Israel ota shuna kegumbo
1 Omuwa ota ti: “Esiku otali ya, uuna tandi ka ninga Kalunga komazimo agehe gaIsrael, noyo taa ka ninga aantu yandje. 2 Mombuga onda sile ohenda mboka ya hunuka meso. Aaisraeli sho yu uka kevululuko, 3 onde ya imonithile mondjila yokokule. Aaisraeli ne, ondi mu hole aluhe notandi mu hilile kungame nohole yaaluhe. 4 Otandi ke mu tungulula ishewe, notamu ka tungala. Otamu ka kutha oongoma dheni notamu ka tanta nokuligola. 5 Otamu ka tsika ishewe iitsambe yomiviinu koondundu dhaSamaria, naamboka taa ke dhi tsika, otaa ka lya shoka dhi imi. 6 Eeno, esiku otali ya uuna aalangeli taa ka kololoka koondundu dhaEfraim taa ti: ‘Tu thikameni tu yeni kuSion kOmuwa Kalunga ketu.’ ”
7 Omuwa ota ti:
“Imbileni Jakob nenyanyu,
igidhileni oshigwana oshikuluntu.
Imbeni ondjimbohambelelo tamu ti:
‘Omuwa a hupitha aantu ye;
okwa mangulula ayehe mboka ya hupu po.’
8 Otandi ke ya eta taa zi kuumbangalantu
noku ya kongolola kooha dhuuyuni.
Mokati kawo otamu ka kala aaposi niilema,
aasimba naamwali.
Otaa galuka oshigwana oshinene.
9 Otaye ya taa lili, nomokugalikana kwawo otandi ya eta.
Otandi ke ya endithila pomatondokelo gomeya,
mepola lya yelekana noitaa punduka,
oshoka ongame he yaIsrael,
naEfraim oye osheeli shandje.”
10 Omuwa ota ti:
“Pulakenii ndje, ne iigwana,
hokololeni oohapu dhandje koontuntu dhokokule.
Onda halakanitha aantu yandje, ihe otandi ke ya gongela
nokuya enditha ngaashi omusita te enditha oshigunda she.
11 Oshoka onda kulile Aaisraeli
nonde ya hupitha koshigwana oshinankondo.
12 Otaye ya taa imbi ekandanga kondundu Sion.
Otaa nyanyukilwa uuwanawa wandje —
iilya, omaviinu nomagadhi gooholivi,
iimuna yoonzi noyoongombe.
Oomwenyo dhawo otadhi ka fa oshikunino sha hetukila
noitaa ka sa we oluhepo.
13 Aakadhona otaa ka tanta ya nyanyukwa,
aalumentu aagundjuka naakuluntu otaa ka shambukwa.
Otandi ke ya hepulutha
nokushitukitha okulila kwawo enyanyu.
14 Aayambi otandi ya kutitha noondya oontoye,
naantu yandje otandi ya talaleke nuuwanawa wandje.
Ongame, Omuwa, nda popi.”
Omuwa ta sile Israel ohenda
15 Omuwa ota ti:
“Ekudhilo otali uvika muRama,
etakumo nelilagano.
Rakel ta lilile oyana,
ye ina hala okutalalekwa,
oshoka oyo kaye po we.”
16 Omuwa ota ti:
“Mwena waa lile we, theta po omahodhi goye,
oshoka iilonga yoye otayi ka futwa.
Otaa ka galuka ko kevi lyaatondi.
17 Oluvalo lwoye olu na etegameno komeho;
aamwoye otaa ka galukila kegumbo.
Ongame, Omuwa, nda popi.
18 “Ondu uvite shili, Aaisraeli taa lili taa ti:
‘Omuwa, otwa li twa fa okatana okagundjuka,
ihe owe tu longo okuvulika.
Tu galula; otwi ilongekidha okugalukila kungoye,
Omuwa Kalunga ketu.
19 Otwe ku pilamene, ihe nanziya otwa hala tu galuke.
Sho we tu geele,
otwi isizimike moluhodhi.
Otwa sa ohoni notwa gugwa,
oshoka otwa yono, sho twa li aagundjuka.’
20 Israel, ngoye omumwandjelela omuholike,
omunona ndi mu hole unene.
Shaa tandi tumbula edhina lyoye,
otandi ku dhiladhila nohole.
Omwenyo gwandje otagu ku tukulukile,
notandi ku sile ohenda.
