Okuhengana nokuhokanununa
1 Natu tye omuntu ota hokana omukiintu e te mu kunyukwa, molwashoka a mono muye ombedhi yasha. Ota nyola onzapo yehengo e te yi mu pe noku mu laleka mo megumbo lye. 2 Omukiintu ngoka ota hokanwa kugulwe, 3 naanguka wo ote mu si uunye, ta nyola onzapo yehengo, te yi mu pe noku mu laleka mo megumbo lye; nenge omulume nguka ota mana oondjenda. 4 Nena omulumentu gwe gwotango ita vulu we oku mu hokanununa, ihe oku mu tala a nyata. Ngele ote mu hokanununa, shoka otashi ningi ondjo momeho gOmuwa. Ino longa iihuna ya tya ngaaka mevi ndyoka Omuwa Kalunga koye te li ku pe.
Oompango dhi ili nodhi ili
5 “Omulumentu ngele opo a hokana, ita pumbwa okuya kiita nenge kiilonga yuupyakadhi ulwe; na manguluke kuupyakadhi kehe omumvo gumwe, opo a wape okukala pegumbo a nyanyudhe omukadhi.”
6 “Kape na ngoka ta kutha po oshini ombambyona, oshoka oshini osho hashi tsilwa iilyamwenyo gwomuntu.
7 “Ngele ope na ngoka ta kwata Omuisraeli omukwawo, e mu ninge omupika gwe nenge e mu landithe po muupika, na dhipagwe. Komba po uuwinayi mokati keni.”
8 “Uuna to adhika kuuvu woshilundu, kotoka u ninge shili, ngaashi aayambi Aalevi taye ku lombwele. Dhiginina nawa omapukululo ngoka nde ge ya pa. 9 Dhimbulukwa Omuwa Kalunga koye shoka a ningile Miriam mondjila yokutembuka kweni muEgipiti.”
10 “Ngele owa hehelelwe sha kumukweni, ino ya maandjawo, u kwate po ekumbyatha lye ombambyona; 11 tegelela pondje, e li ete kungoye ye mwene. 12 Ngele oye ohepele, ino kala nalyo sigo ongulohi; 13 li shunitha kuye ongulohi kehe, e ki isiikile nalyo. Nena ota pandula, nOmuwa Kalunga koye ote ku yambeke.
14 “Ino kotokela nakufutwa ohepele nomukweyi, ongele Omuisraeli omukweni nenge omukwiilongo a kala miilando yoye. 15 Mu futa ondjambi ye esiku kehe, manga etango inaali ningina; ota pumbwa iimaliwa noku na etegameno kutya ote ke yi pewa. Ngele ito mu futu, ota kugile Omuwa onkugo, notashi ku ningile ondjo.”
16 “Aakuluntu inaa dhipagelwa oondjo dhoyana, noyana inaa dhipagelwa oondjo dhahe. Shaa ngoka na dhipagelwe iipogo ye mwene.
17 “Ino goyokitha uuthemba waakwiilongo nowoothigwa, nekumbyatha lyomuselekadhi ino li kwata po ombambyona. 18 Dhimbulukwa tuu kutya owa li omupika muEgipiti, nOmuwa Kalunga koye okwe ku mangulula; omolwashoka tandi ku pe oshipango shika.
19 “Uuna to teya iilya yoye, e to dhimbwa ondudhi yimwe mepya, ino ya ko we, u ke yi tale ko; nayi ninge yaakwiilongo, yoothigwa noyaaselekadhi, opo Omuwa Kalunga koye e ku yambeke mwaayihe to yi ningi. 20 Ngele to shopola ko ooholivi dhoye, ino kutha ko nomakukila; naga ninge gaakwiilongo, goothigwa nogaaselekadhi. 21 Nge to likola omandjembele goye, omuviinu ino gu sinasina thiluthilu; omandjembele ngoka taga kala po, naga ninge gaakwiilongo, goothigwa nogaaselekadhi. 22 Dhimbulukwa tuu kutya owa li omupika muEgipiti, nomolwashoka tandi ku pe oshipango shika.”
© Oshindonga Bible © Bible Society of Namibia, 2008.
