Omuyapostoli gwaKristus
1 Ano natu talwe kutya otse aayakuli yaKristus, mboka twa pewa iipatululo yegumbo lyiiholekwa yaKalunga. 2 Omusilishimpwiyu kehe ota tegelelwa, a kale omwiinekelwa. 3 Ngame polwandje kandi na ko nasha nokupangulwa kune nenge kompangu yilwe yopantu. Itandi vulu nokuli okwiipangula ngame mwene. 4 Ondi na eiyuvo lya yela, ihe itashi ti ando kutya kandi na oondjo. Omuwa oye omupanguli gwandje. 5 Onkee ano inamu pangula nando olye, esiku lyu uthwa manga inaali thika. Epangulo oli na okutegelela sigo uuna ndoka Omuwa mwene te ya. Oye te ke eta puuyelele iiholekwa ayihe mbyoka aantu ye yi longa momilema, nota ka holola wo omadhiladhilo gawo ngoka ga holama. Nena kehe gumwe ota ka pewa esimano kuKalunga, ndyoka e li ilongela.
6 Aamwamene, oshinima shika onde shi ukitha kombinga yaApollos noyandje mwene, oshoka onda gama kune. Ondu ulike kutse yene, opo mu ilonge kutya eyele ndika otali ti shike: “Ino konda shoka shu uthwa.” Inaku kala nando ogumwe mokati keni ti itangele nguka ye ta dhini ngwiyaka. 7 Olye e ku ningi u vule yakweni? Oshike shono u na inoo shi pewa kuKalunga? Onkee oto vulu ngiini okwiitanga wa fa iinima ayihe inoo yi pewa omagano?
8 One omu na nale ashihe shoka mwa pumbwa. One aayamba. One omwa ningi aakwaniilwa, nonando tse katu shi aakwaniilwa. Onda halele, mu kale mwa ninga lela aakwaniilwa, opo natse wo tu ninge aakwaniilwa pamwe nane. 9 Onde shi tala kutya tse aayapostoli otwa pewa kuKalunga ehala lya dhinika. Tse otwa fa aantu ya tokolelwa eso montaneho yaayehe. Muuyuni otu li mo twa tongololwa kaantu nokaayengeli. 10 Otse aagoya molwaKristus, ihe ne aanandunge muukumwe naKristus. Otse aankundi, ihe ne aanankondo. Tse otwa dhinika, ihe ne otamu simanekwa. 11 Sigo ongashingeyi otu li po twa sa ondjala nenota, twa zalekwa iinyanyu, otatu dhengwa, otatu endagula koombinga noombinga. 12 Otatu longo twa mana mo, opo tu imonene iipalutha. Otatu yambeke mboka taye tu thingi. Ngele tatu tidhaganwa, otatu idhidhimike. 13 Ngele tatu popiwa nayi, otatu yamukula noohapu oombwanawa. Ethimbo alihe otse otwa fa oshilambo shiiyagaya muuyuni mbuka nondoya yevi ndika.
14 Moku mu nyolela ngeyi itandi shi ningi ando nda hala oku mu sitha ohoni, ihe otandi shi ningi, ndi mu longe oondunge ongaamwandje aaholike. 15 Oshoka mokukala kweni muKristus nando omu kale mu na aalongi omayuvi omulongo, omu na owala ho gumwe awike. Oshoka ngame onda ningi ho mokukala kweni muKristus Jesus, sho nde mu uvithile elaka etoye. 16 Onkee otandi mu indile, mu landule oshiholelwa shoka tandi shi mu ulukile. 17 Omolwoshinima shika otandi mu tumine Timoteus. Oye omumwandje omuholike nomwiinekelwa mOmuwa. Oye te ke mu dhimbulukitha omikalo adhihe ndi dhi na mokukala kwandje akuhe muKristus Jesus, naandhoka tandi longo aantu momagongalo agehe.
18 Yamwe yomokati keni oya tameke okwiinenepeka, sho taa dhiladhila kutya itandi ya we, ndi mu talele po. 19 Omuwa ngele okwe shi hala, otandi ke ya mbala, ndi mu talele po notandi ki imonena ko mwene shoka aayinenepeki haa vulu okuninga, itaaku talwa owala okupopya kwawo. 20 Oshoka Oshilongo shaKalunga kashi shi oshinima shokupopya kwowala, ihe oshinima shi na oonkondo. 21 Otamu hogolola po shini? Nandi ye kune ndi na ongola nenge nandi ye ndi na omutima gu udha ohole nombili?
© Oshindonga Bible © Bible Society of Namibia, 2008.
