Ondjimbo yaahupithwa
1 Nena onda mono ko Onzigona a thikama kondundu yaSion. Pamwe nOnzigona okwa li aantu 144 000 mboka ya ndhindhilikwa edhina lye nolyaHe miipala yawo. 2 Ngame ondu uvu ewi lya zi megulu lya popoma lya fa egwo lyomeya omanene nolya fa edhengo lyomutyalakato. Ewi ndyoka ndu uvu, olya li lya fa ewi lyuuhumba, aahiki sho taa hiki uuhumba wawo. 3 Aantu mbaka oya thikama ya taalela oshipangelapundi niinamwenyo ine naakuluntu, noyi imbi eimbilo epe. Kaku na ngoka a vulu okwiilonga eimbilo ndika, ihe oyo mboka ayeke 144 000, mboka ya kulilwa ko kevi. 4 Aantu mbaka oyo aalumentu mboka inaa inyateka nokukalathana naakiintu; oomboka ya fa aakadhona aayogoki. Oyo ohaa landula Onzigona shaa mpoka ta yi. Oyo oya kulilwa mo maantu ooyakwawo noyo aatango okuyambelwa Kalunga nOnzigona. 5 Oyo inaa fundja nando olumwe nokaye na nando oshipo shasha.
Aayengeli yatatu
6 Nena onda mono omuyengeli gulwe e na oohapu dhelaka etoye lyaaluhe, a tuka mombanda muule, a ka uvithile aantu yokombanda yevi, omihoko adhihe, omaludhi agehe, omalaka agehe niigwana ayihe. 7 Oye okwa popi newi enene a ti: “Tileni Kalunga, ne mu simaneke uunene we! Oshoka ethimbo lyokupangula aantu olya thikana. Galikaneni Kalunga, ngoka a shiti egulu, evi, efuta noothithiya dhomeya!”
8 Omuyengeli omutiyali okwa landula ngoka gwotango a ti: “Sha teka po! Babilon oshinankondo sha teka po! Osho sha hongolola nayi iigwana noku yi nwetha omaviinu omalulu goluhondelo lwasho!”
9 Omuyengeli omutitatu okwa landula mboka yaali yotango nokwa popi newi enene a ti: “Kehe ngoka ta galikana oshilikama noshiyelekela shasho nota taamba endhindhiliko lyasho moshipala nenge moshikaha, 10 oye ota ka adhika kondjahi yaKalunga, ndjoka e yi tile noonkondo adhihe moshitenga shondjahi ye. Ayehe mboka taa ningi ngeyi, otaa ke ehamekwa komulilo nokomuku gwosulufuli montaneho yaayengeli aayapuki noyOnzigona. 11 Olwithi lwomulilo ngoka tagu ya ehameke, otalu kala nokulunda aluhe sigo aluhe. Itaku kala evululuko omutenya nuusiku kumboka ya galikana oshilikama noshiyelekela shasho, nokungoka a taamba endhindhiliko lyedhina lyasho.”
12 Shika otashi pula aantu yaKalunga ya kale ye na eidhidhimiko, haa vulika kiipango yaKalunga noyi inekela Jesus.
13 Nena ondu uvu ewi lya zi megulu lya ti: “Nyola ngeyi: Okuza ngashingeyi aanelago aasi mboka taa sile moshilonga shOmuwa!”
Ombepo okwa yamukula a ti: “Osho naanaa. Oyo otaa ka vululukwa kiilonga yawo iidhigu. Oshoka iiyimati yiilonga yawo otaa yi pamwe nayo.”
Eteyo lyokombanda yevi
14 Ngame onda tala nonda mono oshikogo oshitokele, nokusho okwa kuutumba gumwe a fa Omuna gwOmuntu e na oshishani shoshingoli komutse gwe noshimwitho sha tsa moshikaha she. 15 Nena omuyengeli gulwe okwa zi motempeli nokwi igidha newi enene kungoka a kuutumba koshikogo a ti: “Longitha oshimwitho shoye, u teye, oshoka ethimbo lyokuteya olya thikana. Evi olya tiliganena eteyo!” 16 Nena ngoka a kuutumba koshikogo, okwa dhugadhuga oshimwitho she kombanda yevi, neteyo olya ningwa.
17 Ngame onda mono omuyengeli gulwe a zi motempeli yomegulu. Oye okwa li wo e na oshimwitho sha tsa.
18 Nena omuyengeli gulwe, ngoka e na oonkondo dhokupangela omulilo, okwa zi moshiyambelo nokwi igidha omuyengeli ngoka e na oshimwitho sha tsa, a ti: “Longitha oshimwitho shoye, u tete po omahila gomiviinu dhokombanda yevi, oshoka oomviinu dhadho odha tiligana.” 19 Nena omuyengeli okwa dhugadhuga oshimwitho she kombanda yevi nokwa tete ko omahila gomiviinu e te ga umbile moshikolelo oshinene shondjahi yaKalunga. 20 Oomviinu odha kolelwa moshikolelo kondje yoshilando. Nena moshikolelo omwa zi omukungu gwombinzi gu na uule wookilometa omathele gatatu nuule wometa yimwe netata.
© Oshindonga Bible © Bible Society of Namibia, 2008.
