Paulus muMakedonia nomuGreka
1 Ano euyagano ndika sho lya mwena, Paulus okwi ithana ooitaali nokwe ya laleke noohapu dhomakumagidho. Nena okwe ya thigi po ihe e ta yi kuMakedonia. 2 Oye okwe endaenda nomikunda ndhiyaka adhihe nokwa tsu aantu omukumo noohapu odhindji. Opo ihe okwe ya kuGreka e ta kala ko uule woomwedhi ndatu. 3 Ano manga a li ti ilongekidha, a ye kuSiria, okwa dhimbulula kutya Aajuda oye mu langela. Onkee okwa tokola okushuna nokupitila muMakedonia. 4 Sopater yaPirro, Omuberea, okwa yi pamwe naye; osho wo Aatessalonika, Aristarkus naSekundus, Gaius Omuderbe, Timoteus nAayasia yaali, Tikikus na Trofimus. 5 Oyo oya tetekele e taye tu tegelele muTroas. 6 Konima yoshituthi shiikwiila inaayi fulikwa otwa thikama nosikepa muFilippi notwa thiki kuyo muTroas, sho twe ende omasiku gatano e tatu kala mo oshiwike shimwe.
Etalelopo lyaPaulus lyahugunina muTroas
7 Ongulohi yOlyomakaya otwa gongala pamwe, opo tu lye uulalelo wuukumwe. Paulus okwa popitha aantu. Molwaashoka okwa li e na okuza po esiku lya landula, okwa tsikile okupopya sigo opokati kuusiku. 8 Moshinyanga shopombanda, moka twa li twa gongala, omwa li mu na oolamba odhindji dha minikila.
9 Omulumentu gumwe omugundjuka, edhina lye Eutikus, okwa li a kuutumba pekende. Ano Paulus sho a popi olule, Eutikus okwa tameke okusa oomposi. Oye okwa gu ko kontala ontintatu e ta gwile pevi nokwa toolwa a sa. 10 Ihe Paulus okwa kulukile pevi e ti iyumbile kombanda ye nokwe mu papatele e ta ti: “Inamu tila, oku na natango omwenyo.” 11 Opo ihe okwa shuna ishewe pombanda, a topola oshikwiila nokwa li e ta tsikile natango okupopya, sigo etango lya piti, nokwa yi. 12 Nena oyo oya kutha po omugundjuka nguka e taye mu fala kegumbo e na omwenyo, naashika osha talaleke oomwenyo dhawo.
Paulus ta yi kuMileto
13 Otse otwa tetekele nosikepa notwa yi kuAsso, tu ka pitule Paulus. Oshoka oye okwa li a hala okweenda kolupadhi, nokwe tu lombwele, tu ke mu pitule hoka. 14 Ano sho e tu tsakaneke muAsso, otwe mu taamba mosikepa notwa yi kuMitilene. 15 Esiku lya landula otwa li ontega naKios, nesiku etiyali otwe ya kuSamos nesiku etitatu otwa thiki muMileto. 16 Oshoka Paulus okwa li a tokola okupitilila Efeso, opo kaa manene ethimbo muAsia. Oye okwa li meendelelo, a hala ando, ngele tashi vulika, a thike kuJerusalem esiku lyaPentekoste.
Paulus ta popitha aakuluntu yegongalo Aaefeso muMileto
17 MuMileto Paulus okwa tumu elaka kuEfeso nokwi ithana aakuluntu yegongalo, ye ye kuye. 18 Ano sho ye ya, okwe ya lombwele ta ti: “One omwa tseya, nkene nda kala ethimbo alihe pune okuza kesiku lyotango, sho nda thiki kuAsia. 19 Mokati komamakelo ogendji ngoka ga tsakaneke ndje omolwondumbo yAajuda, onda longele Omuwa neifupipiko enene nonomahodhi ogendji. 20 One omwa tseya kutya mokuuvitha nomokulonga kwandje montaneho yaantu ayehe nomomagumbo geni onde mu ulukile iinima ayihe mbyoka tayi mu kwatha. 21 Onda lombwele aantu ayehe, Aajuda naapagani kutya naa itedhulule, ya galukile kuKalunga noyi itaale Omuwa gwetu Jesus.
22 “Ano ngashingeyi mokuvulika kwandje kOmbepo Ondjapuki otandi yi kuJerusalem nokandi shi wo kutya oshike tashi ka tsakaneka ndje nkwiyaka. 23 Onda tseya ashike kutya miilando ayihe Ombepo Ondjapuki ota tseyithile ndje kutya oomango nomahepeko otayi tegelele ndje. 24 Ihe ngame mokugwanitha eithano lyandje kandi na nando uutende nomwenyo gwandje. Onda hala ashike okutsakanitha oshilonga shoka nde shi pewa kOmuwa Jesus shokuuvitha elaka etoye tali hokolola esilohenda lyaKalunga.
25 “Nokuli ngashingeyi ondi shi shi kutya ne mboka nde ende mokati keni, sho ndu uvitha Oshilongo shaKalunga, itamu ka mona we oshipala shandje. 26 Onkee ano otandi mu tseyithile nena ndjika kutya ngele ope na gumwe gwomune ta ka kana, kashi shi nando ondjo yandje. 27 Oshoka ngame inandi thiga ko nando osha, ihe onde mu tseyithile ashihe shoka Kalunga a hala oku shi mu ningila. 28 Itonateleni ano, ne mu tonatele wo oshigunda ashihe shoka mwe shi pewa kOmbepo Ondjapuki. Litheni egongalo lyaKalunga ndyoka e li ilikolele neso lyOmwana. 29 Oshoka ondi shi shi kutya, ngele nda zi po, omambungu haga lyana otaga ka gwayela mokati keni, gaa na nando ohenda noonzi. 30 Nokuli ethimbo otali ke ya, uuna aalumentu yamwe yomokati keni taa ka kala nokupopya iifundja, yi ihilile aalongwa. 31 Onkee ano kotokeni, ne mu dhimbulukwe, nkene nde mu kumagidha amuhe nomahodhi gandje uule woomvula ndatu.
32 “Onkee ano ngashingeyi otandi mu gandja mesiloshimpwiyu lyaKalunga nokoohapu dhesilohenda lye. Oye oku na oonkondo oku mu koleka noku mu pa omayambeko ngoka e ga pungulila aantu ye ayehe. 33 Ngame inandi ihalela nando oshinima shaa shi shandje, oshisiliveli nenge oshingoli nenge oonguwo dhomuntu. 34 One yene omwa tseya kutya ngame onda longo mwene niikaha yandje nondi imonene oompumbwe dhandje nodhooyakwetu. 35 Miinima mbika ayihe ngame onde mu ulukile kutya mokulonga noonkondo adhihe pamukalo nguka otatu vulu okukwatha aankundi. Dhimbulukweni oohapu ndhoka Omuwa Jesus mwene e dhi popi, sho a ti: ‘Okugandja oku na elago ku vule okutaamba.’ ”
36 Ano Paulus sho a mana okupopya, okwa tsu oongolo pamwe nayo ayehe e ta galikana. 37 Oyo ayehe oya lili, oye mu papatele noye mu laleke noku mu thipa komilungu. 38 Oyo oya li ya nika oluhodhi, unene omolwoohapu ndhoka e dhi popi, sho a ti kutya itaye ke mu mona we. Opo ihe oye mu thindikile kosikepa.
© Oshindonga Bible © Bible Society of Namibia, 2008.