21 Dhikeni omaudhikilo,
mu ndhindhilike ondjila;
monununeni ondjila ndjoka mwe ende nayo, sho mwa yi.
Galukeni, ne Aaisraeli,
ileni kegumbo komikunda mwe dhi thigile po.
22 Sigo uunake tamu ongaonga, ne aakaaneitaalo?
Onde eta po oshinima oshipe kombanda yevi —
otashi yelekanithwa nomukiintu ta gamene omulumentu.”
Omauvaneko getungululo lyaJuda
23 Omuwa Omunankondoawike, Kalunga kaIsrael, ota ti: “Uuna tandi galulile aantu kevi lyawo, otaa ka popya ishewe mevi lyaJuda nomomikunda dhalyo taa ti: ‘Omuwa na yambeke ondundu ondjapuki yaJerusalem, ehala eyapuki moka a kala.’ 24 Aantu otaa kala muJuda nomomikunda dhe adhihe, notamu ka munwa iimuna nokulongwa omapya. 25 Otandi ndjangeke aaloloki nokukutitha mboka ya nama uuwanawa, ya ze ondjala. 26 Onkee otaku tiwa: ‘Onda papudhuka e te lengalenga. Oomposi dhandje odha li oontoye.’
27 “Ngame, Omuwa, ote ti, ethimbo nge lya thikana, otandi ka udhitha evi lyaJuda aantu niimuna. 28 Ngaashi nda li nda tonatela okuvudhwa mo nokunakulwa mo kwawo, okweekelwahi, okuhanagulwa po nokuteywa po, osho tandi ke ya tonatela moku ya tsika nomoku ya tungulula. 29 Momasiku ngoka aantu itaa ka tya we: ‘Oohekulu oya lile omagongwa gomandjembele, nomayego goyana oga ningi uuge.’ 30 Shaa ngoka ota sile uulunde we mwene, noshaa ngoka ta li omagongwa gomandjembele, ota ningitha omayego ge mwene uuge.”
31 Omuwa ota ti: “Esiku otali ya, uuna tandi ka dhika ehangano epe nAaisraeli nAajuda. 32 Inali fa nando ehangano ekulu ndyoka nda hanganene noohekulu, sho nde ya kwata koshikaha nonde ya tembudha muEgipiti. Nando onda li nda fa ombushiki kuyo, inaa dhiginina ehangano ndyoka. 33 Ehangano epe ndyoka tandi hangana nAaisraeli, olyo ndika: Ompango yandje otandi yi tula momadhiladhilo gawo notandi yi nyolele moomwenyo dhawo. Otandi ningi Kalunga kawo, noyo taa ningi aantu yandje. 34 Itaku kala we omuntu ta longo mukwawo nenge omuntu ta lombwele mumwayina ta ti: ‘Tseya Omuwa.’ Oshoka ayehe otaa ka tseya ndje, aagundjuka naakuluntu. Otandi dhimi po omayono gawo, nuulunde wawo itandi u dhimbulukwa we. Ongame, Omuwa, nda popi.”
35 “Omuwa okwa utha etango okuminikila omutenya,
nomwedhi noonyothi okuminikila uusiku.
Ota pilula efuta note li ndundumitha;
edhina lye Omuwa Omunankondoawike.
36 Elandulathano ndika lyuunshitwe manga inaali tenguka po,
oluvalo lwaIsrael nalwo wo italu hulu po,
lu kale oshigwana koshipala shandje.
37 Egulu pombanda ngele tali vulu okuyelekwa,
nomakankameno gevi pohi ngele taga vulu okukonakonwa,
nena otandi ekelehi Israel
omolwaashihe shoka e shi ningi.”
38 Omuwa ota ti: “Esiku otali ya, uuna Jerusalem ashihe tashi ka tungululwa shi ninge oshilando shandje okuza koshungo Hananel sigo okOsheelo shokokolonela. 39 Okuza mpoka ongamba otayi ka tsikila sigo okoshikulundundu Gareb e tayi goyokele ihe lwokuGoa. 40 Esilu alihe moka hamu fumvikwa aasi netoto lyiiyagaya nelundu alihe sigo okokalonga Kidron nosigo okOsheelo shuukambe kuuzilo, otali ka kala lya yapulilwa ndje. Oshilando itashi ka kumunwa po we nenge shi hanagulwe po.”
© Oshindonga Bible © Bible Society of Namibia, 2008.
