Uukolokoshi negeelo lyaJuda
1 Omuwa ota ti: “Aajuda ne, uulunde weni owa nyolwa nopena yosheela, owa takelwa moomwenyo dheni nondungu yondiamande nowa negelwa kookolonela dhiiyambelo yeni. 2 Aantu yeni ohaa saagele piiyambelo nopoongundhi dha dhikilwa oshikalungakiintu Asheera momuzile gwomuti kehe omutalala, koondungu dhoondundu, 3 nokoondundu dhomolushandja. Otandi ka sikumudha aatondi yeni ya yuge po uuyamba weni nomaliko geni moluulunde auhe mboka mwa longo mevi lyeni alihe. 4 Ne omu na okweetha evi nde li mu pe, otandi ke mu longithitha mu longele aatondi yeni mevi inaamu li tseya nale, oshoka ondjahi yandje oya fa omulilo, notayi kala ya hwama aluhe.”
Oohapu dhi ili nodhi ili
5 Omuwa ota ti:
“Otandi pangula omuntu ngoka ta pilamene ndje
noti inekele omuntu, oonkondo dhomuntu gwowala
6 Okwa fa oshihwa mombuga tashi koko montale ya kukuta
mevi lyoshimongwa, moka ihaamu koko sha shilwe.
Ita ningilwa uuwanawa washa.
7 “Ihe ote yambeke omuntu ngoka i inekela ndje.
8 Okwa fa omuti tagu kokele pomatondokelo gomeya
tagu taandelekele omidhi momeya.
Itagu tila, nando ombepo ompyu tayi pepe,
oshoka omafo gagwo oga ziza.
Kagu na mbudhi, nando omvula yaa ko,
otagu imi aluhe iiyimati.
9 “Omwenyo ogwo omunamakoto kombanda yiinima ayihe,
nokagu shi kwaaludhwa.
Olye ta vulu oku gu uva ko?
10 Ongame, Omuwa, tandi konakona omatedho
notandi yeleke oomwenyo dhaantu.
Shaa ngoka otandi mu ningi pakukala kwe,
otandi mu futu pailonga ye.”
11 Ngashika onkanga tayi tendula omayi inaayi ga vala,
osho wo omuntu ngoka ta likola uuyamba nomakoto.
Omasiku ge nge ga ti metifa, ote u thigi po,
nopehulilo ota ningi egoya.
12 Otempeli yetu oya fa oshipangelapundi sha simana;
oya thikama kondundu ondeendeka okuza ketameko.
13 Omuwa, ongoye etegameno lyaIsrael,
ayehe mboka taye ku etha, otaa si ohoni.
Otaa dhimi po ya fa omadhina ga nyolelwa montsi,
oshoka oyo ye ku etha, Omuwa,
omuthima gwomeya omanamwenyo.
Jeremia ta kugile Omuwa ekwatho
14 Panga ndje, Omuwa, ongame notandi aluka; hupitha ndje, note kala ndaa na ombudhi. Ongoye awike tandi hambelele!
15 Aantu otaa lombwele ndje taa ti: “Oohapu dhOmuwa odhi li peni? Nadhi kale dha tsa nduno!”
16 Ihe, Omuwa, inandi ku ulumika nando, u ya undulile omupya; inandi ya halela ethimbo lyomalwa. Omuwa, owe shi tseya; ou shi shoka nda ti. 17 Ino halutha ndje; ongoye eholameno lyandje, uudhigu nge tau ya. 18 Sitha aatidhagani yandje ohoni, ihe gamena ndje. Ya halutha noonkondo, ihe ino tilitha ndje. Ya undulila omupya, u ya ndimbule iintimbu.
Okuyapula Esabati
19 Omuwa okwa lombwele ndje a ti: “Jeremia, inda u ka uvithe oohapu dhandje pOsheelo shaantu, mpoka hapu pitile aakwaniilwa yaJuda, nge taa yi nenge taa piti moshilando; inda ihe komiyelo adhihe dhilwe dhaJerusalem. 20 Lombwela aakwaniilwa nAajuda ayehe noshaa ngoka a kala muJerusalem ha pitile miiyelo mbika, a pulakene shoka tandi popi. 21 Ya lombwela kutya ngele oye hole oomwenyo dhawo, inaa humbata nando omutenge gwasha mEsabati; kaye na okuhumbata sha taa pitile miiyelo yaJerusalem, 22 nenge ya humbate sha ye shi kutha momagumbo gawo mEsabati. Inaa longa sha mEsabati. Naye li dhiginine esiku eyapuki, ngaashi nda lombwele oohekulu. 23 Oohekulu inaa pulakena ndje nenge ya pupe ndje. Oya tangalala; inaa vulika kungame nenge yi ilonge ndje.
24 “Lombwela aantu mbaka kutya oye na okuvulika kiipango yandje ayihe. Inaa humbata nando omutenge taa pitile miiyelo yoshilando mEsabati. Oye na okudhiginina Esabati, li ninge esiku eyapuki, nokaye na okulonga sha. 25 Nena aakwaniilwa nomalenga otaga ka pitila momiyelo dhaJerusalem notaga kala ge na uukwaniilwa mboka David a li e u na. Aajuda pamwe nAajerusalem otaa ka londa komatembakwiita nokuukambe, noshilando Jerusalem otashi ka udha aantu. 26 Aantu otaa ka za kiilando yaJuda nokomikunda dha kunduka Jerusalem; otaa ke ya taa zi koshikandjo shaBenjamin nokiikulundundu yoponyonga yoondundu, koondundu nokuumbugantu waJuda. Otaa ka eta kotempeli yandje omafikilondjambo, oontselelandjambo, oondjambo dhiikulya nodhiitsinino nosho wo omahambelelondjambo. 27 Ihe oye na okuvulika kungame nokudhiginina Esabati, esiku eyapuki. Inaa humbata nando omutenge gwasha taa pitile miiyelo yaJerusalem esiku ndyoka, oshoka ngele taye shi ningi, otandi ka tomeka iiyelo yaJerusalem omulilo. Omulilo otagu ka hwama moombala dhaJerusalem, nokaku na ngoka ta vulu oku gu dhima.”
© Oshindonga Bible © Bible Society of Namibia, 2008.
