Emoniko lyaDaniel pomulonga Tigris
1 Momumvo omutitatu sho Kores a li omukwaniilwa gwaPersia, elaka olya hololelwa Daniel, ngoka haku tiwa Beltshazzar; Elaka olya li lyoshili, ihe edhigu unene okuuvika ko. Olye mu fatululilwa memoniko.
2 Pethimbo ndyoka onda li nda sa oluhodhi iiwike itatu. 3 Inandi lya iithima yomagadhi nenge onyama, inandi nwa omaviinu, nenge ndi igwayeke nomagadhi, sigo iiwike itatu ya piti po.
4 Mesiku etimilongombali netine lyomwedhi gwotango gwomumvo, onda li nda thikama pomunkulo gwomulonga omunene Tigris. 5 Onda ligamene pombanda nonda mono omulumentu a zala oonguwo dholiina nepaya lyoshingoli oshiyelele. 6 Olutu lwe olwa li talu wema lwa fa emanya lyondilo. Oshipala she osha li tashi adhima sha fa okushela kwolwaadhi, nomeho ge oga hwama ga fa omulilo. Omaako ge nomagulu ge oga li taga taima ga fa oshikushu sha yelithwa, newi lye olya li tali popi lya fa omupopyo gwongundu onene.
7 Ongame awike nda mono emoniko ndika. Aantu mboka ya li nangame, inaa mona sha, ihe oya li ya haluka e taa fadhuka po noya holama. 8 Onda thigwa po awike nda tongolola emoniko ndika ekumithi. Oonkondo dhandje odha thigi ndje po, noshipala shandje osha shituka, kape na muntu ta dhimbulula ndje. 9 Sho ndu uvu ewi lye, onda gwile pevi nda kankwa nonda lala nda tsa oshipala mevi. 10 Nena oshikaha osha yelutha ndje po nonda tsu oongolo ndi ikwatelela pevi niikaha, ngame te kakama natango.
11 Omuyengeli okwa ti kungame: “Daniel, Kalunga oku ku hole. Thikama, ngoye u pulakene nawa shoka tandi ke ku lombwela. Onda tumwa, ndi ye kungoye.” Sho a popi oohapu ndhika, onda kakama natango.
12 Nena okwa ti: “Daniel, ino tila, Kalunga oku uvu omagalikano goye okuza kesiku ndyoka lyotango wa tokola, u ifupipike koshipala she, opo u ninge omunandunge. Onde ya, ndi ku etele eyamukulo lyomagalikano goye. 13 Omuyengelindjayi gwoshilongo shaPersia okwa kondjitha ndje omasiku omilongo mbali nalimwe. Nena Mikael, gumwe gwomaayengeli aakuluntu, okwe ya okukwatha ndje, oshoka ongame awike nda kalele mo muPersia. 14 Onde ya, ndi ku uvitithe ko shoka tashi ka ningilwa oshigwana shoye konakuyiwa. Emoniko ndika olyiinima yokomeho.”
15 Sho a popi ndhika, onda thikama nokupugalala. 16 Nena omuyengeli, ngoka a fa omuntu, okwa ganeke oshikaha she e ta gumu omilungu dhandje. Onda ti kuye: “Tatekulu, emoniko ndika olya tyololokitha ndje thilu, noite vulu sha. 17 Onda fa omupika a thikama koshipala shamwene gwe. Otandi vulu okutya ngiini kungoye? Kandi na nkondo nenge omufudho gwa kala mungame.”
18 Nena okwa gumu ndje ishewe e ta kolekulula ndje. 19 Okwa ti: “Kalunga oku ku hole, onkee ino tila, ino piyaganekwa kusha.”
Sho a popi ndhika, onda mono oonkondo nonda ti: “Tatekulu, lombwela ndje shoka u na okulombwela ndje. Ongoye wa nkondopaleke ndje.”
20-21 Okwa ti: “Ou shi shi tuu kutya omolwashike nde ya kungoye? Onde ya, ndi ku hololele shoka sha nyolelwa membo lyoshili. Ngashingeyi otandi shuna notii ka kondja nomuyengelindjayi gwaPersia. Konima yaambika omuyengelindjayi gwaGreka ota ka holoka. Kape na ngoka ta kwatha ndje kakele kaMikael, omuyengelindjayi gwaIsrael.
© Oshindonga Bible © Bible Society of Namibia, 2008.
