nkene Omuwa ta simanekwa.

29 Ihe aantu mboka ya tula muSamaria, oya tsikile okwiiningila iikalunga yawo yene. Oyo noye yi tula momahala omayapuki ngoka ga tungilwe kAaisraeli. Ezimo kehe olyi iningile iimenka yalyo miilando moka ya kala mo. 30 Aababiloni oya hambula iimenka yoshikalunga Sukkot Benot; mboka ya zi kuKuta, iikalunga yaNergal; mboka yokuHamat, iimenka yaAshima; 31 mboka yokuIvva, iikalunga yaNibhas noyaTartak; nAasefarvajim oya yamba oyana omafikilondjambo kiikalunga yawo Adrammelek naAnammelek. 32 Aantu mbaka oya simaneke wo Omuwa e taa hogolola mokati kawo aantu yamwe, ya kale aayambi pomahala giinonoma yuupagani, ye ya yambele mpoka oondjambo. 33 Oya simaneke Omuwa, ihe oya longele wo iikalunga yawo pahedhi yiilongo yawo nkoka ya zile.

34 Oya humbata oohedhi dhawo sigo onena. Ihaa simaneke Omuwa yo ihaa vulika kiipango nokomautho ngoka e ga pele oluvalo lwaJakob, ngoka haku tiwa Israel. 35 Omuwa okwa li a hangana nayo e te ya lombwele ta ti: “Inamu simaneka ookalunga yalwe; inamu inyongamena nenge mu ya longele nenge mu ya yambele oondjambo. 36 Vulikeni kungame, Omuwa, nguka nde mu tembudha muEgipiti noonkondo oonene nomatha; ne omu na okwiinyongamena ndje nokuyambela ndje oondjambo. 37 Vulikeni aluhe kiipango nokomautho ngoka nde mu nyolele. Inamu simaneka ookalunga yalwe 38 ne inamu dhimbwa ehangano nde li hangana nane. 39 Vulikeni kungame, Omuwa, Kalunga keni, notandi mu hupitha miikaha yaatondi yeni.” 40 Ihe aantu mboka inaa pulakena, oya tsikile okulandula omikalo dhawo omikulu.

41 Osho ngaaka aantu mboka oya longele Omuwa, ihe oya simaneke ishewe iimenka yawo. Sigo onena oluvalo lwawo olwa tsikile wo okulonga iilonga ya tya ngaaka.