1 Omuwa okwa lombwele omuhunganeki Jehu yaHanani e te mu pe elaka ndika tali popi Baasha tali ti: 2 “Owa li omunima gwowala, ihe onde ku ningi omuwiliki gwaantu yandje Aaisraeli. Ihe owa yono wa fa Jeroboam nowa fala aantu yandje muulunde. Oondjo dhawo odha tukulutha ondjahi yandje, 3 onkee ano otandi ke ku komba po negumbo lyoye, ngaashi naanaa nda ningi Jeroboam. 4 Omukwanezimo lyoye kehe ta sile moshilando, ota ka lika po koombwa, naangoka ta sile melundu, ota ka lika po koontsa.”
5 Ashihe shilwe shoka Baasha a ningi niilonga ye ayihe yuufule oya nyolelwa membo lyondjokonona yaakwaniilwa yaIsrael, 6 Baasha okwa si nokwa fumvikwa muTirza, nomwana Ela okwe mu landula muukwaniilwa.
7 Elaka ndiyaka lyOmuwa tali popi Baasha negumbo lye, olya li lya pewa omuhunganeki Jehu moluulunde mboka wa ningwa kuBaasha, sho a yono kOmuwa. Okwa tukulutha ondjahi yOmuwa, hamoluuwinayi auke mboka a ningi ngaashi naanaa omukwaniilwa Jeroboam, ihe oshoka a dhipaga po ezimo lyaJeroboam alihe.
Ela, omukwaniilwa gwaIsrael
8 Momumvo omutimilongombali nahamano gwepangelo lyaAsa, omukwaniilwa gwaJuda, Ela lyaBaasha okwa ningi omukwaniilwa gwaIsrael, nokwa lele muTirza omimvo mbali. 9 Gumwe gwomaambala ye Simri, ngoka a li ondjayi yetata lyomatembakwiita okwe mu uvanene monanguwi. Esiku limwe muTirza Ela okwa li a kolwa maandjaArza, ngoka a li ha tonatele muuwa. 10 Simri okwe ya megumbo e ta dhipaga Ela, nokwe mu landula muukwaniilwa. Shika osha ningwa momumvo omutimilongombali nomutiheyali gwepangelo lyaAsa, omukwaniilwa gwaJuda. 11 Nanziya Simri sho a ningi omukwaniilwa, okwa dhipaga po ezimo alihe lyaBaasha. Ina hupitha omulumentu nando ogumwe gwomezimo ndyoka nenge kuume ke. 12 Osho Simri a dhipaga po ezimo alihe lyaBaasha pahapu ndhoka Omuwa a popi Baasha komuhunganeki Jehu. 13 Molwiimenka yawo nomolwashoka ya fala Israel muulunde, Baasha nomwana Ela oya pendutha ondjahi yOmuwa, Kalunga kaIsrael. 14 Ashihe shilwe shoka Ela a ningi, osha nyolelwa membo lyondjokonona yaakwaniilwa yaIsrael.
Simri, omukwaniilwa gwaIsrael
15 Momumvo omutimilongombali naheyali gwepangelo lyaAsa, omukwaniilwa gwaJuda, Simri okwa lele Israel omasiku gaheyali e li muTirza. Omatanga gAaisraeli oga li ga kondeka oshilando Gibbeton muFilistia. 16 Sho gu uvu kutya Simri okwa uvanene omukwaniilwa monanguwi nokwe mu dhipaga, oga kwaniileke ondjayi yiita Omri, a kale omukwaniilwa gwaIsrael. 17 Omri nomatanga ge oya thigi po Gibbeton e taa yi, ya ka kondeke Tirza. 18 Simri sho a mono kutya oshilando osha matukilwa, okwa yi mohote yomeni lyombala e ta tomeke ombala omulilo nokwa sile mo. 19 Shika osha ningwa molwokuyona kwe kOmuwa. Ngaashi omutetekeli gwe Jeroboam, naye wo okwa geyitha Omuwa nuulunde we mwene nasho a tula Israel muulunde. 20 Ashihe shilwe shoka Simri a ningi nasho a ningile omukwaniilwa oshinkumungu, oya nyolelwa membo lyondjokonona yaIsrael.
Omri, omukwaniilwa gwaIsrael
21 Aaisraeli oya li ya topoka: yamwe yomuyo oya li ya hala ya kwaniileke Tibni yaGinat, nayamwe oya gama kuOmri. 22 Pehulilo mboka ya gama kuOmri, oya sindana. Tibni a si, naOmri a ningi omukwaniilwa. 23 Osho ngaaka momumvo omutimilongondatu nogwotango gwepangelo lyaAsa, omukwaniilwa gwaJuda, Omri okwa ningi omukwaniilwa gwaIsrael nokwa lele omimvo omulongo nambali. Omimvo hamano dhotango okwa lele e li muTirza. 24 Nena okwa landa oshikulundundu shaSamaria iimaliwa yiisiliveli omayuvi gahamano komusamane gumwe, edhina lye Shemer. Omri okwa tungu ko oshilandohote e te shi luku Samaria, e shi lukile Shemer, mwene gwoshikulundundu.
25 Omri okwa yono kOmuwa e vule ayehe mbeyaka ye mu tetekela. 26 Okwa li a fa Jeroboam, okwa tukulutha ondjahi yOmuwa, Kalunga kaIsrael, nuulunde we nasho a fala aantu muulunde nomokusimaneka iimenka. 27 Ashihe shilwe shoka Omri a ningi niilonga ye ayihe oya nyolelwa membo lyondjokonona yaakwaniilwa yaIsrael. 28 Omri okwa si nokwa fumvikwa muSamaria, nomwana Ahab okwe mu landula muukwaniilwa.
Ahab, omukwaniilwa gwaIsrael
29 Momumvo omutimilongondatu nahetatu gwepangelo lyomukwaniilwa Asa, Ahab yaOmri okwa ningi omukwaniilwa gwaIsrael nokwa lele muSamaria omimvo omilongo mbali nambali. 30 Okwa yono kOmuwa e vule aatetekeli ye ayehe. 31 Kasha li she mu gwanena okuyona ngaashi omukwaniilwa Jeroboam; okwa pitilile po e ta hokana Isebel, omuna gwomukwaniilwa gwaSidon, Etbaal, nokwa longele Baal. 32 Okwa tungile Baal otempeli muSamaria, e mu ningile oshiyambelo e te shi tula motempeli. 33 Okwa dhike wo oshiyelekela shoshikalungakiintu Asheera. Okwa tukulutha unene ondjahi yOmuwa, Kalunga kaIsrael, e vule aakwaniilwa yaIsrael ayehe ye mu tetekelele. 34 Muuyuni we Hiel gwokuBetel okwa tungulula Jeriko. Ihe ngaashi Omuwa a popitha nale Josua yaNun, Hiel okwa kanitha omwanamati osheeli Abiram, sho a fulu omukanka gwaJeriko, nomwanamati onkelo Segub, sho a kula omiyelo dhasho.
© Oshindonga Bible © Bible Society of Namibia, 2008.
